'ഒളിച്ചോടി വിവാഹം ചെയ്തവരാണോയെന്ന് ചോദിക്കാറുണ്ട്'; മാതാപിതാക്കളുടെ സ്പെഷ്യൽ ഡേ ആഘോഷിച്ച് ഡിംപിൾ റോസ്!

വീട്ടിൽ നിന്നും കുടുംബാം​ഗങ്ങൾക്കും തന്റെ സുഹൃത്തുക്കൾക്കുമൊപ്പം ഡിംപിൾ മാതാപിതാക്കളുടെ വിവാഹ വാർഷികം കേക്ക് മുറിച്ച് ആഘോഷിച്ചു. ശേഷം കുടുംബാം​ഗങ്ങൾക്കെല്ലാമായി ചെറിയൊരു വിരുന്നും സംഘടിപ്പിച്ചിരുന്നു.

അവിടെ വെച്ച് ഡിംപിളിന്റെ മമ്മിയും ഡാഡിയും മുപ്പത്തിയേഴ് വർഷത്തെ വിവാ​ഹ​ ജീവിതത്തെ കുറിച്ച് സംസാരിച്ചു. 'ഞങ്ങൾ വളരെ ചെറുപ്പത്തിൽ വിവാഹിതരായവരാണ്.'

'വിവാഹം ചെയ്യുമ്പോൾ എനിക്ക് പതിനെട്ട് വയസും ഡിംപിളിന്റെ പപ്പയ്ക്ക് 21 വയസുമായിരുന്നു പ്രായം. അന്ന് ഞങ്ങളെ കാണുന്നവരെല്ലാം ചോദിക്കുമായിരുന്നു ഒളിച്ചോടി വിവാഹം ചെയ്തതാണോയെന്ന്.'

'പക്ഷെ സത്യം അതല്ല. വീട്ടുകാർ തീരുമാനിച്ച് ഉറപ്പിച്ച വിവാഹമായിരുന്നു. വിവാഹത്തിന് ശേഷം ഒരുപാട് സാഹസങ്ങൾ ചെയ്തിട്ടുണ്ട്. ഒരിക്കൽ ടുവീലറിൽ‌ എടുത്ത് വീട്ടിൽ പറയാതെ ഞങ്ങൾ രണ്ടുപേരും കൊയമ്പത്തൂർ പോയിരുന്നു. അന്നത്തെ ഒരു ആവേശത്തിൽ ചെയ്തതാണ്. അന്ന് അധികം വണ്ടികളൊന്നും റോഡിലില്ലാതിരുന്ന കാലഘട്ടമാണ്.'

'അതിനാൽ സുഖമായി പോയി വന്നു' ഡിംപിളിന്റെ അമ്മ പറഞ്ഞു. 'വിവാഹം കഴിഞ്ഞ ശേഷം അമ്മയെ കണ്ടപ്പോൾ പപ്പയ്ക്ക് ഉണ്ടായ അനുഭവം പലപ്പോഴും പറഞ്ഞിട്ടുണ്ടെന്നും അത് പപ്പ തന്നെ ഇപ്പോൾ പറയുമെന്ന്' ഡിംപിൾ പറഞ്ഞു. തുടർന്ന് വിവാഹ ദിവസത്തെ അനുഭവം ഡിംപിളിന്റെ പപ്പയാണ് വിശദീകരിച്ചത്.

'വിവാഹത്തിന് ഉടുത്ത സാരി മാറി ഒരു വെളുത്ത ​ഗൗൺ ധരിച്ച് മാലാഖയെപ്പോലെയാണ് അന്ന് ഡിംപിളിന്റെ അമ്മ വന്നത്. പെട്ടന്ന് എനിക്ക് ആളെ മനസിലായില്ല' ഡിംപിളിന്റെ പപ്പ വിവാഹ​ ദിവസത്തെ ഓർമകൾ പൊടിതട്ടിയെടുത്ത് പറഞ്ഞു.

'മമ്മിയും ഡാഡിയും വളരെ വിരളമായി വഴക്ക് കൂടുന്നവരാണ് ഇവർ ഒരു റൊമാന്റിക്ക് കപ്പിളാണ്. ഇവരുടെ ടോം ആന്റ് ജെറി കഥകൾ നിരവധിയുണ്ട്. ഇരുവരും ബിസിനസുമായി ബന്ധപ്പെട്ട് മാത്രമെ വഴക്ക് കൂടാറുള്ളു. മാത്രമല്ല മമ്മിയും ഡാഡിയും വഴക്ക് കൂടുമ്പോൾ‌ അതിൽ നമ്മൾ ഇടപെടാൻ പോയാൽ അവസാനം നമ്മൾ‌ പെട്ട് പോകും.'

'അവർ അവസാനം ഒന്നിക്കുകയും നമ്മൾ‌ പുറത്താകുകയും ചെയ്യും' ഡിംപിളും ഡിംപിളിന്റെ സഹോദരന്റെ ഭാര്യ ഡിവൈനും പറഞ്ഞു. ഡിംപിളിന് ഇരട്ട കുഞ്ഞുങ്ങാണ് പിറന്നത്. പക്ഷെ ഒരാളുടെ ജീവൻ മാത്രമാണ് രക്ഷിക്കാൻ പറ്റിയത്. ഒരു മകനെ നഷ്ടപ്പെട്ട സങ്കടവും ഡിംപിൾ മുമ്പ് ആരാധകരുമായി പങ്കുവെച്ചിരുന്നു.

ഡിംപിളിന്റെ സഹോദരൻ ഡോൺ നടി മേഘ്ന വിൻസെന്റിനെയായിരുന്നു ആദ്യം വിവാഹം ചെയ്തത്. പിന്നീട് ഇരുവരും ഒത്തുപോകാൻ സാധിക്കാത്തതിനാൽ വിവാ​ഹമോചിതരായി. ശേഷമാണ് ഡോൺ ഡിവൈനിനെ വിവാഹം ചെയ്തത്. മേഘ്ന വിവാഹ മോചനത്തിന് ശേഷം അഭിനയത്തിൽ ശ്രദ്ധ കേന്ദ്രീകരിച്ചിരിക്കുകയാണ്.