ഫഹദിനൊപ്പമുള്ള റൊമാന്‍റിക് നിമിഷങ്ങള്‍ പങ്കുവെച്ച് നസ്രിയ! ലേറ്റസ്റ്റ് ചിത്രങ്ങള്‍ വൈറല്‍!

സോഷ്യല്‍ മീഡിയയില്‍ സജീവമാണ് നസ്രിയ നസീം. വിശേഷങ്ങളെക്കുറിച്ചെല്ലാം താരം പങ്കുവെക്കാറുണ്ട്. പുതിയ ചിത്രങ്ങള്‍ പങ്കുവെച്ചായിരുന്നു താരം കഴിഞ്ഞ ദിവസമെത്തിയത്. നിമിഷനേരം കൊണ്ടായിരുന്നു ഫഹദും നസ്രിയയും സോഷ്യല്‍ മീഡിയയിലെ താരങ്ങളായി മാറിയത്. സ്‌ക്രീനില്‍ മാത്രമല്ല ജീവിതത്തിലും മികച്ച കെമിസ്ട്രിയുമായി മുന്നേറുകയാണ് ഇരുവരും. സിനിമയില്‍ സജീവമല്ലെങ്കിലും പൊതുപരിപാടികളിലെല്ലാം നസ്രിയ സജീവമാണ്.

ഫഹദിനൊപ്പമുള്ള ക്യൂട്ട് ചിത്രങ്ങളാണ് ഇപ്പോള്‍ വൈറലായിക്കൊണ്ടിരിക്കുന്നത്. നസ്രിയ വന്നതിന് ശേഷം ജീവിതത്തില്‍ വന്ന മാറ്റങ്ങളെക്കുറിച്ച് ഫഹദ് തുറന്നുപറഞ്ഞിരുന്നു. ജീവിതത്തിന് അടുക്കും ചിട്ടയും വന്നത് വിവാഹത്തിന് ശേഷമാണ്. നസ്രിയ സിനിമയില്‍ അഭിനയിക്കുന്നതിന് വിരോധമില്ല. മികച്ച അവസരം ലഭിച്ചാല്‍ ഒരുമിച്ച് അഭിനയിക്കുമെന്നും മുന്‍പ് ഫഹദ് ഫാസില്‍ വ്യക്തമാക്കിയിരുന്നു. നീണ്ട നാളത്തെ കാത്തിരിപ്പിനൊടുവിലായാണ് അത്തരത്തിലൊരു തിരക്കഥ ഇവരെത്തേടിയെത്തിയത്.

ഇടയ്ക്കിടയ്ക്ക് മേക്കോവര്‍ നടത്തിയം നസ്രിയ ഞെട്ടിക്കാറുണ്ട്. ക്യൂട്ട്‌നെസ്സ് വീണ്ടും കൂടിയെന്നുള്ള കമന്റുകളുമായാണ് ആരാധകര്‍ എത്തിയിട്ടുള്ളത്. ഫഹദിനെ ചുംബിക്കുന്നതും ചേര്‍ന്ന് നില്‍ക്കുന്നതുമായുള്ള ചിത്രങ്ങളാണ് ഇന്‍സ്റ്റഗ്രാമിലൂടെ പങ്കുവെച്ചിട്ടുള്ളത്. കാറില്‍ യാത്ര ചെയ്യുന്നതിനിടയിലെ ചിത്രങ്ങളും കൂട്ടത്തിലുണ്ട്. എന്‍, എഫ് എന്നെഴുതിയ ലോക്കറ്റ് കൈയ്യില്‍ ധരിച്ചതിന്റെ ചിത്രങ്ങളും നസ്രിയ പോസ്റ്റ് ചെയ്തിട്ടുണ്ട്.

നസ്രിയയുടെ പ്രിയപ്പെട്ട പട്ടിക്കുട്ടിയായ ഓറിയോയും ചിത്രങ്ങളിലുണ്ട്. ഓറിയോയെ ഓമനിക്കുന്നതും മടിയില്‍ വെച്ചിരിക്കുന്നതുമൊക്കെയാണ് തനിക്കേറെ ഇഷ്ടമുള്ളതെന്ന് നസ്രിയ പറഞ്ഞിരുന്നു. ഫഹദാണ് ഓറിയോയെ തനിക്ക് സമ്മാനിച്ചതെന്ന് മുന്‍പ് നസ്രിയ പറഞ്ഞിരുന്നു. ഓറിയോ ബിസ്‌ക്കറ്റിലെപ്പോലെയുള്ള ചിത്രമായതിനാലാണ് താന്‍ ഈ പേര് തിരഞ്ഞെടുത്തതെന്നും താരം പറഞ്ഞിരുന്നു.

ബാംഗ്ലൂര്‍ ഡേയ്‌സിന് ശേഷം ഫഹദും നസ്രിയയും വീണ്ടും ഒരുമിച്ചെത്തുകയാണ് ട്രാന്‍സിലൂടെ. അന്‍വര്‍ റഷീദാണ് സിനിമ സംവിധാനം ചെയ്യുന്നത്. നിര്‍മ്മിക്കുന്നതും അദ്ദേഹം തന്നെയാണ്. ഒരു വര്‍ഷത്തിലേറെ സമയമെടുത്താണ് സിനിമയുടെ ചിത്രീകരണം പൂര്‍ത്തിയാക്കിയിട്ടുള്ളത്. ഗൗതം വാസുദേവ് മേനോന്‍, വിനായകന്‍, ശ്രീനാഥ് ഭാസി, ഷെയ്ന്‍ നിഗം, തുടങ്ങിയവരും ചിത്രത്തില്‍ അഭിനയിച്ചിട്ടുണ്ട്.