അമാലും ദുല്‍ഖറും കളിയാക്കി! സുലുചിരി നിര്‍ത്തിയില്ലെന്നും മമ്മൂട്ടി! മാമാങ്കത്തിലെ ലുക്കാണ് കാരണം!

സിനിമാതിരക്കുകള്‍ക്കിടയില്‍ കുടുംബത്തിന് തന്നെ മിസ്സാവരുതെന്ന് നിര്‍ബന്ധമുള്ളയാണ് മമ്മൂട്ടി. ഇക്കാര്യത്തെക്കുറിച്ച് അദ്ദേഹം മറ്റുള്ളവരേയും ബോധ്യപ്പെടുത്താറുണ്ട്. കുഞ്ഞുമറിയം വീട്ടിലുണ്ടെങ്കില്‍ വാപ്പച്ചിക്ക് പുറത്ത് പോവാന്‍ മടിയാണെന്ന് ദുല്‍ഖറും പറഞ്ഞിരുന്നു. മാമാങ്കത്തിലെ ലുക്ക് സംവിധായകന്‍ അയച്ചുതന്ന സമയത്ത് താന്‍ വീട്ടിലായിരുന്നുവെന്ന് മമ്മൂട്ടി പറയുന്നു. അമാലും ദുല്‍ഖറുമൊക്കെ അപ്പോള്‍ അരികിലുണ്ടായിരുന്നു.

തന്‍റെ പുതിയ ലുക്ക് കാണിച്ചതും അവര്‍ നിര്‍ത്താതെ ചിരിക്കുകയായിരുന്നു. 5 മിനിറ്റോളം ആ ചിരി നീളുകയായിരുന്നു. ഈ ലുക്ക് കണ്ടപ്പോള്‍ ആദ്യം തനിക്കും ചിരി വന്നിരുന്നുവെന്നും അദ്ദേഹം പറയുന്നു. അവര്‍ ഈ ഫോട്ടോ സുല്‍ഫത്തിനെയും കാണിച്ചിരുന്നു. ചിരിയായിരുന്നു പ്രതികരണം. കാരണമന്വേഷിച്ചപ്പോള്‍ അവര്‍ അതിനുള്ള കാരണവും പറഞ്ഞുതന്നിരുന്നു. ആ സംശയത്തിന് കൃത്യമായ മറുപടിയും മെഗാസ്റ്റാര്‍ നല്‍കിയിട്ടുണ്ട്.

ഇങ്ങനെ മേക്കപ്പ് ചെയ്ത വാപ്പച്ചിക്ക് ആ മീശയും താടിയും കൂടി എടുത്തൂടായിരുന്നോയെന്നായിരുന്നു അവര്‍ ചോദിച്ചത്. എന്നാല്‍ അങ്ങനെ ചെയ്യാതിരുന്നതിന് പിന്നിലൊരു കാരണമുണ്ടായിരുന്നു. സിനിമ കാണുമ്പോള്‍ നിങ്ങള്‍ക്ക് ഇതേക്കുറിച്ച് മനസ്സിലാവുമെന്നായിരുന്നു താരത്തിന്‍റെ മറുപടി. ഇതേ ചോദ്യമായിരുന്നു ആരാധകരും ചോദിച്ചത്. നിലവിലെ ലുക്ക് നിലനിര്‍ത്തി സ്ത്രൈണ ഭാവം പരീക്ഷിക്കുകയായിരുന്നു സംവിധായകനും സംഘവും. മമ്മൂട്ടിക്കും ആ ലുക്ക് ഇഷ്ടമായതോടെയാണ് അത് തീരുമാനിച്ചതെന്നും അണിയറപ്രവര്‍ത്തകര്‍ വ്യക്തമാക്കിയിരുന്നു.

ഇതായിരുന്നു കഴിഞ്ഞ ദിവസം സോഷ്യല്‍ മീഡിയയിലൂടെ വൈറലായി മാറിയ ലുക്ക്. കണ്ണെഴുതി ചുവന്ന പൊട്ടും വെച്ച് മുടിയും മുന്നിലിട്ട് നില്‍ക്കുന്ന ചിത്രമായിരുന്നു പുറത്തുവന്നത്. പുതിയ ലക്കം വനിതയുടെ കവര്‍പേജായാണ് ചിത്രം പുറത്തുവിട്ടത്. മാമാങ്കത്തെക്കുറിച്ചുള്ള പ്രതീക്ഷകള്‍ വാനോളമുയര്‍ത്തുന്ന തരത്തിലുള്ള പോസ്റ്ററായിരുന്നു പുറത്തുവന്നത്. പ്രാചി തെഹ്ലാനും അനു സിത്താരയുമുള്‍പ്പടെ നാല് നായികമാരാണ് ചിത്രത്തിനായി അണിനിരന്നിട്ടുള്ളത്. ഉണ്ണി മുകുന്ദന്റെ കരിയര്‍ ബ്രേക്ക് ചിത്രമായി ഈ സിനിമ മാറുമെന്ന് മമ്മൂട്ടിയും വ്യക്തമാക്കിയിരുന്നു.