ഹോം

വിശേഷങ്ങൾ

മലയാളി പ്രേക്ഷകർ ആകാംക്ഷയോടെ കാത്തിരിക്കുന്ന ചിത്രമാണ് മോഹൻലാൽ ജീത്തു ജോസ് കൂട്ട്കെട്ടിൽ ഒരുങ്ങുന്ന ചിത്രമായ ദൃശ്യം 2. ആദ്യ ഭാഗത്തിന്റെ വൻ വിജയമാണ് രണ്ടാം ഭാഗത്തിനായുള്ള പ്രേക്ഷകരുടെ ആകാംക്ഷ വർധിപ്പിച്ചിരിക്കുന്നത്. 2020ൽ ഏറ്റവും കുടുതൽ വാർത്തകളിൽ ഇടം പിടിച്ച ചിത്രം കൂടിയായിരുന്നു ഇത്. ലോക്ക് ഡൗണിന് ശേഷം കൊവിഡ് മാനദണ്ഡങ്ങൾ പാലിച്ചാണ് ദൃശ്യം 2ന്റെ ചിത്രീകരണം ആരംഭിച്ചത്. ചിത്രീകരണത്തിന് ശേഷം താരങ്ങളും അണിയറ പ്രവർത്തകരും സുരക്ഷിതമായിട്ടാണ് ലൊക്കേഷൻ വിട്ടത്.

സിനിമാ ലോകവും ബോളിവുഡ് പ്രേക്ഷകരും ആകാംക്ഷയോടെ കാത്തിരിക്കുകയാണ് ദൃശ്യം 2 ന്റെ ടീസറിനായി. ജനുവരി 1 ന് പുതുവത്സര ദിനത്തിലാണ് ടീസർ പുറത്തെത്തുന്നത്. ഒരു മിനിറ്റുള്ള ടീസർ 2021ന്റെ ആദ്യ മിനിറ്റിൽ തന്നെ പ്രേക്ഷകരിലേയ്ക്ക് എത്തുമെന്നാണ് ഇപ്പോൾ അണിയറപ്രവർത്തകർ അറിയിച്ചിരിക്കുന്നത്. ടീസറിനായി കാത്തിരിക്കുകയാണ് ആരാധകർ. ദൃശ്യം 2 ന്റെ ടീസർ പുതുവത്സരദിനത്തിൽ എത്തുമെന്ന് മോഹൻലാൽ നേരത്തെ ആരാധകരെ അറിയിച്ചിരുന്നു.

ദൃശ്യം ആദ്യ ഭാഗത്തിന്റെ ഏഴാം വാർഷിക ദിനത്തിലായിരുന്നു മോഹൻലാൽ രണ്ടാം ഭാഗത്തിനെ കുറിച്ചുളള നിർണ്ണായകമായ വെളിപ്പെടുത്തൽ നടത്തിയത്. കൂടാതെ വൻ വിജയമായ ആദ്യ ഭാഗത്തെ കുറിച്ചും താരം വാചാലനായിരുന്നു. ഫേസ്ബുക്ക് പേജിലൂടെയായിരുന്നു താരം മനസ്സ് തുറന്നത്.മോഹൻലാലിന്റെ വാക്കുകൾ ഇങ്ങനെ...

വര്‍ഷങ്ങള്‍ക്ക് മുമ്പ്, ഡബ്ബിങ് സ്റ്റുഡിയോയുടെ മോണിറ്ററില്‍ ഇതു പോലൊരു റീല്‍ കാര്‍ഡ് ഞാന്‍ കണ്ടു. പിന്നീട് നടന്നത്, നിങ്ങള്‍ക്കും എനിക്കും അറിയാവുന്ന ചരിത്രം. ദൃശ്യം. ഇന്ന് ഈ ഡിസംബര്‍ 19ന് ദൃശ്യം നിങ്ങളിലേക്കെത്തിയിട്ട് 7 വര്‍ഷം തികയുന്ന ദിവസം, നിങ്ങളിലേക്ക് ഒരു റീല്‍ കാര്‍ഡ് കൂടെ. ദൃശ്യം2 ടീസറിന്റെ കാത്തിരിക്കാന്‍ ഇനി കുറച്ചു നാളുകള്‍ കൂടെ. ജനുവരി 1ന് പുതുവത്സര ദിനത്തില്‍ ദൃശ്യം 2 ടീസര്‍ നിങ്ങളിലേക്ക്" എന്ന് മോഹൻലാൽ ഫേസ്ബുക്കിൽ കുറിച്ചിരുന്നു. ചിത്രത്തിനോടൊപ്പമായിരുന്നു ലാലേട്ടൻ ദൃശ്യം1 നെ കുറിച്ചുളള ഓർമ പങ്കുവെച്ചത്.

Recommended Video

ജോർജ്ജ്കുട്ടിയുടേയും കുടുംബത്തിന്റേയും ഇപ്പോഴത്തെ ജീവിതമാണ് രണ്ടാം ഭാഗത്തിൽ പറയുന്നത്. ആദ്യ ഭാഗത്തിലുണ്ടായിരുന്ന താരങ്ങളായ മീന, സിദ്ദീഖ്,ആശാ ശരത്, അനീഷ് ജി മേനോന്‍, അന്‍സിബാ ഹസ്സന്‍, എസ്തര്‍,ആന്റണി പെരുമ്പാവൂര്‍, എന്നിവരും രണ്ടാം ഭാഗത്തിലും ഉണ്ട്. ഗണേഷ് കുമാർ, മുരളി ഗോപിയും ദൃശ്യം 2 ൽ പ്രധാന വേഷത്തിലെത്തുന്നുണ്ട്. ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂർ തന്നെയാണ് ദൃശ്യത്തിന്റെ രണ്ടാം ഭാഗവും നിര്‍മ്മിക്കുന്നത്.