'രണ്ട് കുട്ടികളുടെ അമ്മയല്ലേ? മാന്യമായി വസ്ത്രം ധരിക്കൂ!'; പരിഹസിച്ചവർക്ക് മറുപടി നൽകി ഭീഷ്മപർവം നായിക അനസൂയ

മമ്മൂട്ടി ചിത്രമായ ഭീഷ്മപർവത്തിൽ ആലീസ് എന്ന കഥാപാത്രത്തെയാണ് അനസൂയ അവതരിപ്പിച്ചത്. അവർഡ് നിശകളിലും ഫോട്ടോഷൂട്ടുകളിലുമെല്ലാം ​ഗ്ലാമറാസായും അനസൂയ പ്രത്യക്ഷപ്പെടാറുണ്ട്. അനസൂയ മോഡേൺ വസ്ത്രങ്ങൾ ധരിക്കുന്നതാണ് ഓൺലൈൻ ആങ്ങളമാരെ പ്രകോപിപ്പിച്ചിരിക്കുന്നത്. ഒട്ടും ദയയില്ലാത്ത വാക്കുകൾ ഉപയോ​ഗിച്ചാണ് അനസൂയയുടെ ചിത്രങ്ങൾക്ക് വരുന്ന കമന്റുകൾ. അവസാനം സഹിക്കവയ്യാതെയാണ് അനസൂയ ഇത്തരക്കാർ‌ക്കുള്ള മറുപടി നൽകിയിരിക്കുന്നത്. രണ്ട് കുട്ടികളുടെ അമ്മയായിട്ടും ഇറക്കം കുറഞ്ഞ വസ്ത്രങ്ങളാണ് അനസൂയ ധരിക്കുന്നതെന്നും തെലുങ്ക് സ്ത്രീ സമൂഹത്തിന് അനസൂയ അപമാനമാണെന്നുമായിരുന്നു ഒരു കമന്റ്.

പൊതുവെ നെ​ഗറ്റിവിറ്റി ശ്രദ്ധിക്കാത്ത അനസൂയ പക്ഷെ കുറിക്കുകൊള്ളുന്ന മറുപടിയാണ് നൽകിയിരിക്കുന്നത്. 'നിങ്ങളുടെ ചിന്താ പ്രക്രിയ മുഴുവൻ പുരുഷ സമൂഹത്തിനും നാണക്കേടാണ്. നിങ്ങൾ നിങ്ങളുടെ കാര്യം നോക്കിയാൽ മതി. എന്നെ നോക്കാൻ എനിക്കറിയാം' എന്നാണ് പരിഹസിച്ച വ്യക്തിക്ക് മറുപടിയായി അനസൂയ കുറിച്ചത്. കുറച്ച് പുരുഷന്മാർക്ക് ഇനിയും വിദ്യാഭ്യാസം നൽകേണ്ടത് ആവശ്യമാണെന്നും സ്ത്രീകൾക്ക് അവരുടേതായ താൽപ്പര്യങ്ങളും ജീവിതവും ഉണ്ടെന്നും അത് മാനിക്കണമെന്നും പലർക്കും അറിയില്ലെന്നും അനസൂയ കുറിച്ചു.

ഒരു സ്ത്രീയെ അവളുടെ വസ്ത്രം നോക്കി വിലയിരുത്തുന്നത് ഒരിക്കലും അവസാനിക്കാത്ത വിഷയമാണെന്നും സെലിബ്രിറ്റികളെ ലക്ഷ്യമിടുന്നത് ആളുകൾ തുടരുകയാണെന്നും എല്ലാത്തിനും സെലിബ്രിറ്റികൾ വിശദീകരണം നൽകണമെന്ന അവസ്ഥയാണുള്ളതെന്നും അനസൂയ പറഞ്ഞു. ബി​ഗ് ബോസ് അടക്കം നിരവധി പരിപാടികളുടെ ഭാ​ഗമായിട്ടുള്ള അനസൂയ ആദ്യമായിട്ടാണ് മലയാള സിനിമയിൽ അഭിനയിച്ചത്. ഭീഷ്മപർവം വലിയ ഹിറ്റായതോടെ അനസൂയയും ശ്രദ്ധിക്കപ്പെട്ട് തുടങ്ങി. അമൽ നീരദ് സംവിധാനം ചെയ്ത ഭീഷ്മ പർവത്തിൽ മമ്മൂട്ടിയുടെ സുഹൃത്തായിട്ടാണ് അനസൂയയുടെ കഥാപാത്രം എത്തിയത്. മാർച്ച് മൂന്നിന് തിയറ്ററുകളിലെത്തിയ ഭീഷ്മ പർവം കേരളത്തിന് പുറത്തേക്കും വലിയ തരംഗമാണ് സൃഷ്ടിച്ചത്.

Recommended Video

ബിഗ് ബോസിൽ ഒരാഴ്ച നടന്നത് | Janaki Sudheer Exclusive Interview | Bigg Boss Malayalam FilmiBeat

സമീപകാലത്ത് ഏറ്റവും വലിയ പ്രീ റിലീസ് ഹൈപ്പുമായി എത്തിയ ചിത്രമായിരുന്നു ഭീഷ്മപർവം. ബിഗ് ബി പുറത്തിറങ്ങി 15 വർഷത്തിന് ശേഷം അമൽ നീരദും മമ്മൂട്ടിയും ഒന്നിക്കുന്ന ചിത്രം എന്നതുതന്നെ ആയിരുന്നു ഈ ഹൈപ്പിന് കാരണം. ഷൈൻ ടോം ചാക്കോ, ഫർഹാൻ ഫാസിൽ, ശ്രീനാഥ് ഭാസി, സൗബിൻ ഷാഹിർ, ദിലീഷ് പോത്തൻ, അബു സലിം, സുദേവ് നായർ, ഷെബിൻ ബെൻസൺ, ലെന, ശ്രിന്ദ, ജിനു ജോസഫ്, അനഘ, വീണ നന്ദകുമാർ, മാലാ പാർവതി തുടങ്ങി വലിയ താരനിരയാണ് ചിത്രത്തിൽ അണിനിരന്നത്. ഏപ്രിൽ ഒന്നിന് ചിത്രം ഡിസ്‌നി പ്ലസ് ഹോട്‌സ്റ്റാറിലൂടെ ഒടിടിയിലും റിലീസ് ചെയ്തു.