പൃഥ്വിരാജ് 49 ലക്ഷം ടാക്‌സ് കൊടുത്തിരുന്നു; ആഡംബര കാര്‍ വാങ്ങുക മാത്രമല്ല ചെയ്യുന്നതെന്ന് നടി മല്ലിക സുകുമാരൻ

ഇന്നത്തെ പിള്ളേര് മനസ് കൊണ്ട് വലിയ ധൈര്യമുള്ളവരാണെന്നാണ് മല്ലിക സുകുമാരന്‍ പറയുന്നത്. പണ്ട് അങ്ങനെയായിരുന്നില്ല. അച്ഛനെ വെട്ടിച്ചാണ് ഞാന്‍ വുമന്‍സ് കോളേജില്‍ ഒറ്റയ്ക്ക് പോയി അഡ്മിഷന്‍ എടുത്തതെന്ന് മല്ലിക സുകുമാരന്‍ പറയുന്നു. മക്കളെ അവരുടെ സ്വാതന്ത്ര്യത്തിന് വളര്‍ത്താനും വിദേശത്ത് വിട്ട് പഠിപ്പിക്കാനൊക്കെ താന്‍ ശ്രമിച്ചതിനെ കുറിച്ചും മല്ലിക പറഞ്ഞു.

ഓസ്‌ട്രേയിലയില്‍ വിട്ട് ഞാന്‍ പൃഥ്വിരാജിനെ പഠിപ്പിച്ചിരുന്നു. അവിടെ പോയി ആദ്യത്തെ ദിവസം കിലോമീറ്ററുകള്‍ മഞ്ഞ് കൊണ്ട് നടന്നാണ് പൃഥ്വി അവന്റെ ഹോസ്റ്റല്‍ കണ്ടുപിടിച്ചത്. രണ്ടാമത്തെ ദിവസം അവന് പനി പിടിച്ചു. ഇതെല്ലാം ഒരു അമ്മയായ ഞാന്‍ നാട്ടിലിരുന്ന് കേള്‍ക്കുക മാത്രമാണ് ചെയ്തത്. ഞാനപ്പോഴും പതറിയില്ല. അങ്ങനെ പതറേണ്ട കാര്യമില്ല. ആ സാഹചര്യത്തില്‍ എന്റെ കുഞ്ഞ് തളര്‍ന്ന് പോവുമെന്നോ അവന് അത് മറികടക്കാന്‍ പറ്റില്ലെന്ന പേടിയോ എനിക്ക് ഇല്ലായിരുന്നു.

പൃഥ്വി ലംബോര്‍ഗിനി കാര്‍ വാങ്ങിയതിനെ കുറിച്ച് വന്ന ട്രോളുകളൊക്കെ ഞാന്‍ കണ്ടിരുന്നു. അതുപോലെ ഞാന്‍ ചെമ്പില്‍ കയറി വെള്ളത്തിലൂടെ പോയതിനെ കളിയാക്കിയതും കണ്ടു. ഇതൊക്കെ ഇടുന്നത് വളരെ സാഡിസ്റ്റായിട്ടുള്ള ആളുകളാണ്. എന്തൊക്കെ നല്ല കാര്യങ്ങള്‍ അവര്‍ക്ക് ചെയ്യാന്‍ പറ്റും. എന്തെങ്കിലും മിണ്ടിയാല്‍ തന്നെ വളരെ മോശമായി അഭിപ്രായം പറഞ്ഞാണ് ആളുകള്‍ വരുന്നത്.

ആഡംബര കാര്‍ വാങ്ങിയപ്പോള്‍ നാല്‍പ്പത്തിയെട്ടോ നാല്‍പത്തിയൊന്‍പത് ലക്ഷമോ മറ്റോ ആണ് രാജു ടാക്‌സ് ആയി കൊടുത്തത്. ഒരു സര്‍ക്കാര്‍ ഉദ്യോഗസ്ഥന്‍ എങ്കിലും ആ പൈസ നമുക്ക് കിട്ടുന്നതാണ്, ഇങ്ങനെ അവരെ ട്രോളരുതെന്ന് പറയുന്നുണ്ടോ? എന്നും മല്ലിക സുകുമാരന്‍ ചോദിക്കുന്നു. അതുപോലെ രാഷ്ട്രീയക്കാര്‍ ഇത്രയും മുടക്കി കാര്‍ വാങ്ങിച്ചാല്‍ ഇതുപോലെ കളിയാക്കത്തത് എന്തുകൊണ്ടാണ്. അവരെ പേടിയുള്ളത് കൊണ്ടല്ലേ എന്നുമാണ് മല്ലികയുടെ ചോദ്യം.