ഈ പടം പൊട്ടും, ഞങ്ങള്‍ കൂവി തോല്‍പ്പിക്കും! അഡാറ് ലവിനെ നശിപ്പിക്കാൻ ഒരു കൂട്ടർ, ഒമർ ലുലു പറയുന്നു..

ഒമർ ലുലുവിന്റെ വാക്കുകൾ

പ്രിയപ്പെട്ട സുഹൃത്തുക്കളെ, എന്റെ മൂന്നാമത്തെ ചിത്രം 'ഒരു അഡാറ് ലവ്' FEB 14നു തിയേറ്ററില്‍ എത്തുകയാണ്. ഈ ചെറിയ ചിത്രത്തിന് ഇത്രയും വലിയ രീതിയില്‍ ജനപ്രീതി നേടിത്തന്നതിനു നിങ്ങളോടൊരുത്തരോടും നന്ദി പറയുന്നു. അതെ സമയം ഒരു വലിയ വിഭാഗം ആളുകള്‍ ചിത്രത്തെ മനഃപൂര്‍വം ഡീഗ്രേഡ് ചെയ്യുന്നത് ഒരുപാട് മനപ്രയാസം ഉണ്ടാക്കുന്നുണ്ട്. ഏതു പ്രൊമോഷന്‍ പോസ്റ്റ് ഇട്ടാലും അതിന്റെ താഴെ 'ഈ പടം പൊട്ടും' , 'ഞങ്ങള്‍ കൂവി തോല്‍പ്പിക്കും', 'പടം ഇറക്ക് കാണിച്ചു തരാം' തുടങ്ങിയ കമെന്റുകള്‍ ആണ്.

ബിഗ് റിലീസായി എത്തുന്നു

വലിയ താരങ്ങള്‍ ഇല്ലാതെ പടം ചെയ്യാന്‍ ശ്രമിക്കുന്ന ഒരു തുടക്കക്കാരന്‍ ആണ് ഞാന്‍, അതുകൊണ്ടു തന്നെ സിനിമ വിജയിപ്പിക്കാനും അത്രയേറെ കഷ്ടപ്പാടുണ്ട്. പുതുമുഖങ്ങളെ വച്ച് വളരെ ചെറിയ ബഡ്ജറ്റില്‍ ചെയ്ത ഒരു കൊച്ചു ചിത്രം 5 ഭാഷകളിലായി 1200 തിയേറ്ററുകളിലാണ് റിലീസ് ചെയ്യപ്പെടുന്നത്. ആദ്യമായാണ് മലയാളത്തില്‍ നിന്നും ഒരു ചിത്രം ഇത്രയേറെ ഭാഷകളില്‍ ഇത്രയേറെ തിയേറ്ററുകളില്‍ ഒരുമിച്ച് ഇറങ്ങുന്നത്. ഇങ്ങനെ ഒരു നേട്ടത്തിന്റെ ഭാഗമാകാന്‍ കഴിഞ്ഞതില്‍ അഭിമാനവും സന്തോഷവും ഉണ്ട്. എന്നാല്‍ ഈ കാര്യം പറഞ്ഞു കൊണ്ട് പോസ്റ്റ് ഇട്ടാല്‍ പോലും അതിന്റെ താഴെ തെറി വിളികളും പരിഹാസങ്ങളും ആണ്.

പുതിയ ടീസറുകൾ

തെലുങ്കിലെയും കന്നഡയിലെയും ചിത്രങ്ങള്‍ ഇവിടെ ഇറങ്ങുമ്പോള്‍ നമ്മള്‍ മലയാളികള്‍ അവര്‍ക്ക് കൊടുക്കുന്ന പിന്തുണയും സ്വീകാര്യതയും സ്വന്തം ഭാഷയിലെ ചിത്രത്തിന് കിട്ടാതെ പോകുന്നത് തികച്ചും വേദനാജനകമാണ്. സിനിമ ഇറങ്ങുന്നതിനു മുന്നേ ദയവു ചെയ്ത അതിനെ പരാജയപ്പെടുത്താന്‍ ശ്രമിക്കരുത്. ഈ ചിത്രം നിങ്ങള്‍ക്ക് ഇഷ്ടപെടുകയാണെങ്കില്‍ ഒരു മടിയും ഇല്ലാതെ ഇതിനെ സപ്പോര്‍ട്ട് ചെയ്ത് വിജയിപ്പിക്കണം, എങ്കില്‍ ഇനിയും ഒരുപാട് പുതുമുഖങ്ങളെ വച്ച് സിനിമയെടുക്കാന്‍ നിര്‍മാതാക്കള്‍ക്കും , സംവിധായകര്‍ക്കും ഒരു പ്രചോദനമാകും അത്. ഇന്ന് ചിത്രത്തിന്റെ തമിഴ്, തെലുങ്ക് ടീസര്‍ പുറത്തിറങ്ങും, എല്ലാവരും മനസ്സറിഞ്ഞു കൂടെ നില്‍ക്കും എന്ന പ്രതീക്ഷയോടെ, ഒമര്‍ ലുലു.

ഒരു അഡാറ് ലവ്

ഹാപ്പി വെഡ്ഡിംഗ്, ചങ്ക്സ് എന്നീ സിനിമകളിലൂടെ മലയാളത്തിലെ പ്രമുഖ സംവിധായകന്മാർക്കൊപ്പം സ്ഥാനം പിടിച്ച ആളാണ് ഒമർ ലുലു. ഒമറിന്റെ സംവിധാനത്തിലെത്തുന്ന മൂന്നാമത്തെ സിനിമയിൽ അണിനിരക്കുന്നതെല്ലാം പുതുമുഖങ്ങളാണ്. കഴിഞ്ഞ ഫെബ്രുവരിയിലായിരുന്നു മാണിക്യ മലരായ പൂവി എന്ന പാട്ട് പുറത്ത് വരുന്നതും ഒരു അഡാറ് ലവിലൂടെ പ്രിയ പ്രകാശ് വാര്യര്‍ എന്ന പുതുമുഖ നടി ശ്രദ്ധിക്കപ്പെടുന്നതും. പാട്ട് രംഗത്തിൽ കണ്ണീറുക്കി കാണിച്ചതായിരുന്നു ശ്രദ്ധേയം. ഇപ്പോഴിതാ കഴിഞ്ഞ ദിവസം തമിഴ്, തെലുങ്ക് വേർഷനുകളിൽ നിന്നും പുറത്ത് വന്ന ടീസറുകള്‍ക്കും ഡിസ് ലൈക്കുകളാണ് കിട്ടി കൊണ്ടിരിക്കുന്നത്.