മമ്മൂട്ടിയും നിവിനും സൗബിനും വിസ്മയിപ്പിക്കും! നവംബറില്‍ റിലീസ് ചെയ്യുന്ന സിനിമകള്‍ ഇവയാണ്!

അണ്ടര്‍വേള്‍ഡ്, ഹെലന്‍ ഈ രണ്ട് സിനിമകളാണ് പ്രേക്ഷകര്‍ക്ക് മുന്നില്‍ ആദ്യവാരത്തില്‍ എത്തുന്നത്. ആസിഫ് അലിയും അരുണ്‍കുമാര്‍ അരവിന്ദും വീണ്ടും ഒരുമിച്ചെത്തുന്ന ചിത്രമാണ് അണ്ടര്‍വേള്‍ഡ്. സംയുക്ത മേനോനാണ് ചിത്രത്തില്‍ നായികയായി എത്തുന്നത്. ആസിഫ് അലിയുടെ മകന്‍ ആദം അലിയും ചിത്രത്തില്‍ അഭിനയിച്ചിട്ടുണ്ട്. ആര്‍ജെ മാത്തുക്കുട്ടിയുടെ സംവിധാന സംരംഭമാണ് ഹെലന്‍. അന്ന ബെന്നും നോബിള്‍ തോമസുമാണ് ചിത്രത്തില്‍ പ്രധാന താരങ്ങളായി എത്തുന്നത്. വിനീത് ശ്രീനിവാസനാണ് ഈ സിനിമ നിര്‍മ്മിക്കുന്നത്. നവംബര്‍ ഒന്നിനാണ് ഈ രണ്ട് സിനിമകളും റിലീസ് ചെയ്യുന്നതെന്നുള്ള വിവരങ്ങളാണ് പുറത്തുവന്നിട്ടുള്ളത്.

ഗീതുമോഹന്‍ദാസ് വീണ്ടും സംവിധായികയായി എത്തുകയാണ് മൂത്തോനിലൂടെ. നിവിന്‍ പോളി നായകനായെത്തിയ ചിത്രം നവംബര്‍ 8നാണ് തിയേറ്ററുകളിലേക്കെത്തുന്നത്. താരത്തിന്റെ പിറന്നാള്‍ ദിനത്തിലായിരുന്നു സിനിമയുടെ ട്രെയിലര്‍ എത്തിയത്. നിരവധി ചലച്ചിത്ര മേളകളില്‍ മാറ്റുരച്ച ചിത്രത്തിനായി അക്ഷമയോടെ കാത്തിരിക്കുകയാണ് സിനിമാപ്രേമികള്‍. അനുരാഗ് കശ്യപാണ് സിനിമയുടെ ഹിന്ദി സംഭാഷണങ്ങള്‍ ഒരുക്കിയത്. സൗബിന്‍ ഷാഹിര്‍ ചിത്രമായ ആന്‍ഡ്രോയ്ഡ് കുഞ്ഞപ്പനും നവംബര്‍ 8നാണ് തിയേറ്ററുകളിലേക്ക് എത്തുന്നത്. ലാല്‍ ജോസ് ചിത്രമായ 41 ന്റെ റിലീസും ഇതേ ദിനത്തിലാണെന്നാണ് റിപ്പോര്‍ട്ടുകള്‍.

അഡാര്‍ ലവിന് ശേഷമുള്ള അടുത്ത സിനിമയുമായി എത്താനുള്ള തയ്യാറെടുപ്പിലാണ് ഒമര്‍ ലുലു. നവംബര്‍ 15നാണ് ഈ സിനിമ എത്തുന്നത്. നിക്കി ഗില്‍റാണി, അരുണ്‍, മുകേഷ്, ഉര്‍വശി, ധര്‍മ്മജന്‍ തുടങ്ങി വന്‍താരനിരയാണ് ചിത്രത്തിനായി അണിനിരന്നിട്ടുള്ളത്. സിനിമയുടെ ഷൂട്ട് തീര്‍ന്നുവെന്നും പോസ്റ്റ് പ്രൊഡക്ഷനിലേക്ക് കടക്കുകയാണെന്നും വ്യക്തമാക്കി സംവിധായകന്‍ എത്തിയിരുന്നു.

മമ്മൂട്ടി ആരാധകര്‍ അക്ഷമയോടെ കാത്തിരിക്കുന്ന സിനിമയാണ് മാമാങ്കം. എം പത്മകുമാര്‍ സംവിധാനം ചെയ്ത സിനിമ നവംബര്‍ 21നാണ് എത്തുന്നതെന്നുള്ള വിവരങ്ങളാണ് പുറത്തുവന്നിട്ടുള്ളത്. പഴശ്ശിരാജയ്ക്ക് ശേഷം വീണ്ടും ചരിത്ര സിനിമയുമായി എത്തുകയാണ് മെഗാസ്റ്റാര്‍. മാമാങ്ക ചരിത്രവുമായെത്തുന്ന സിനിമയില്‍ വ്യത്യസ്ത ഗെറ്റപ്പുകളിലാണ് മെഗാസ്റ്റാര്‍ എത്തുന്നത്. കാവ്യ ഫിലിംസിന്‍രെ ബാനറില്‍ വേണു കുന്നമ്പിള്ളിയാണ് ചിത്രം നിര്‍മ്മിക്കുന്നത്.

രഞ്ജിത് ശങ്കര്‍ അജു വര്‍ഗീസ് കൂട്ടുകെട്ടിലൊരുങ്ങുന്ന ചിത്രമായ കമല നവംബര്‍ 29നാണ് തിയേറ്ററുകളിലേക്ക് എത്തുന്നത്. ഷെയ്ന്‍ നിഗമിന്റെ ചിത്രമായ വലിയ പെരുന്നാള്‍, രജിഷ വിജയന്‍-നിമിഷ സജയന്‍ ടീമിന്റെ സ്റ്റാന്‍ഡ് അപ് തുടങ്ങിയ സിനിമകളും നവംബറില്‍ പ്രേക്ഷകരെ കാത്തിരിക്കുന്നുണ്ട്.