പ്രണവിനും മകൾക്കുമൊപ്പം മോഹൻലാലും സുചിത്രയും, അമ്മയെ കണ്ടശേഷം പെരിങ്ങോട്ടെയ്ക്ക്, ചിത്രം വൈറൽ...

ലോക്ക് ഡൗണിനെ തുടർന്ന് താരം ചെന്നൈയിൽ ആയിരുന്നു. ഇപ്പോഴിത കുടംബസമേതം കേരളത്തിൽ എത്തിയിരിക്കുകയാണ്. അമ്മയെ കണ്ടതിന് ശേഷം നടൻ സുഖചികിത്സയ്ക്കായി ഗുരുകൃപയിൽ എത്തിയിരിക്കുകയാണ്. നടന്റെ ചിത്രങ്ങൾ സമൂഹമാധ്യമങ്ങളിൽ വൈറലായിട്ടുണ്ട്. ലാലേട്ടൻ സുഖചികിത്സയ്ക്കായി ഇവിടെ എത്താറുണ്ട്. ഇക്കുറി കുടുംബവും ചികിത്സയുടെ ഭാഗമാകുന്നുണ്ട്. 23 ദിവസത്തോളം നീണ്ടു നിൽക്കുന്നതാണ് അവിടത്തെ ചികിത്സവിധികൾ.

അതേസമയം അത്രയും ദിവസം മോഹൻലാൽ ഒപ്പമുണ്ടാകില്ല. ബറോസിന്റെ ഷൂട്ടിംഗ് പുനരാരംഭിക്കുന്നത് സംബന്ധിച്ചുള്ള ചര്‍ച്ചകര്‍ക്കുകൂടിയായിട്ടാണ് ലാല്‍ എത്തിയിരിക്കുന്നത്. ലോക് ഡൗണ്‍ നീണ്ടുപോകുന്ന സാഹചര്യത്തില്‍ ഷൂട്ടിംഗ് വൈകാന്‍ ഇടയുണ്ട്. അതിനുമുമ്പ് ജീത്തു ജോസഫിന്റെ സിനിമയില്‍ അഭിനയിക്കുമെന്നും കേള്‍ക്കുന്നുണ്ട്. അഞ്ച് ദിവസം മുമ്പാണ് ലാല്‍ കുടുംബത്തോടൊപ്പം ചെന്നൈയില്‍നിന്ന് കേരളത്തിലെത്തിയത്. എറണാകുളത്ത് വന്ന് അമ്മയെ കണ്ടശേഷമാണ് പെരിങ്ങോട്ടുള്ള ഗുരുകൃപാ ആയൂര്‍വ്വേദ ഹെരിറ്റേജിലെത്തിയത്.

കഴിഞ്ഞ സെപ്തംബറിലും ലാല്‍ സുഖചികിത്സയ്ക്കായി ഇവിടെ എത്തിയിരുന്നു. അന്ന് സുചിത്ര മാത്രമേ ഒപ്പമുണ്ടായിരുന്നുള്ളൂ. അവിടുത്തെ ചികിത്സ കഴിഞ്ഞിറങ്ങിയതിനു പിന്നാലെയാണ് ദൃശ്യം 2 ല്‍ ജോയിന്‍ ചെയ്തത്. അന്ന് ലാല്‍ പത്ത് കിലോയോളം ശരീരഭാരം കുറച്ചിരുന്നു. ഡോ. ഉണ്ണികൃഷ്ണന്‍, ഡോ. ഹരികൃഷ്ണന്‍, ഡോ. ശ്രീജിത്ത് മേനോന്‍ എന്നിവരുടെ നേതൃത്വത്തിലാണ് ചികിത്സ നടക്കുന്നത്.

Recommended Video

Priyadarshan denies direct-to-OTT release for Marakkar | FilmiBeat Malayalam

മോഹൻലാലിന്റെ നിരവധി ചിത്രങ്ങൾ അണിയറയിൽ ഒരുങ്ങുന്നുണ്ട്. ആറാട്ട് ആണ് അണിയറയിൽ ഒരുങ്ങുന്ന മോഹൻലാലിന്റെ ചിത്രം. ബി ഉണ്ണികൃഷ്ണനാണ് ചിത്രം സംവിധാനം ചെയ്യുന്നത്. സിനിമയുടെ ചിത്രീകരണം അവസാനിച്ചിട്ടുണ്ട്. നെയ്യാറ്റിൻകര ഗോപൻ എന്ന കഥാപാത്രത്തെയാണ് നടൻ ചിത്രത്തിൽ അവതരിപ്പിക്കുന്നത്. ഇത് കൂടാതെ ബറോസാണ് പ്രേക്ഷകർ ആകാംക്ഷയോടെ കാത്തിരിക്കുന്ന മേഹൻലാലിന്റെ മറ്റൊരു ചിത്രം. നടൻ ആദ്യമായി സംവിധാനം ചെയ്യുന്ന ചിത്രമാണ് ബറോസ്. മോഹൻലാലിന്റെ ഡ്രീം പ്രൊജക്ട് ആണ്.