കുട്ടിക്കാലം മുതലെ ഒരുപാട് ബോഡി ഷെയിമിങ് നേരിടേണ്ടി വന്നിട്ടുണ്ട്: വെളിപ്പെടുത്തി മാലാ പാര്‍വതി

കുട്ടിക്കാലം മുതല്‍ തന്നെ ഒരുപാട് ബോഡി ഷെയിമിങ് നേരിടേണ്ടി വന്നിട്ടുണ്ട്. നമ്മള്‍ എങ്ങനെയാണ് മറ്റുള്ളവരുടെ കാഴ്ചയെ സ്വാധീനിക്കുക എന്നതോര്‍ത്ത് ഒരുപാട് വേവലാതിപ്പെട്ടിട്ടുണ്ടെന്നും സിനിമയില്‍ അത് വെല്ലുവിളിയായിരുന്നുവെന്നും മാലാ പാര്‍വ്വതി പറഞ്ഞു. ഒപ്പം തന്നെ പുതിയ കാലത്തെ മലയാള സിനിമയില്‍ സ്ത്രീകളെ ചിത്രീകരിക്കുന്ന രീതിയില്‍ വലിയ മാറ്റങ്ങള്‍ വന്നിട്ടുണ്ടെന്നും മാലാ പാര്‍വ്വതി ദ ക്യുവിനോട് പറഞ്ഞു.നടിയുടെ വാക്കുകള്‍ വൈറല്‍ ആയിട്ടുണ്ട്.

മാലാ പാര്‍വതിയുടെ വാക്കുകള്‍ ഇങ്ങനെ...''കുട്ടിക്കാലം മുതല്‍ ഒരുപാട് ബോഡി ഷെയ്മിങ് നേരിടേണ്ടി വന്ന ഒരാളാണ് ഞാന്‍. തടിയുള്ള കൂട്ടത്തിലായിരുന്നു. നമ്മള്‍ മറ്റുള്ളവരുടെ കാഴ്ചയാണല്ലോ. അപ്പോള്‍ നമ്മള്‍ മറ്റുള്ളവരുടെ കാഴ്ചയെ പ്രശ്നമാക്കുന്നത് തെറ്റാണെന്ന് വിശ്വസിച്ചിരുന്നു പക്ഷെ, പുറത്തുപോയിത്തുടങ്ങിയപ്പോള്‍ അത് മാറി. അത് അങ്ങനെയല്ല, മറ്റുള്ളവര്‍ക്ക് എന്താണ് കുഴപ്പം, നമ്മുടെ ശരീരമാണല്ലോ എന്ന് തോന്നിയത്.

പാര്‍വ്വതി തിരുവോത്ത് മഞ്ജു വാര്യര്‍ പോലുള്ള നടികളുടെ കടന്നുവരവ് ഇന്നത്തെ മലയാള സിനിമയിലെ സ്ത്രീ വേഷങ്ങളെ നന്നായി സ്വാധീനിച്ചിട്ടുണ്ട്. കാരണം, പണ്ട് ഉണ്ടായിരുന്നത് പോലെ സിനിമയിലെ ഒരു പ്രധാന കഥാപാത്രത്തെ താങ്ങി നിര്‍ത്താന്‍ സ്ത്രീകള്‍ക്കും സാധിക്കും എന്ന് അവര്‍ കാണിച്ചുതന്നു. അതുമാത്രമല്ല, നമ്മുടെ സമൂഹത്തില്‍ നല്ല ഒരു പോസിറ്റീവായിട്ടുള്ള ഒരു മാറ്റം വരുന്നുണ്ട്. അതില്‍ സോഷ്യല്‍ മീഡിയയുടെ പങ്ക് വളരെ വലുതാണ്''; മാലാ പാര്‍വതി പറഞ്ഞു.

മാലാ പാര്‍വതിയുടേതായി നിരവധി ചിത്രങ്ങളാണ് അണിയറയില്‍ ഒരുങ്ങുന്നത്. തമിഴിലും ഈ വര്‍ഷം നടി അഭിനയിച്ചിരുന്നു. മലയാളിയായ മനു ആനന്ദ് സംവിധാനം ചെയ്ത എഫ്‌ഐആറിലാണ് അഭിനിച്ചത്. വിഷ്ണു വിശാലിന്റെ അമ്മയായിട്ടാണ് ചിത്രത്തില്‍ എത്തിയത്. ഹിന്ദിയിലും ചുവട് വയ്ക്കാന്‍ തയ്യാറെടുക്കുകയാണ് താരം. രേവതി സംവിധാനം ചെയ്യുന്ന സലാം വെങ്കി'യെന്ന ചിത്രത്തില്‍ ക്ഷണം ലഭിച്ചിട്ടുണ്ടെന്ന് വാര്‍ത്തകള്‍ പ്രചരിക്കുന്നുണ്ട്. കാജോളാണ് ചിത്രത്തിലെ നായിക. ഇതിനോടകം തന്നെ നൂറില്‍ അധികം സിനിമകളില്‍ മാലാ പാര്‍വതി അഭിനയിച്ചിട്ടുണ്ട്.