വിമാനത്തിൽ യാത്ര പോകുന്നത് തന്നെ സംബന്ധിച്ച് ബുദ്ധിമുട്ടുള്ള കാര്യമാണ്, തുറന്ന് പറഞ്ഞ് നമിത

വിദേശ യാത്രകളെക്കാളും നടിയ്ക്ക് ഇഷ്ടം രാജ്യത്തിനകത്തുള്ള മനോഹരമായ സ്ഥലങ്ങൾ സന്ദർശിക്കാനാണ്. അത്തരത്തിൽ ചെറുപ്പം മുതൽ കാണാൻ ആഗ്രഹിച്ചിരുന്ന സ്ഥലമായിരുന്നു മണാലി. ആ സ്വപ്ന യാത്ര സഫലമായിരുന്നു. ആ മനോഹര യാത്രയ കുറിച്ച് വാചാലയാവുകയാണ് നടി. റോഡ് മർഗ്ഗമായിരുന്നു നമിതയും കൂട്ടരും മണാലിയിൽ എത്തിയത്. ഡൽഹിൽ നിന്ന് ഒരു ട്രാവലറിലായിരുന്ന മണാലി യാത്ര. റോഡ് മാർഗം തിരഞ്ഞെടുത്തതിൽ ഒരു കാരണമുണ്ട്.

റോഡ് മാർഗം പോകുമ്പോൾ കൂടുതൽ കാഴ്ചകൾ കാണാനാകും. പാടങ്ങളും മലനിരകളും വ്യത്യസ്ത മനുഷ്യരെയുമെല്ലാം. ഇടയ്ക്ക് നിർത്തുന്നിടത്തുനിന്ന് ആ നാട്ടിലെ ഭക്ഷണരുചികൾ ആസ്വദിക്കാം. ശരിക്കും റോഡ് യാത്രയാണ് മികച്ചത്. പലതരത്തിലുള്ള കാഴ്ചകളിലൂടെ കടന്നുപോകുന്നത് മറക്കാനാവാത്ത അനുഭവമാണ് നമുക്ക് സമ്മാനിക്കുന്നത്. ഞാൻ കണ്ടതിൽ വച്ചേറ്റവും സുന്ദരമായ സ്ഥലങ്ങളിലൊന്നാണ് മണാലി. കുളു-മണാലിയെന്നാണല്ലോ പൊതുവേ പറയുന്നത്. എനിക്കേഷ്ടവും ഇഷ്ടപ്പെട്ടത് മണാലിയാണ്. അവിടുത്തെ പച്ചപ്പും മഞ്ഞുപുതച്ച പർവതങ്ങളും ആളുകളുമെല്ലാം എന്നെ വല്ലാതെ ആകർഷിച്ചു.

കൂടാതെ സ്വപ്നയാത്രയെ കുറിച്ചും നടി അഭിമുഖത്തിൽ വെളിപ്പെടുത്തിയിരുന്നു.യൂറോപ്പ് മുഴുവൻ ചുറ്റിക്കറങ്ങണമെന്നാണ് തന്റെ ഏറ്റവും വലിയ ആഗ്രഹമെന്ന് നമിത പറഞ്ഞു. സാന്റോരിനി, ഗ്ലാസ്കോ അങ്ങനെ തന്റെ പട്ടികയിൽ ഒത്തിരി സ്ഥലങ്ങൾ ഉണ്ടെന്നും താരം. ‘ബീച്ചുകളാണ് എനിക്കേറ്റവും ഇഷ്ടം. പിന്നെ ഈ പറഞ്ഞയിടങ്ങൾ മാത്രമല്ല, കുറേ സ്ഥലങ്ങൾ കാണണമെന്നുണ്ട്.. അടുത്തവർഷം സമയം കിട്ടുന്നതിനനുസരിച്ച് പോകണം- താരം പറയുന്നു.

വിമാനത്തിൽ കയറിയിരുന്ന് 12-13 മണിക്കൂർ യാത്ര ചെയ്യുന്നത് മാത്രമാണ് എന്നെ സംബന്ധിച്ച് ബുദ്ധിമുട്ടുള്ള കാര്യം. അല്ലാതെ യാത്രചെയ്യുമ്പോൾ അത് പൂർണമായും ആസ്വദിക്കാറുണ്ട്. വിമാനത്തിൽ കയറിയാൽ ഉടനെ ഞാൻ ഉറങ്ങിപ്പോകും. അതിനി 2 മണിക്കൂറുള്ളതാണെങ്കിൽപ്പോലും. ഇടയ്ക്ക് ഭക്ഷണം കഴിക്കാൻ മാത്രമാണ് എഴുന്നേൽക്കുന്നത്. ഭക്ഷണം കഴിക്കുക വീണ്ടും ഉറങ്ങുക. അതൊരു ചടങ്ങുപോലെയാണ് എന്നെ സംബന്ധിച്ച്. പോകുന്നയിടം എത്തുന്നത് വരെ ഇങ്ങനെയാണ് എന്റെ യാത്ര'. പുതിയസ്ഥലങ്ങൾ കാണാനും അവിടുത്തെ ആളുകളെ പരിചയപ്പെടാനും ഭക്ഷണങ്ങൾ രുചിക്കാനുമെല്ലാം ഇഷ്ടമാണെന്നും എല്ലായാത്രകളും ആസ്വദിച്ച് തന്നെ നടത്താറുള്ളതെന്നും നമിത പറഞ്ഞു.