ആകാശഗംഗ 2 ല്‍ മയൂരി! ഗംഗയെ വീണ്ടും മടക്കി കൊണ്ടു വന്നതിനെ കുറിച്ച് വിനയൻ....

ദിവ്യ ഉണ്ണി അവതരിപ്പിച്ച കഥാപാത്രമായ മായയും ഉണ്ണിയും തമ്മിൽ ഒന്നാകുന്നതോടെയാണ് ആകാശ ഗംഗ ആദ്യ ഭാഗം അവസാനിക്കുന്നത്. മായയുടെ മകളിലൂടെയാണ് രണ്ടാം ഭാഗം തുടങ്ങുന്നത്.മായയുടെ 20 വയസ്സായ മകളുടെ ജീവിതമാണ് ആകാശഗംഗ 2 പറയുന്നത്. മായയുടെ എം.ബി.ബി.എസിന് പഠിക്കുന്ന മകള്‍ കൂട്ടുകാരുമൊത്ത് തറവാട്ടിലേക്ക് വരുന്നതും തുടര്‍ന്നുണ്ടാകുന്ന സംഭവങ്ങളാണ് ചിത്രത്തിൽ- വിനയൻ പറഞ്ഞു.

ആദ്യഭാഗത്തിൽ പ്രേക്ഷകരെ പേടിയുടെ മുൾമുനയിൽ നിർത്തിയ കഥാപാത്രമായിരുന്നു ഗംഗ. ഗംഗയെ അവതരിപ്പിച്ചത് മയൂരിയായിരുന്നു. രണ്ടാം ഭാഗത്തിൽ മയൂരിയേയും റിക്രിയേറ്റ് ചെയ്തിട്ടുണ്ട്. ഗ്രാഫിക്സിന്റെ സഹായത്തോടെയാണ് മയൂരി അവതരിപ്പിച്ച ഗംഗ എന്ന കഥാപാത്രത്തെ വർഷങ്ങൾക്ക് ശേഷം വീണ്ടും റിക്രിയേറ്റ് ചെയ്തിരിക്കുന്നു-വിനയൻ കൂട്ടിച്ചേർത്തു. അന്ന് ആകാശഗംഗ ചെയ്യുമ്പോള്‍ ഗ്രാഫിക്‌സിന്റെയോ ഡി.ടി.എസിന്റെയോ സാധ്യതകള്‍ ഉണ്ടായിരുന്നില്ല.ഇന്ന് അത്തരം ടെക്നോളജിയുടെ എല്ലാം ഉൾപ്പെടുത്തിയാണ് രണ്ടാം ഭാഗം ഒരുക്കിയിരിക്കുന്നത്.

മുതിർന്ന താരങ്ങളും പുതുമുഖ താരങ്ങളും ആകാശഗംഗ2 ൽ എത്തുന്നുണ്ട്.ആദ്യ ചിത്രത്തില്‍ അഭിനയിച്ച നവാസ്, ഇടവേള ബാബു എന്നിവർ മാത്രമാണ് ആകാശഗംഗ ആദ്യഭാഗത്തിൽ നിന്നുള്ളത്. രമ്യാകൃഷ്ണന്‍, ആരതി, ശ്രീനാഥ് ഭാസി, സലീം കുമാര്‍, വിഷ്ണു വിനയ്, ഹരീഷ് കണാരന്‍, പ്രവീണ, ധര്‍മജന്‍ ബോള്‍ഗാട്ടി, വിഷ്ണു ഗോവിന്ദ് എന്നിവരാണ് മറ്റ് താരങ്ങൾ.

ആദ്യഭാഗത്തിലെ പോലെ രണ്ടാംഭാഗത്തിലും ഭീതി ജനിപ്പിക്കുന്ന രംഗങ്ങൾ ആകാശഗംഗ2 ലും ഒരുക്കിയിട്ടുണ്ട്. പുറത്തു വന്ന ചിത്രത്തിന്റെ ഫസ്റ്റ്ലുക്ക് പോസ്റ്ററും ടീസറും ട്രെയിലറിൽ നിന്നും ഇത് വ്യക്തമാണ്. ചിത്രം നവംബർ മാസത്തിൽ തിയേറ്ററുകളിൽ എത്തും. ആകാശംഗംഗയ്ക്കായി പ്രേക്ഷകർ ആകംക്ഷയോടെയാണ് കാത്തിരിക്കുന്നത്.