'പ്രണയ സാഫല്യം...'; പൗർണമി തിങ്കൾ താരം ​ഗൗരി കൃഷ്ണനും മനോജും വിവാഹിതരായി, സാക്ഷികളായി പ്രിയപ്പെട്ടവർ!

കഴിഞ്ഞ രണ്ട്, മൂന്ന് ദിവസമായി ​വിവാഹത്തിന് മുന്നോടിയായുള്ള ആഘോഷങ്ങളാണ് ​ഗൗരിയുടെ വീട്ടിൽ നടന്നത്. ഹൽദി,റിസപ്ഷൻ, പുടവ കൊടുക്കൽ ചടങ്ങ് എന്നിവയുടെ എല്ലാം വീഡിയോകൾ ​ഗൗരി ‌തന്റെ യുട്യൂബ് ചാനലിലൂടെ പങ്കുവെച്ചിരുന്നു.

പലപ്പോഴായി ​ഗൗരിയോടൊപ്പം വിവിധ സീരിയലുകളിൽ അഭിനയിച്ചിട്ടുള്ള ധന്യ മേരി വർ​ഗീസ് അടക്കമുള്ള താരങ്ങളും ​ഗൗരിയുടെ ഹൽദി, പുടവ കൊടുക്കൽ ചടങ്ങ് എന്നിവയിൽ പങ്കെടുക്കാൻ‌ എത്തിയിരുന്നു. ഹൽദിക്ക് പുറമെ മെഹന്ദി ചടങ്ങുകളും ​ഗൗരി കൃഷ്ണൻ ആഘോഷമായി നടത്തിയിരുന്നു. എല്ലാ ചടങ്ങുകളും താരനിബിഢമായിരുന്നു.

ഇക്കഴിഞ്ഞ ഫെബ്രുവരിയിൽ ആയിരുന്നു ​ഗൗരി കൃഷ്ണന്റേയും മനോജിന്റേയും വിവാഹ നിശ്ചയം നടന്നത്. ജനുവരിയിലായിരുന്നു ​ഗൗരി കൃഷ്ണൻ വിവാഹ നിശ്ചയ ചടങ്ങുകൾ നടത്താൻ തീരുമാനിച്ചത്.

എന്നാൽ പിന്നീട് ചെറുക്കനും കൂട്ടർക്കും കോവിഡ് പോസിറ്റീവ് ആയതിനാലാണ് നേരത്തെ നിശ്ചയിച്ച ദിവസം വിവാഹ നിശ്ചയം നടത്താൻ സാധിക്കാതിരുന്നത് എന്നാണ് പിന്നീട് ​ഗൗരി കൃഷ്ണൻ പറഞ്ഞത്. എല്ലാവരുടേയും ആരോ​ഗ്യ പ്രശ്നങ്ങൾ മാറിയതോടെ ഫെബ്രുവരിയിൽ വിവാഹ നിശ്ചയം നടത്തി.

വിവാഹ നിശ്ചയത്തിന് മണിക്കൂറുകൾക്ക് മുമ്പാണ് വരനെ ​ഗൗരി പ്രേക്ഷകർക്ക് പരിചയപ്പെടുത്തിയത്. വരൻ മനോജിനെ നോജ് സാർ എന്ന് ​ഗൗരി വിളിക്കുന്നത്. സാര്‍ വിളി ശീലിച്ച് പോയിയെന്നും മാറ്റാൻ സാധിക്കുന്നില്ലെന്നും ഗൗരി മുമ്പ് പറഞ്ഞിരുന്നു.

'ലൊക്കേഷനില്‍ വച്ച് അങ്ങനെ വിളിച്ചാണ് ശീലം. പെട്ടന്ന് ഒന്നും അത് മാറ്റാന്‍ കഴിയുന്നില്ല. മനോജ് സര്‍ എന്ന് തന്നെയാണ് ഇപ്പോഴും വിളിക്കുന്നത്. ഭാവിയില്‍ മാറിയേക്കാം' എന്നാണ് മുമ്പൊരിക്കൽ ​ഗൗരി പറഞ്ഞത്.

പൗര്‍ണമി തിങ്കള്‍ എന്ന സീരിയലില്‍ വിഷ്ണു വി നായരാണ് പ്രേംജിത്ത് ശങ്കര്‍ എന്ന നായക കഥാപാത്രത്തെ അവതരിപ്പിച്ചത്. തിരുവനന്തപുരം സ്വദേശിയാണ് ​ഗൗരിയുടെ വരൻ മനോജ്. 'അറേഞ്ച്ഡ് മ്യാരേജാണോയെന്ന് ചോദിച്ചാല്‍ ആദ്യം ആലോചനയുമായി അദ്ദേഹം വന്നത് എന്റെ അടുത്ത് തന്നെയാണ്.'

'ആ സമയത്ത് ഞാന്‍ കല്യാണം വേണോ വേണ്ടയോ എന്നൊക്കെ ആലോചിച്ച് ഇരിക്കുകയായിരുന്നു. എന്റെ സ്വഭാവം വെച്ചിട്ട് നമുക്ക് ഒരാളെ ബുദ്ധിമുട്ടിക്കാന്‍ പാടില്ലല്ലോ. അതെനിക്ക് നന്നായി അറിയാം. അതുകൊണ്ട് കല്യാണം വേണ്ട എന്ന ആറ്റിറ്റ്യൂഡില്‍ പോയി കൊണ്ടിരിക്കുകയായിരുന്നു.'

'പിന്നെ ആള്‍ക്ക് എന്റെ ക്യാരക്ടര്‍ നന്നായി മനസിലായിട്ടുണ്ട്. എനിക്ക് എന്റെ എല്ലാ ഇഷ്ടങ്ങളും കളഞ്ഞ് ജീവിക്കാന്‍ പറ്റില്ല. ഞങ്ങള്‍ വീട്ടില്‍ രണ്ട് പെണ്‍കുട്ടികളാണ്. അതുകൊണ്ട് എനിക്ക് അച്ഛനേയും അമ്മയേയും ഒറ്റയ്ക്ക് ആക്കാനും പറ്റില്ല. ആ കാര്യമായിരുന്നു എന്റെ ഉത്കണ്ഠ.'

'വിവാഹം കഴിക്കുന്നില്ലെന്ന തീരുമാനത്തിന് പിന്നിലും അതായിരുന്നു' വിവാഹ നിശ്ചയം കഴിഞ്ഞ ശേഷം പ്രണയത്തിലായതെങ്ങനെയെന്ന് ഒരിക്കൽ ​ഗൗരി വെളിപ്പെടുത്തി പറഞ്ഞത് ഇങ്ങനെയായിരുന്നു. വിവാഹ വീഡിയോ വൈറലായതോടെ നിരവധി പേരാണ് ​ഗൗരിക്ക് ആശംസകൾ നേർന്ന് എത്തുന്നത്.