വാശി മാറ്റി വെച്ച് നയൻതാര ഇറങ്ങി, അഹാന പുഷ്പം പോലെ ഡീൽ ചെയ്തു; താരറാണിയെ വെല്ലുന്ന റീച്ച്!

സിയ എന്ന ക്ലോത്തിം​ഗ് ബ്രാൻഡുമായി ബിസിനസ് രം​ഗത്തേക്ക് കടന്ന് വന്നിരിക്കുകയാണ് അഹാന കൃഷ്ണ, ഇഷാനി കൃഷ്ണ, ഹൻസിക കൃഷ്ണ, സിന്ധു കൃഷ്ണ എന്നിവർ. ഒരു വർഷത്തെ തയ്യാറെടുപ്പിന് ശേഷം ഇൻഫ്ലുവൻസേർസ് കുടുംബം ബിസിനസ് സംരഭവുമായി മുന്നോട്ടേക്ക് വന്നത്. ലിമിറ്റഡ് കലക്ഷൻ സാരികൾ ഇവർ വെബ്സെെറ്റിലൂടെ വിൽപ്പനയ്ക്കെത്തിക്കുന്നു. ആ​ഗസ്റ്റ് 14 നാണ് സാരി ബ്രാൻഡ് ലോഞ്ച് ചെയ്തത്. രണ്ട് ദിവസത്തിനുള്ളിൽ പലരെയും അത്ഭുതപ്പെടുത്തുന്ന ബിസിനസ് നേട്ടമാണ് ഇവർക്കുണ്ടായിരിക്കുന്നത്.

പല സാരികളും ഔട്ട് ഓഫ് സ്റ്റോക്കായി. പെട്ടെന്നാണ് സെയിൽ നടക്കുന്നത്. സാധാരണക്കാരെ പരി​ഗണിക്കാത്ത വിലയാണ് സാരികൾക്കെന്ന് വിമർശനം വന്നെങ്കിലും ഈ വിമർശനങ്ങൾ ബിസിനസിനെ ബാധിച്ചില്ലെന്നാണ് വിലയിരുത്തപ്പെടുന്നത്. മികച്ച കലക്ഷനുകളാണ് സിയയിലുള്ളത്. സെയിലിനപ്പുറം സിയക്ക് പൊതുജനങ്ങൾക്കിടയിൽ ലഭിച്ച റീച്ച് കൗതുകരമാണ്.

Photo Credit: Instagram / Ahaana Krishna

രണ്ട് ദിവസത്തിനുള്ളിൽ സിയ എന്ന ബ്രാൻഡും ഇവരുടെ സാരികളും ജനങ്ങളുടെ ചർച്ചാ വിഷയമായി. സോഷ്യൽ മീ‍ഡിയയിൽ അഹാനയ്ക്കും കുടുംബത്തിനുമുള്ള ജനശ്രദ്ധയാണ് ഇതിന് കാരണം. വലിയ പ്രൊമോഷനോ ഹെെപ്പോ ബിസിനസ് സംരഭത്തിന് അഹാന കൊടുത്തിട്ടില്ല. രണ്ട് ദിവസം മുമ്പ് സസ്പെൻസ് നിറച്ച് ഒരു പോസ്റ്റും പിന്നീട് സിയ വെബ്സെെറ്റിന്റെ ലോഞ്ചിം​ഗും.

വലിയ ബഹളമൊന്നുമില്ലാതെ വന്ന ഒരു ബ്രാൻഡ്. എന്നാൽ പെട്ടെന്നാണ് സിയക്ക് ജനശ്രദ്ധ ലഭിച്ചത്. പല സിനിമാ താരങ്ങളും ഒരു ബിസിനസ് സംരംഭം തുടങ്ങുമ്പോൾ വലിയ പ്രൊമോഷനുകൾ നടത്താറുണ്ട്. തെന്നിന്ത്യൻ താരറാണി നയൻതാരയും ബിസിനസ് രം​ഗത്തേക്ക് വന്നപ്പോൾ വലിയ ഹെെപ്പ് നൽകി. പാെതുവെ മീഡിയകളിൽ നിന്നും പരമാവധി മാറി നിൽക്കുന്ന ആളാണ് നയൻതാര. സിനിമകളുടെ പ്രൊമോഷന് പോലും ഇക്കാരണത്താൽ വരാറില്ല.

Photo Credit: Instagram / Ahaana Krishna, Vignesh Shivan

എന്നാൽ സ്വന്തം ബിസിനസ് തുടങ്ങിയപ്പോൾ പ്രൊമോഷൻ അവ​ഗണിക്കാൻ നയൻതാരയ്ക്കായില്ല. വലിയ ലോഞ്ചിം​ഗ് ഇവന്റ് നട‌ന്നു. നിരവധി മീഡിയകളുമായി സംസാരിച്ചു. ഇവന്റുകൾ അറ്റൻഡ് ചെയ്തു. സോഷ്യൽ മീഡിയ അക്കൗണ്ട് തുടങ്ങിയത് പോലും ബിസിനസ് സംരംഭം തുടങ്ങുന്നതിന് കുറച്ച് നാൾ മുമ്പാണ്. നയൻതാര ഏറെ നാൾ ഇതിന് വേണ്ടി തന്നെ മാറ്റിവെച്ചിട്ടുണ്ട്. എന്നാൽ അഹാനയ്ക്ക് പെട്ടെന്ന് തന്നെ ബിസിനസ് ജനങ്ങളിലേക്കെത്തിക്കാൻ കഴിഞ്ഞു. ഇൻഫ്ലുവൻസേർസിന് ഇന്ന് സിനിമാ താരങ്ങളേക്കാൾ സ്വാധീനം ജനങ്ങൾക്കിടയിലുണ്ടെന്നാണ് ഇത് വ്യക്തമാക്കുന്നത്. കഴിഞ്ഞ അഞ്ച് വർഷങ്ങൾക്കുള്ളിലാണ് സോഷ്യൽ മീഡിയ ഇത്രമാത്രം വലിയ ശക്തിയായി ഉയർന്ന് വന്നത്. അഹാനയ്ക്കും കുടുംബത്തിനും ലഭിക്കുന്ന റീച്ച് സോഷ്യൽ മീഡിയയുടെ ശക്തി എത്ര മാത്രമാണെന്ന് തുറന്ന് കാണിക്കുന്നു.

അതേസമയം അഹാനയുടേതിനേക്കാൾ വലിയ ബിസിനസാണ് നയൻതാരയുടേത്. നയൻതാരയുടെ സോഷ്യൽ മീഡിയ പോസ്റ്റുകളിൽ വലിയൊരു പങ്കും സ്വന്തം പ്രൊഡക്ടുകളെക്കുറിച്ചുള്ളതാണ്. സിനിമാ രം​ഗത്ത് വലിയ സ്ഥാനം നേടിയെടുത്ത ശേഷമാണ് നയൻതാര ബിസിനസിലേക്കും കൂടുതൽ ശ്രദ്ധ നൽകിയത്. സ്കിൻ കെയർ പ്രൊഡക്ട്, സാനിറ്ററി നാപ്കിൻ തുടങ്ങിയ പ്രൊഡക്ടുകളിലാണ് നയൻതാര ശ്രദ്ധ കൊടുത്തത്. മിക്ക ബിസിനസുകൾക്കും പാർട്ണർമാരുണ്ട്. പൊതുവേദികളിൽ നിന്നും പൊതുവെ മാറി നിൽക്കുന്നയാളായിരുന്നു നയൻ‌താര. എന്നാൽ ബിസിനസുമായി ബന്ധപ്പെട്ട ഇവന്റുകൾക്ക് നടി എത്താറുണ്ട്. ഭർത്താവ് വിഘ്നേശ് ശിവനും ബിസിനസ്, നിക്ഷേപ കാര്യങ്ങളിൽ നയൻതാരയ്ക്കൊപ്പമുണ്ട്.