എംജിആറുമായി യാതൊരു സാദൃശ്യവുമില്ല! എന്നെ എന്തിന് കാസ്റ്റ് ചെയ്തതെന്ന് ചോദിച്ചെന്ന് മോഹന്‍ലാല്‍

രണ്ട് സുഹൃത്തുക്കളുടെ കഥ എന്നാണ് മണിരത്‌നം എന്നോട് പറഞ്ഞത്. പിന്നീട് ആ സിനിമ എംജിആറിന്റെയും കരുണാനിധിയുടെയും ജീവിത കഥയായി വ്യാഖ്യാനിക്കപ്പെട്ടു. എംജിആറുമായി എനിക്ക് യാതൊരു സാദൃശ്യവുമില്ല. അത് കൊണ്ട് എന്തിനാണ് എന്നെ കാസ്റ്റ് ചെയ്തത് എന്ന് ഞാന്‍ ഒരിക്കല്‍ മണിരത്‌നത്തിനോട് ചോദിച്ചു. അദ്ദേഹം പറഞ്ഞു, എംജിആറിന്റെ ജീവിതമല്ല നമ്മള്‍ കാണിക്കുന്നത്. അദ്ദേഹത്തിന്റെ വ്യക്തി ജീവിതമാണ്. സിനിമയിലേക്കുള്ള വരവ്, കഷ്ടപ്പാട്, രാഷ്ട്രീയ പ്രവേശം, മരണം തുടങ്ങിയവയാണ് ചര്‍ച്ച ചെയ്യുന്നത്.

ആ സിനിമയ്ക്ക് പില്‍ക്കാലത്ത് ഒരുപാട് കുഴപ്പങ്ങളുണ്ടായി. സെന്‍സറങ്ങില്‍ ഒരുപാട് സീനുകള്‍ വെട്ടികളഞ്ഞു. എന്നിരുന്നാലും ഒരുപാട് തലങ്ങളുള്ള കഥാപാത്രത്തെയാണ് എനിക്ക് ചെയ്യാന്‍ അവസരം ലഭിച്ചത്. ഇന്ത്യയിലെ മികച്ച നൂറ് ചിത്രങ്ങള്‍ എടുത്താല്‍ അതിലൊന്ന് ഇരുവരാണ്. സിനിമ പഠിക്കാന്‍ ആഗ്രഹിക്കുന്നവര്‍ക്ക് കാണാവുന്ന ഒരു സിനിമയാണത്.

ഇരുവര്‍ ചെയ്തതിന് ശേഷം എംജിആറുമായി സഹകരിച്ച ഒരുപാട് ആളുകളെ എനിക്ക് കാണാന്‍ അവസരമുണ്ടായി. ഒരുപാട് സാമ്യങ്ങള്‍ ഞങ്ങള്‍ തമ്മിലുണ്ടെന്ന് ചിലര്‍ പറഞ്ഞു. ഞാന്‍ എംജിആറിന്റെ ആരാധകനാണ്. എന്നാല്‍ അദ്ദേഹത്തിനെ അനുകരിക്കാന്‍ ഞാന്‍ ഒരിക്കലും ശ്രമിച്ചിട്ടില്ല. ഇരുവര്‍ ഒരു അത്ഭുത സിനിമയാണോ അങ്ങനെ ആയി തീര്‍ത്തോ എന്നൊന്നും എനിക്ക് അറിയില്ല. എനിക്കത് ചെയ്യാന്‍ സാധിച്ചതില്‍ ഏറെ അഭിമാനവും സന്തോഷവുമുണ്ട്. മണിരത്‌നത്തിന് ഞാന്‍ നന്ദി പറയുന്നു.

മോഹന്‍ലാലും പ്രകാശ് രാജും ഒപ്പത്തിനൊപ്പം അരങ്ങ് തകര്‍ത്തപ്പോള്‍ നിരവധി താരങ്ങള്‍ വേറെയും സിനിമയില്‍ അണിനിരന്നു. ലോകസുന്ദരി പട്ടം നേടിയ ഐശ്വര്യ റായിയുടെ അരങ്ങേറ്റ സിനിമയായിരുന്നു ഇരുവര്‍. ഒപ്പം നാസര്‍, ഗൗതമി, തബു, രേവതി, തുടങ്ങി നടിമാരും ചിത്രത്തില്‍ നിറഞ്ഞാടി. സന്തോഷ് ശിവനായിരുന്നു സിനിമയുടെ ഛായാഗ്രഹകന്‍. ഒപ്പം ഹിറ്റ് ഗാനങ്ങളൊരുക്കി എആര്‍ റഹ്മാന്‍ സിനിമയെ വേറെ ലെവലിലെത്തിച്ചു. രണ്ട് ദേശീയ പുരസ്‌കാരങ്ങളടക്കം സ്വന്തമാക്കിയ സിനിമ നിരവധി വേദികളില്‍ പ്രദര്‍ശിപ്പിച്ചിരുന്നു.