ഇച്ചിരി പൊങ്ങച്ചവും വീമ്പുമൊക്കെ പറയുന്ന ആളാണ്! സുരാജിനോട് ആദ്യമേ സഹായം ചോദിച്ചെന്ന് മിയ ജോര്‍ജ്

കണ്ണും പൂട്ടി ജോയിന്‍ ചെയ്ത പ്രോജക്ടാണ് ഡ്രൈവിങ് ലൈസന്‍സ്. സിനിമ വരുന്നുണ്ടെന്ന് ആദ്യം കേട്ടിരുന്നുവെങ്കിലും ഞാന്‍ അതില്‍ ഭാഗമാവുമെന്ന് കരുതിയിരുന്നേയില്ല. പക്ഷേ വിൡവന്നപ്പോള്‍ ഹാപ്പി. എല്ലാവരും എനിക്ക് നേരത്തെ അറിയാവുന്ന ആളുകളായിരുന്നു. സ്‌ക്രിപ്റ്റ് കൈയില്‍ കിട്ടിയതോടെ ആത്മവിശ്വാസം ഇരട്ടിയായി.

കുരുവിളയുടെ ഭാര്യ എല്‍സ ഇച്ചിരി പൊങ്ങച്ചവും വീമ്പുമൊക്കെ പറയുന്ന കഥാപാത്രമാണ്. ഓവറാണെന്ന് ആരെ കൊണ്ടും പറയിപ്പിക്കാതിരിക്കുക ആയിരുന്നു എന്റെ ശ്രമം. ഓവറാക്കി ചളമാക്കരുതെന്ന് നിര്‍ബന്ധമുണ്ടായിരുന്നു. ജീന്‍ ചേട്ടന്‍ ഇക്കാര്യത്തില്‍ കൃത്യമായി ഗൈഡ് ചെയ്തിരുന്നു. സിനിമ കണ്ടിറങ്ങി ഒരുപാട് പേര്‍ എല്‍സയെ കുറിച്ച് സംസാരിച്ചുവെന്നും മിയ പറയുന്നു.

ഇതുവരെ ചെയ്ത് ശീലമില്ലാത്ത കഥാപാത്രമായിരുന്നു എല്‍സ. അത് കൊണ്ട്് തന്നെ സുരാജേട്ടനോട് എന്നെ ഹെല്‍പ് ചെയ്യണമെന്ന് പറഞ്ഞിരുന്നു. അസാധ്യ ടൈമിങും കോമഡി സെന്‍സുമുള്ള ആളാണ് സുരാജേട്ടന്‍. ഓരോ ഷോട്ടിലും അദ്ദേഹത്തിന്റെ സജഷന്‍ ഉണ്ടായിരുന്നു. ശരിക്കും ഒരു ഗിവ് ആന്റ് ടേക്ക് ആണ് ഒന്നിച്ചുള്ള സീനുകള്‍ മനോഹരമാക്കാന്‍ കാരണം. പിന്നെ എല്‍സയുടെ നോട്ടം, ഭാവം, എല്ലാത്തിനെയും കുറിച്ച് ജീന്‍ ചേട്ടന് നല്ല കൃത്യത ഉണ്ടായിരുന്നു.

എല്‍സയെ കുറിച്ച് ഇപ്പോഴും പ്രേക്ഷകര്‍ പറയുന്നുണ്ടെങ്കില്‍ അത് അവരുടെ ക്രെഡിറ്റാണ്. അതിഥി വേഷത്തിലാണെങ്കിലും അല്‍ മല്ലുവാണ് മിയയുടേതായി തിയറ്ററുകളില്‍ ഉടനെത്തുന്നത്. ഗുരുസ്ഥാനിയനായ ബോബന്‍ സാമുവല്‍ സാര്‍ വിളിച്ചപ്പോള്‍ പിന്നൊന്നും നോക്കാനില്ലായിരുന്നുവെന്നും മിയ പറയുന്നു. പോലീസ് ഓഫീസറുടെ റോളില്‍ മിയ അഭിനയിക്കുന്ന 'കാണ്‍മാനില്ല' എന്ന സിനിമയും ഉടന്‍ റിലീസ് ചെയ്യുമെന്നാണ് അറിയുന്നത്.