പേരും മതവും മാറി സാക്ഷിയായി, വിവാദ വിവാഹവും അറസ്റ്റ് വാറണ്ടും, അന്നത്തേക്കാൾ ചെറുപ്പം; രസ്നയുടെ പുതിയ വിശേഷം

കുടുംബപ്രേക്ഷകർക്ക് പ്രത്യേകിച്ച് വീട്ടമ്മമാരായ സ്ത്രീകൾക്ക് സിനിമാ താരങ്ങളെക്കാൾ സുപരിചിതർ മിനിസ്ക്രീൻ താരങ്ങളാകും. പ്രത്യേകിച്ച് സീരിയൽ അഭിനേതാക്കളും റിയാലിറ്റി ഷോ മത്സരാർത്ഥികളും. നിരവധി മെ​ഗാ ഹിറ്റ് സീരിയലുകൾ സമ്മാനിച്ചിട്ടുള്ള ചാനലാണ് ഏഷ്യാനെറ്റ്. അക്കൂട്ടത്തിൽ ഒന്നാണ് ഒരു സമയത്ത് ടിആർപി റേറ്റിങിൽ മുന്നിൽ നിന്നിരുന്ന പാരിജാതം എന്ന സീരിയൽ.

2008 മുതൽ 2011 വരെയുള്ള കാലഘട്ടത്തിലാണ് പാരിജാതം ഏഷ്യനെറ്റിൽ സംപ്രേഷണം ചെയ്തിരുന്നത്. സീമയേയും അരുണയേയും ജെപിയേയും ആന്റിയമ്മയേയും ഒന്നും പ്രേക്ഷകർ ഇന്നും മറന്നിട്ടില്ല. 500 എപ്പിസോഡുകൾ സീരിയലിന്റേതായി സംപ്രേഷണം ചെയ്തിരുന്നു. സീരിയലിൽ നായിക വേഷം ചെയ്തത് നടി രസ്നയായിരുന്നു. അന്ന് ഇരുപത് വയസ് പോലും രസ്നയ്ക്ക് പ്രായമുണ്ടായിരുന്നില്ല.

Photo Credit: Actress Rasna / Instagram

എന്നിട്ടും വളരെ പക്വതയോടെ പാരിജാതത്തിൽ സീമ, അരുണ എന്നീ കഥാപാത്രങ്ങളെ അവതരിപ്പിച്ചു. ആറാം ക്ലാസിൽ പഠിക്കുമ്പോഴാണ് രസ്ന ക്യാമറയ്ക്ക് മുന്നിലേക്ക് എത്തിയത്. മ്യൂസിക്ക് ആൽബങ്ങളിലൂടെയായിരുന്നു തുടക്കം. ഷാജു ശ്രീധറിന്റെ സംഗീത ആൽബങ്ങളിൽ സജീവ സാന്നിധ്യമായിരുന്നു. യുട്യൂബും സോഷ്യൽമീഡിയയും സജീവമല്ലാത്ത കാലമായിരുന്നിട്ട് കൂടിയും രസ്നയുടെ ആൽബങ്ങൾ എല്ലാം ഹിറ്റായി.

അതോടെ സീരിയലിലേക്ക് അവസരം വരാൻ തുടങ്ങി. അമ്മക്കായ് ആയിരുന്നു ആദ്യ സീരിയൽ. സീരിയലുകളിൽ അഭിനയിച്ച് തുടങ്ങുമ്പോൾ പത്താം ക്ലാസ് വിദ്യാർത്ഥിനിയാണ് രസ്ന. പിന്നീട് പാരിജാതത്തിലെ നായിക വേഷം രസ്നയിലേക്ക് വന്നെത്തി. ബെജു ദേവരാജാണ് പാരിജാതം സംവിധാനം ചെയ്തത്.

മലയാള സീരിയൽ മേഖലയിൽ നിരവധി ഹിറ്റ് സീരിയലുകൾ ഒരുക്കിയിട്ടുള്ള സംവിധായകന്റെ കൂടെ പ്രവർത്തിച്ചതോടെ രസ്നയിലെ അഭിനേത്രിക്ക് കൂടുതൽ സ്വീകാര്യത ലഭിച്ചു. പാരിജാതത്തിനുശേഷം സിന്ദൂരച്ചെപ്പ്, വൃന്ദാവനം, വധു, നന്ദനം തുടങ്ങിയ സീരിയലുകളിലും രസ്ന അഭിനയിച്ചിരുന്നു. സീരിയലുകൾ‌ക്ക് പുറമെ ചോക്ലേറ്റ്, കാര്യസ്ഥൻ, വെള്ളരിപ്രാവിന്റെ ചങ്ങാതി തുടങ്ങിയ സിനിമകളിലും ചെറിയ വേഷങ്ങളിൽ നടി അഭിനയിച്ചു.

വിവാഹത്തോടെ എല്ലാവരേയും പോലെ രസ്നയും അഭിനയം ഉപേക്ഷിച്ചു. മലയാളത്തിന് പുറമെ അന്യഭാഷകളിലും സാന്നിധ്യം അറിയിച്ചിട്ടുള്ള രസ്ന സീ​രിയൽ സംവിധായകൻ ബൈജു ​ദേവരാജിനെയാണ് വിവാഹം ചെയ്തത്. അതൊരു പ്രണയ വിവാഹമായിരുന്നു. മാത്രമല്ല വലിയ വിവാദങ്ങൾക്ക് വഴിവെച്ച വിവാഹവുമായിരുന്നു.

Photo Credit: Actress Rasna / Instagram

ബൈജു ദേവരാജ് രസ്നയെ പ്രണയിക്കുമ്പോൾ വിവാഹിതനും രണ്ട് പെൺക്കുട്ടികളുടെ അച്ഛനുമായിരുന്നു. മാത്രമല്ല രസ്നയുമായി പ്രായത്തിലും നല്ല വ്യത്യാസമുണ്ടായിരുന്നു. രസ്നയുടെ കുടുംബവും വിവാ​ഹത്തിന് എതിരായിരുന്നു. പക്ഷെ വിമർശനവും എതിർപ്പും മറന്ന് ഇരുവരും വിവാഹിതരായി. ഇന്ന് രണ്ട് കുട്ടികളുടെ അമ്മയാണ് രസ്ന. ഒപ്പം നല്ലൊരു കുടുംബിനിയും. ബൈജു ജീവിതത്തിലേക്ക് വന്നശേഷം പേരും മതവും നടി മാറി.

സാക്ഷി ബി ദേവരാജാണ് ഇപ്പോൾ രസ്ന. നടി മുസ്ലീം കുടുംബാം​ഗമായിരുന്നു. പാരിജാതം ചെയ്യുന്ന സമയത്ത് പിതാവുമായുള്ള ഉമ്മയുടെ പ്രശ്നത്തിന്റെ പേരിൽ രസ്നയ്ക്കെതിരെ അറസ്റ്റ് വാറണ്ട് വരെ ഇറങ്ങിയിരുന്നു. അഭിനയത്തിൽ നിന്നും വിട്ടുനിൽക്കുകയാണെങ്കിലും സോഷ്യൽമീഡിയ വഴി ഇടയ്ക്കിടെ സ്വന്തം വിശേഷങ്ങൾ നടി പങ്കുവെക്കാറുണ്ട്.

കഴിഞ്ഞ ദിവസം പട്ടുസാരിയും ആഭരണങ്ങളും അണിഞ്ഞ് സിന്ദൂരം ചാർത്തി മുല്ലപ്പൂവ് ചൂടി നിൽക്കുന്ന ചിത്രം രസ്ന പങ്കുവെച്ചിരുന്നു. മെഹന്തിയണിഞ്ഞ കൈകൾകൊണ്ട് പാതിമുഖം മറച്ച് നിൽക്കുന്ന രസ്നയാണ് ചിത്രത്തിലുള്ളത്.

അന്നത്തേക്കാൾ ചെറുപ്പം ഇന്ന് രസ്നയിൽ കാണാം. പ്രായം കുറഞ്ഞ് വരികയാണെന്നും അതീവ സുന്ദരിയായിരിക്കുന്നുവെന്നുമാണ് കമന്റുകൾ. സീരിയൽ താരങ്ങളായ അശ്വതിയും അമ്പിളി ദേവിയും എല്ലാം പഴയ സഹപ്രവർത്തകയുടെ സൗന്ദര്യത്തെ വർണിച്ച് കമന്റുകൾ കുറിച്ചിട്ടുണ്ട്. ഒരു അഭിമുഖത്തിൽ രസ്ന പ്രത്യക്ഷപ്പെട്ടിട്ട് വരെ വർഷങ്ങൾ ഏറെയായി.