99 കിലോയില്‍ നിന്നും 84 ലേക്ക്; പ്രസവശേഷം പതിനാറ് കിലോ ഭാരം കുറച്ചതെങ്ങനെയാണെന്ന് സൗഭാഗ്യ വെങ്കിടേഷ്

പ്രസവം കഴിഞ്ഞപ്പോഴെക്കുമാണ് എല്ലാവരെയും പോലെ എനിക്കും ഭാരം കൂടിയത്. അതൊരു സാധാരണ കാര്യമായതിനാല്‍ ടെന്‍ഷന്‍ ഒന്നുമില്ലായിരുന്നു. സ്വന്തമായി ഭാരം കുറയ്ക്കാം എന്നൊരു വിശ്വാസം വെച്ച് ട്രൈ ചെയ്‌തെങ്കിലും കാര്യമായ മാറ്റമുണ്ടായില്ല. ഇതോടെയാണ് പ്രൊഫഷണല്‍ ട്രെയിനറുടെ ആവശ്യമുണ്ടെന്ന് മനസിലാക്കിയത്.

ഗര്‍ഭകാലത്ത് നൂറ് വരെ എത്തിയില്ലെങ്കിലും തൊണ്ണൂറ്റിയൊന്‍പത് കിലോ ശരീരഭാരം ഉണ്ടായിരുന്നു. ഇപ്പോള്‍ 84 ആണ്. ഗര്‍ഭിണിയാവുന്നതിന് മുന്‍പ് ജിമ്മില്‍ പോയി വര്‍ക്കൗട്ട് ചെയ്യും. കുഞ്ഞ് കൂടി വന്നതോടെ നമ്മള്‍ വിചാരിക്കുന്ന സമയത്ത് എന്തെങ്കിലും ചെയ്യാന്‍ സാധിക്കില്ല. ഓരോ ദിവസവും ഓരോ ഷെഡ്യൂളാണ്. കുഞ്ഞിനൊപ്പമുള്ള വെയിറ്റ് ലോസ് വലിയൊരു ബുദ്ധിമുട്ടാണെന്ന് സൗഭാഗ്യ പറയുന്നു.

നൃത്തം ചെയ്യുന്നതടക്കം ശാരീരികമായി ഞാന്‍ ഒത്തിരി കാര്യങ്ങള്‍ ചെയ്യുന്നുണ്ട്. വേറെ വര്‍ക്കൗട്ടിന്റെ ആവശ്യമില്ലല്ലോ എന്ന് ഞാനും ചിന്തിച്ചു. എന്നാല്‍ ഈ ഡാന്‍സുമായി എന്റെ ശരീരം ഇഴുകി ചേര്‍ന്ന് പോയതാണ്. അതിന് മുകളില്‍ ചെയ്താല്‍ മാത്രമേ ഭാരം കുറയുകയുള്ളു. അത് മനസിലാക്കിയപ്പോഴാണ് ജിമ്മില്‍ പോയി തുടങ്ങിയത്. പക്ഷേ മുന്‍പത്തെ പോലെ ഇപ്പോള്‍ നടക്കാത്തത് കൊണ്ട് വീട്ടില്‍ തന്നെ ഇരുന്ന് ചെയ്യാന്‍ പറ്റുന്ന വര്‍ക്കൗട്ടും ഡയറ്റും തിരഞ്ഞെടുക്കുകയായിരുന്നു-സൗഭാഗ്യ പറയുന്നു.

ബോഡി ഷെയിമിങ്ങിന് ഒരു പഞ്ഞവുമില്ലാത്ത നാടാണ് നമ്മളുടേത്. വെറുതേ പോയാലും തടിച്ചല്ലോ, മെലിഞ്ഞല്ലോ എന്നൊക്കെയുള്ള കമന്റ് കേള്‍ക്കേണ്ടി വരും. അപ്പോള്‍ എല്ലാവര്‍ക്കും ഇതൊരു പ്രഷറാണ്. പക്ഷേ ഞാന്‍ ഭാരം കുറയ്ക്കാന്‍ തീരുമാനിച്ചത് അതുകൊണ്ടല്ല. ഫിറ്റ് ആയി ഇരിക്കണമെന്നേയുള്ളു.

ഭയങ്കരമായി മെലിഞ്ഞ് സൈസ് സീറോ ആവണമെന്ന് എനിക്കില്ല. ഫിറ്റ് ആയിട്ടുള്ള ജീവിതം മുന്നോട്ട് കൊണ്ട് പോകാന്‍ സാധിക്കുന്നുണ്ട്. അതിലിപ്പോള്‍ സന്തോഷമാണ്. ഇതൊക്കെയാണ് നിങ്ങളുമായി പങ്കുവെക്കാന്‍ ആഗ്രഹിച്ചതെന്നും സൗഭാഗ്യ വ്യക്തമാക്കുന്നു.