'എല്ലാ മാമന്മാരും ആ​ഗ്രഹിക്കും ഇതുപോലെ ഒരു മരുമോനെ', മിന്നൽ മുരളിയുടെ സ്വന്തം ജോസ്മോൻ!

ലവ് ആക്ഷൻ ​ഡ്രാമ എന്ന ചിത്രത്തിൽ അജു വർ​ഗീസിന്റെ കുട്ടിക്കാലം അവതരിപ്പിച്ച മാസ്റ്റർ വസിഷ്ട് ഉമേഷാണ് ചിത്രത്തിൽ ജോസ് മോന്റെ വേഷം കൈകാര്യം ചെയ്തിരിക്കുന്നത്. സിനിമയിലുട നീളം മാമന്റെ വലം കൈയ്യായി നിന്ന് പ്രവർത്തിക്കുന്ന ജോസ് മോനെ പോലൊരു മരുമോൻ തങ്ങൾക്കും ഉണ്ടായിരുന്നെങ്കിൽ എന്ന് ഏതൊരു മാമനും ആ​ഗ്രഹിച്ച് പോകും. കുടുക്ക് പൊട്ടിയ കുപ്പായം എന്ന പാട്ടിലെ വസിഷ്ടിന്റെ പ്രകടനം കണ്ടിട്ടാണ് ബേസിൽ സിനിമയിലേക്ക് ക്ഷണിച്ചത്. ഒരു പാട്ടിലെ ചെറിയ സീൻ കണ്ട് തന്നെ ശ്രദ്ധിച്ച് ഓഡീഷന് വിളിച്ച് അവസരം നൽകിയ ബേസിലിനോട് എന്നും താൻ കടപ്പെട്ടിരിക്കുമെന്നാണ് വസിഷ്ട് പറയുന്നത്. ആറാം ക്ലാസുകാരനായ വസിഷ്ട് നാടകങ്ങളിലൂടെയാണ് കലാരം​ഗത്തേക്ക് എത്തിയത്. വലിയൊരു അനുഭവം സമ്മാനിച്ച സിനിമയായിരുന്നു മിന്നൽ മുരളി എന്നാണ് വസിഷ്ട് പറയുന്നത്.

ഷൊർ‍ണൂർ സ്വദേശിയായ വസിഷ്ട് മിന്നൽ മുരളി ലൊക്കേഷനിൽ നിന്നെത്തി എൽഎസ്എസ് പരീക്ഷയെഴുതി സ്കോളർഷിപ്പ് കരസ്ഥമാക്കിയിരുന്നു. മിന്നൽ മുരളിക്ക് ശേഷം നിരവധി സിനിമകളിലേക്ക് വസിഷ്ടിന് വിളി വരുന്നുമുണ്ട്. 'ഓഡീഷന് പോയി ഡയലോ​ഗ് പറഞ്ഞപ്പോൾ തന്നെ ബേസിൽ മാമൻ എന്നെ ഫിക്സ് ചെയ്തിരുന്നു. അന്ന് പോയപ്പോൾ ടൊവിനോ മാമനെ കാണാൻ സാധിച്ചില്ല. പിന്നീട് ലൊക്കേഷനിൽ വെച്ച് കണ്ടു. വളരെ പാവമാണ്. ഒരുമിച്ച് അഭിനയിച്ചപ്പോൾ സന്തോഷം തോന്നി. ടൊവിനോ മാമനും മിന്നൽ മുരളി ടീമിനൊപ്പവും പ്രമോഷന് പോകാൻ പറ്റിയിരുന്നു. ഏറ്റവും കൂടുതൽ സന്തോഷം തോന്നിയത് യുവരാജ് സിങ് മാമനേയും റെസ്ലിങ് താരം ​ഗ്രേറ്റ് ഖാലി മാമനേയും നേരിട്ട് കാണാൻ സാധിച്ചപ്പോഴാണ്. ​ഗ്രേറ്റ് ഖാലിയെ കണ്ടപ്പോൾ ആദ്യം പേടി തോന്നി. നല്ല പൊക്കമാണ്‌. ഇത്രയും മുഴുനീള കഥാപാത്രം തന്നതിന് ബേസിൽ മാമനോടാണ് നന്ദി പറയാനുള്ളത്. യുവരാജ് സിങ് മാമനെ കാണാൻ പോയപ്പോൾ ബുദ്ധിമുട്ടായി തോന്നിയത് ഇം​ഗ്ലീഷ് ആണ്. ഞാൻ മലയാളം മീഡിയത്തിലെ വിദ്യാർഥിയാണ്' വസിഷ്ട് പറയുന്നു.

Recommended Video

Minnal Murali Movie Review By RRR |Tovino Thomas | Basil Joseph | Netflix India

ഭാവിയിൽ നടനാകണമെന്ന് ആ​ഗ്രഹമുള്ളതായും വസിഷ്ട് പറയുന്നു. മിന്നൽ മുരളി കണ്ട് നിരവധി പേർ നന്നായിരുന്നുവെന്ന് പറഞ്ഞിരുന്നുവെന്നും വസിഷ്ട് പറയുന്നു. മിന്നൽ മുരളിയിലെ പ്രകടനം കണ്ട് നിരവധി അവസരങ്ങളാണ് ഇപ്പോൾ വസിഷ്ടിനെ തേടി എത്തുന്നത്. വാണിയംകുളം ടിആർകെ സ്കൂള് അധ്യാപകനായ പി. ഉമേഷിൻറേയും അധ്യാപിക സി.ജ്യോതിയുടേയും മകനാണ് വസിഷ്ട്. മിന്നൽ മുരളിയുടേതായി പുറത്തിറങ്ങിയ പോസ്റ്ററുകളിലും ടീസറിലും ട്രെയ്‍ലറിലും പ്രൊമോ വീഡിയോകളിലുമൊക്കെ ടൊവിനോയോടൊപ്പം വസിഷ്ടും തിളങ്ങിയിരുന്നു. സിനിമ ഒടിടി റിലീസ് ആയിരുന്നതിനാൽ സിനിമ കണ്ട് ശേഷം പലരും തിയേറ്റർ അനുഭവം നഷ്ടപ്പെട്ടതിനെ കുറിച്ച് പരാതിപ്പെടുന്നുണ്ട്. ബേസിൽ സംവിധാനത്തിലേക്ക് ഇറങ്ങിയ ശേഷം പുറത്തിറങ്ങുന്ന മൂന്നാമത്തെ സിനിമയാണ് മിന്നൽ മുരളി.