'വിവാഹത്തിന് താൽപര്യമില്ലായിരുന്നു, ഇഷ്ടമാണെന്ന് പറഞ്ഞയുടൻ ഇനി കല്യാണമെന്ന് തീരുമാനിച്ചു'; പദ്മപ്രിയ

നടന്മാരായ മമ്മൂട്ടി, മോഹൻലാൽ, സുരേഷ് ഗോപി, ജയറാം എന്നിവരോടൊപ്പം പദ്മപ്രിയ മലയാളത്തിൽ അഭിനയിച്ചിട്ടുണ്ട്. മികച്ച സഹനടിക്കുള്ള കേരള സംസ്ഥാന അവാർഡ് രണ്ട് തവണ നേടിയിട്ടുണ്ട് പദ്മപ്രിയ. മികച്ച നടിക്കുള്ള തമിഴ്നാട് സംസ്ഥാന അവാർഡ് 2007, 2009 വർഷങ്ങളിൽ പദ്മപ്രിയയ്ക്കായിരുന്നു ലഭിച്ചത്.

തമിഴ്-പഞ്ചാബി ബ്രാഹ്മണ കുടുംബത്തിൽ 1983 ഫെബ്രുവരി 28ന് ഡെൽഹിയിലാണ് പത്മപ്രിയ ജനിച്ചതെങ്കിലും വളർന്നത് പഞ്ചാബിലായിരുന്നു. പിതാവ് ഒരു സൈനിക ഉദ്യോഗസ്ഥനായിരുന്നു.

12 നവംബർ 2014ൽ ജാസ്മിൻ ഷാ എന്ന ഗുജറാത്ത് സ്വദേശിയെ വിവാഹം കഴിച്ചു താരം. മുംബൈയില്‍ നടന്ന സ്വകാര്യ ചടങ്ങില്‍ വെച്ചായിരുന്നു വിവാഹം.

Also Read: സുരേഷ് ​ഗോപിയെ ഇകഴ്ത്താൻ ശ്രമിച്ചിട്ടില്ല, വൈരാഗ്യമുണ്ടെങ്കില്‍ അദ്ദേഹം അങ്ങനെ ചെയ്യുമോ? സിദ്ദിഖ്

അമേരിക്കയിലെ ബിരുദാനന്തര ബിരുദ പഠനത്തിനിടെയാണ് ഇരുവരും തമ്മില്‍ പരിചയത്തിലാവുന്നത്. വധൂ വരന്മാരുടെ അടുത്ത സുഹൃത്തുക്കളും ബന്ധുക്കളും മാത്രമെ ചടങ്ങിനുണ്ടായിരുന്നുള്ളു. പദ്മപ്രിയയുടെ ഭർത്താവ് ജാസ്മിന്‍ മെക്കാനിക്കല്‍ എഞ്ചിനീയറിങിലും പബ്ലിക് അഡ്മിനിസ്‌ട്രേഷനിലും ബിരുദാനന്തര ബിരുദധാരിയാണ്.

ഇപ്പോഴിത വിവാഹത്തെ കുറിച്ചും പുതിയ സിനിമയായ തെക്കൻ തല്ലിനെ കുറിച്ചും പദ്മപ്രിയ സംസാരിക്കുന്ന വീഡിയോയാണ് വൈറലാകുന്നത്. 'എനിക്ക് അന്ന് കല്യാണത്തിന് താൽപര്യമുണ്ടായിരുന്നില്ല. ഞങ്ങളുടേത് കരൺ ജോഹർ ലവ് സ്റ്റോറിയാണ്.'

'ആദ്യത്തെ ഡേറ്റിൽ ഞങ്ങൾ പരസ്പരം കണ്ട് ഇഷ്ടപ്പെട്ടു. പിന്നെ രണ്ടാമത്തെ ഡേറ്റിൽ ഇഷ്ടമാണെന്ന് പറഞ്ഞു. മാത്രമല്ല ആ ഡേറ്റിൽ വെച്ച് തന്നെ ഇനി വെച്ച് താമസിപ്പിക്കേണ്ട വിവാഹമാകാമെന്ന് തീരുമാനിക്കുകയായിരുന്നു. സ്നേഹത്തിന്റേയും ബഹുമാനത്തിന്റേയും ബാലൻസിൽ രണ്ടുപേരും പോയാൽ ജീവിതം വളരെ സ്മൂത്താണ്.'

'ദൈവത്തിന്റെ കൃപകൊണ്ട് ഞങ്ങളുടേത് അങ്ങനെയാണ് പോകുന്നത്. എന്റെ അച്ഛൻ മമ്മൂട്ടി ഫാനാണ്. പക്ഷെ ഞാൻ മമ്മൂക്കയുെട സിനിമകൾ കണ്ടിട്ടില്ലായിരുന്നു. അങ്ങനെ മമ്മൂക്കയെ കാണമല്ലോയെന്നുള്ള ആ​ഗ്രഹം കൊണ്ടാണ് അന്ന് ഓഡീഷന് പോയത്. അന്ന് വിയർത്ത് കുളിച്ചാണ് അവിടെ ചെന്നത് വരെ' പദ്മപ്രിയ പറഞ്ഞു.

പദ്മപ്രിയയുടെ ഏറ്റവും പുതിയ റിലീസ് ബിജു മേനോൻ സിനിമ ഒരു തെക്കൻ തല്ല് കേസാണ്. ജി.ആർ ഇന്ദുഗോപന്‍റെ അമ്മിണിപ്പിള്ള വെട്ടുകേസ് എന്ന കഥയെ ആസ്പദമാക്കിയുള്ള ചിത്രം സംവിധാനം ചെയ്തിരിക്കുന്നത് നവാഗതനായ ശ്രീജിത്ത് എന്‍ ആണ്. അമ്മിണി പിള്ള എന്നാണ് ചിത്രത്തില്‍ ബിജു മേനോന്‍ അവതരിപ്പിക്കുന്ന കഥാപാത്രത്തിന്‍റെ പേര്.

നേരത്തെ മോഹൻലാലിനെ ടൈറ്റിൽ കഥാപാത്രമാക്കി പൃഥ്വിരാജ് സംവിധാനം ചെയ്‍ത ബ്രോ ഡാഡിയുടെ തിരക്കഥാകൃത്തുക്കളിൽ ഒരാളാണ് ശ്രീജിത്ത്. രാജേഷ് പിന്നാടന്‍റേതാണ് തിരക്കഥ.

ചിത്രത്തിൽ യുവതാരങ്ങളായ റോഷൻ മാത്യുവും നിമിഷ സജയനും മറ്റ് രണ്ട് പ്രധാന കഥാപാത്രങ്ങളെ അവതരിപ്പിച്ചിട്ടുണ്ട്.