'ഏയ് എന്താടാ ഇത്, നമ്മൾ നല്ല കെമിസ്ട്രിയാണല്ലോ ഞാൻ പറഞ്ഞു, അതിന് ദുൽഖർ പറഞ്ഞത് ഇതായിരുന്നു'; നിത്യാ മേനോൻ!

ദുൽഖർ സൽമാനും നിത്യാ മേനോനും നായിക നായകന്മാരായ മണിരത്നം സിനിമ ഓകെ കൺമണി വലിയ ഹിറ്റായിരുന്നു. പ്രണയം പ്രമേയമായ സിനിമയിലെ പാട്ടുകളും സീനുകളും ഡയലോ​ഗുകളും ഇന്നും ജനപ്രിയമാണ്.

ഇപ്പോഴിത ദുൽഖറിനെ കുറിച്ച് നിത്യാ മേനോൻ പറഞ്ഞ ചില കാര്യങ്ങളാണ് വൈറലാകുന്നത്. സിനിമ കണ്ടപ്പോള്‍ തങ്ങൾ ശരിക്കും ഞെട്ടിയെന്നും ഇത്രയും കെമിസ്ട്രി വര്‍ക്കൗട്ടാകുമെന്ന് പ്രതീക്ഷിച്ചിരുന്നില്ലെന്നും പറയുകയാണ് ഒരു അഭിമുഖത്തില്‍ നടി നിത്യാ മേനോൻ.

'ഞങ്ങള്‍ ഓക്കെ കണ്‍മണിയുടെ പ്രീമിയര്‍ ദുബായില്‍ വെച്ച് കണ്ട സമയത്ത് ദുല്‍ഖര്‍ എന്റെ അടുത്തിരിക്കുന്നുണ്ടായിരുന്നു. ഏയ്... എന്താടാ ഇത്?. നമ്മള്‍ രണ്ട് പേരും കിടിലന്‍ കെമിസ്ട്രിയാണല്ലോ... എന്നാണ് പ്രീമിയര്‍ ഷോ കണ്ടിട്ട് ഞാന്‍ ദുല്‍ഖറിനോട് പറഞ്ഞത്. യാ... ഐ നോ എന്ന് അവനും മറുപടി പറഞ്ഞു' നിത്യ പറഞ്ഞു.

ഓക്കെ കൺമണിയിലെ ദുൽഖറിന്റേയും നിത്യാ മേനോന്റേയും കെമിസ്ട്രി പ്രേക്ഷകരും വാഴ്ത്തിയിരുന്നു. ദുൽഖറിന്റെ കരിയറിലെ തമിഴിലെ ആദ്യത്തെ ഹിറ്റ് സിനിമയുമായിരുന്നു ഓക്കെ കൺമണി.

100 ഡെയ്സ് ഓഫ് ലവ് എന്ന സിനിമയിലും ദുൽഖറും നിത്യാ മേനോനും ഒരുമിച്ച് അഭിനയിച്ചിട്ടുണ്ട്. നിത്യാ മേനോൻ അഭിനയിച്ച് ഏറ്റവും അവസാനം പുറത്തിറങ്ങിയ സിനിമ തിരുച്ചിട്രമ്പലമാണ്. സിനിമയിൽ ധനുഷായിരുന്നു നിത്യാ മേനോന്റെ നായകൻ.

റാഷി ഖന്നയും പ്രധാന വേഷം ചെയ്ത സിനിമ അടുത്തിടെ പുറത്തിറങ്ങിയ തമിഴിലെ ഹിറ്റ് സിനിമകളിൽ ഒന്നാണ്. വിജയ് സേതുപതി നായകനായ 19(1)എ എന്ന ചിത്രമാണ് ഏറ്റവും അവസാനം റിലീസ് ചെയ്ത നിത്യാ മേനോന്റെ മലയാള സിനിമ.

നവാഗതയായ വി.എസ്. ഇന്ദു ഒരുക്കിയ ചിത്രമായിരുന്നു 19(1)എ. ആന്റോ ജോസഫ് ഫിലിം കമ്പനിയും ആന്‍ മെഗാ മീഡിയയും ചേര്‍ന്നാണ് ചിത്രം നിര്‍മ്മിച്ചത്. വിജയ് സേതുപതിയും നിത്യ മേനോനും ആദ്യമായി ഒന്നിച്ച ചിത്രം ഡിസ്നി പ്ലസ് ഹോട്ട് സ്റ്റാറിലൂടെയാണ് പ്രേക്ഷകരിലേക്ക് എത്തിയത്.

ദുൽഖർ തമിഴിൽ മാത്രമല്ല ബോളിവുഡിലടക്കം ഇപ്പോൾ തിരക്കുള്ള നായകനാണ്. സീതാരാമം, ചുപ് എന്നിവയാണ് ഏറ്റവും അവസാനം പ്രേക്ഷകരിലേക്ക് എത്തിയ ദുൽഖർ സിനിമകൾ. സീതാരാമം പാൻ ഇന്ത്യൻ സിനിമയായിട്ടാണ് പ്രേക്ഷകരിലേക്ക് എത്തിയത്.