22 വര്‍ഷങ്ങള്‍ക്ക് ശേഷം വീണ്ടും ആ കോണിപ്പടി കയറി മഞ്ജു, നന്ദി പറഞ്ഞ് താരം, വീഡിയോ വൈറൽ

22 വർഷങ്ങൾക്ക് ശേഷമാണ് മഞ്ജു വീണ്ടും അതേ കോണിപ്പടികൾ കയറുകയാണ്. ചതുർമുഖം എന്ന സിനിമയുടെ ചിത്രീകരണവുമായി ബന്ധപ്പെട്ടാണ് വീണ്ടു അവിടെ എത്തിയിരിക്കുന്നത്. 22 വർഷം കൊണ്ട് താരത്തിന് ഏറെ മാറ്റമുണ്ടെങ്കിൽ ആ സ്റ്റെപ്പുകൾക്ക് വലിയ മാറ്റമൊന്നുമില്ല. തിരുവനന്തപുരം വേളി യൂത്ത് ഹോസ്റ്റൽ ആണ് ലൊക്കേഷൻ.

പഴയ ഓർമകളിലേയ്ക്ക് മടങ്ങി പോകുകയാണ് മഞ്‍ജു. സോഷ്യൽ മീഡിയയിൽ ഒരു വീഡിയോ പോസ്റ്റ് ചെയ്തു കൊണ്ടാണ് 22 വർഷം പിന്നിലേയ്ക്ക് താരം സ‍ഞ്ചരിച്ചത്. നീല നിറത്തിലുളള നെറ്റി ധരിച്ച് ഒരു വശത്തേയ്ക്ക് പിന്നിയിട്ട മുടിയും പിടിച്ച് സങ്കടത്താൽ കോണി കയറുന്ന ആരതിയേയു ജീൻസും ടീ ഷർട്ടും ധരിച്ച് ചിരിച്ച് ഉല്ലസിച്ച് പടവുകൾ ചവിട്ട് കയറുന്ന ഇപ്പോഴത്തെ മ‍ഞ്ജുവുമാണ് വീഡിയോയിൽ കാണാൻ കഴിയുന്നത്. 22 വർഷങ്ങൾ, 1998 ഇതേ ദിവസം തന്നെയാണ് പ്രണയവർണ്ണങ്ങൾ ചിത്രം റിലീസ് ചെയ്തത് ഈ വീഡിയോയിലൂടെ തന്നെ പഴയ ഓർമകളിലേയ്ക്ക് കൂട്ടിക്കൊണ്ടു പോയതിന് രാജീവ് ഫ്രാൻസിസിന് നന്ദി- എന്ന് കുറിച്ച് കൊണ്ടായിരുന്നു വീഡിയോ പോസ്റ്റ് ചെയ്തിരിക്കുന്നത്.

സോഷ്യൽ മീഡിയയിൽ പങ്കുവെച്ച വീഡിയോയ്ക്ക് മികച്ച പ്രേക്ഷക സ്വീകാര്യതയാണ് ലഭിക്കുന്നത്. 22 വർഷമായെന്ന് വിശ്വസിക്കാൻ കഴിയുന്നില്ലെന്നും, ഇപ്പോൾ വീണ്ടും സുന്ദരിയായെന്നും ആരാധകർ പറയുന്നുണ്ട്. രഞ്ജിത് കമല ശങ്കറും സലീ വിയും ചേർന്ന് സംവിധാനം ചെയ്യുന്ന ചിത്രമാണ് ചതുർമുഖം. ഒരു ഹൊറർ ത്രില്ലർ ചിത്രമാണിത്. സണ്ണി വെയ്നും ചിത്രത്തിൽ പ്രധാന കഥാപാത്രത്തെ അവതരിപ്പിക്കുന്നുണ്ട്. ചിത്രത്തിന്റെ ഷൂട്ടിങ് പുരോഗമിക്കുകയാണ്.