വിവാഹത്തിന് മുന്‍പ് ആഗ്രഹിച്ച സ്വപ്നം, 13 വാടക വീടുകളില്‍ നിന്നും സ്വന്തം വീട്ടിലേക്ക് മാറിയതിനെ പറ്റി മൃദുല

സ്വപ്‌ന വീട് പണിതതിനെ കുറിച്ച് മൃദുലയുടെ വാക്കുകളിങ്ങനെയാണ്..

ഒരു വീട് വെക്കുന്നതിന് വേണ്ടി താന്‍ വസ്തു നോക്കി കൊണ്ടിരിക്കുകയായിരുന്നു. അതിനിടയില്‍ ഞങ്ങള്‍ താമസിച്ചിരുന്ന ഫ്‌ളാറ്റിന് അടുത്ത് ഒരു പ്ലോട്ടിന്റെ പരസ്യം കാണുകയും ചെന്നു കണ്ടപ്പോള്‍ ഇഷ്ടപ്പെട്ടതോടെ വാങ്ങുകയായിരുന്നു എന്നാണ് മൃദുല പറയുന്നത്. വീടിന് ഡിസൈന്‍ ചെയ്തത് തന്റെ ഇഷ്ട പ്രകാരമാണ്. തനിക്ക് ചെറുപ്പം മുതലേ ഈ മേഖലയില്‍ വലിയ താല്‍പര്യമുണ്ടെന്നാണ് നടി പറയുന്നത്.

മൂന്ന് ബെഡ്‌റൂം ഹാള്‍, ഡൈനിങ് ഏരിയ, ഓപ്പണ്‍ കിച്ചണ്‍, വര്‍ക്ക് ഏരിയ എന്നിവ അടങ്ങുന്ന 1650 സ്‌ക്വയര്‍ ഫീറ്റിലൊതുങ്ങുന്ന വീടാണ് നിര്‍മ്മിച്ചതെന്ന് നടി പറയുന്നു. അച്ഛനും അമ്മയ്ക്കും ഒപ്പം കുടുംബസമേതമാണ് പുതിയ വീട്ടിലേക്ക് മൃദുല താമസം മാറിയത്. അതേ സമയം സ്വന്തം വീട്ടിലേക്ക് മാറിയതിന്റെ സന്തോഷമാണ് നടിയിപ്പോള്‍ ആരാധകരുമായി പങ്കുവെക്കുന്നത്.

വാടക വീടുകളില്‍ താമസിച്ചിരുന്ന കാലത്തെ കുറിച്ച് നടി വെളിപ്പെടുത്തി

'പതിമൂന്ന് വാടക വീടുകള്‍ക്ക് ശേഷം സ്വന്തം വീട്ടിലേക്ക് താമസത്തിനെത്തിയ സന്തോഷമാണ് എല്ലാവര്‍ക്കും. മകള്‍ എന്ന നിലയില്‍ അവരെ സ്വന്തം വീട്ടിലേക്ക് കൈപിടിച്ചു കയറ്റാനായല്ലോ അതൊരു അഭിമാന മുഹൂര്‍ത്തമാണ്. വലിയ നേട്ടമാണ്. അവരെ സംബന്ധിച്ചും സ്വന്തം വീട് എന്നത് ഒരു വലിയ സ്വപ്ന സാഫല്യമാണ്. ഇത്രയും വര്‍ഷം കൊതിച്ചത് കൈവന്നപ്പോഴുള്ള സന്തോഷവും ഉണ്ടെന്ന് നടി പറയുന്നു. ഈ സന്തോഷങ്ങളെല്ലാം ചേര്‍ന്നതിനാല്‍ പാലുകാച്ചല്‍ ദിവസം അറിയാതെ കണ്ണ് നനഞ്ഞു പോയിരുന്നെന്നും' മൃദുല പറയുന്നു.

എന്നാല്‍ ആഗ്രഹിച്ചിട്ടും നടക്കാതെ പോയൊരു കാര്യത്തെ കുറിച്ചും മൃദുല സൂചിപ്പിച്ചിരുന്നു.

'വിവാഹത്തിന് മുന്‍പേ വീട് പണി തുടങ്ങി. ശേഷം രണ്ട് മാസത്തിനുള്ളില്‍ യുവയുമായിട്ടുള്ള കല്യാണ ആലോചന വരികയും അത് ഉറപ്പിക്കുകയും ചെയ്തു. നിശ്ചയം കഴിഞ്ഞ് കല്യാണത്തിന് മുന്‍പ് പുതിയ വീട്ടില്‍ കയറി താമസിക്കണം എന്നൊരു ആഗ്രഹം ഉണ്ടായിരുന്നു. ഈ വീട്ടില്‍ നിന്നും കല്യാണം കഴിഞ്ഞ് പോകാനായിരുന്നു താല്‍പര്യം. പക്ഷേ അന്നേരത്തേക്കും പണി തീര്‍ന്നില്ല. ഒന്നര വര്‍ഷം കൊണ്ടാണ് പൂര്‍ത്തിയായതെന്ന് നടി പറഞ്ഞു.

കുഞ്ഞതിഥി വരാന്‍ പോവുന്നതിന്റെ സന്തോഷവും മൃദുല പറഞ്ഞിരുന്നു..

മൂന്ന് മാസത്തിനുള്ളില്‍ പുതിയ അതിഥിയായി ആദ്യത്തെ കണ്‍മണി വരും. സിംഗിളായാണ് വീടു പണി തുടങ്ങിയത്. താമസം തുടങ്ങിയപ്പോള്‍ മൂന്നാമത്തെ ആള്‍ വരുന്നു. ഇതില്‍ പരം എന്ത് സന്തോഷമെന്നാണ് മൃദുല ചോദിക്കുന്നത്. മാത്രമല്ല ഭര്‍ത്താവിന്റെ പിന്തുണ വളരെ വലുതായിരുന്നെന്നും നടി പറഞ്ഞു. വിവാഹം ഉറപ്പിച്ചതിന് ശേഷം വീട് പണിയുന്നതില്‍ അദ്ദേഹത്തിന്റെ നിര്‍ദ്ദേശങ്ങളും അഭിപ്രായങ്ങളും ഒത്തിരി ഉണ്ടായിരുന്നു.