'ഭർത്താവ് മലയാള സിനിമയ്ക്ക് എന്നെ കൊണ്ടുപോകാറില്ല, സീരിയലിൽ എന്നും ഒരേ എക്സപ്രഷനിടണം'; നിത്യ ദാസ്

'ഇത്രയും നാളും സിനിമ ചെയ്യാതിരുന്നത് നല്ല കഥാപാത്രം വരാത്തതുകൊണ്ടാണ്. സിനിമ ചെയ്തില്ലെന്നേയുള്ളു. മീഡിയയിൽ‌ നിന്നൊന്നും വിട്ടുനിന്നിട്ടില്ല. സൈക്കോ ത്രില്ലറാണോ, പ്രേത പടമാണോയെന്നത് പ്രേക്ഷകർ സിനിമ കണ്ട് തീരുമാനിക്കണം.'

'അതാണ് സിനിമയുടെ ഹൈലൈറ്റും. സിനിമയുടെ തുടക്കം മുതൽ ഒടുക്കം വരെ എല്ലാവരിലും ഒരു ആകാംഷയുണ്ടായിരിക്കും. കഥാപാത്രം ഉൾക്കൊണ്ട് ചെയ്യാനുള്ള പക്വതയില്ലാത്ത കാലത്താണ് ഈ പറക്കും തളിക ചെയ്തത്.'

'ഇപ്പോൾ‌ അങ്ങനെയല്ലല്ലോ. നല്ലാെരു ക്രൂവിനൊപ്പമാണ് പ്രവർത്തിച്ചത്. കുറെ വർഷങ്ങൾക്ക് ശേഷം തിരിച്ച് വന്നതുകൊണ്ട് എനിക്കെല്ലാം പുതിയ അനുഭവമായിരുന്നു.'

'പക്ഷെ സെറ്റിലുള്ളവർ സഹകരിക്കുമായിരുന്നു. കൊവിഡ് കാലത്ത് തുടങ്ങിയതാണ് റീൽസിടൽ‌. പിന്നീട് ഒരു ഹരമായി. ഒരുപാട് യാത്ര ചെയ്യുന്നവരാണ് ഞങ്ങൾ. പക്ഷെ അന്നൊന്നും വീഡിയോ എടുക്കാൻ തോന്നിയില്ല. യാത്രകൾ ഒരുപാട് മിസ്സായി. ഇപ്പോൾ പോകുമ്പോൾ റീൽസ് എടുക്കാൻ ശ്രദ്ധിക്കാറുണ്ട്.'

'മകൾക്ക് ഡാൻസ് പഠിക്കാൻ താൽപര്യമില്ല. അഭിനയത്തിലേക്ക് വരുമോയെന്ന് അറിയില്ല. ഒരുപാട് കാര്യങ്ങൾ രണ്ട് സിനിമയിലും ഒരുപോലെ വന്നിട്ടുണ്ട്. പറക്കും തളികയിൽ ബസ്സാണെങ്കിൽ‌ പള്ളിമണിയിൽ ഒരു പള്ളിയാണ് പ്രധാന കഥാപാത്രം.'

'മനസിനിഷ്ടപ്പെട്ട കഥാപാത്രം വന്നാൽ ഇനിയും സിനിമകൾ ചെയ്യും. പാർവതിയുടെ സിനിമകൾ എനിക്കിഷ്ടമാണ്. വ്യക്തിത്വമുള്ള കുട്ടിയാണ് പാർവതിയെന്ന് തോന്നിയിട്ടുണ്ട്. ഞാൻ വിവാഹം കഴിച്ചിരിക്കുന്നത് ഒരു നോർത്ത് ഇന്ത്യൻ ആളെയാണ്.'

'ആൾക്ക് ഭാഷ പ്രശ്നമായതുകൊണ്ട് ഭർത്താവ് എന്നെ മലയാള സിനിമയ്ക്ക് കൊണ്ടുപോകാറില്ല. പിന്നെ ഞാൻ ആരെയെങ്കിലും കൂട്ടി പോയി സിനിമ കാണും. ഭർത്താവ് ഹിന്ദി സിനിമകൾക്ക് എന്നെ കൊണ്ടുപോകാറുണ്ട്. അതുകൊണ്ട് തന്നെ കുറെ സിനിമകളൊന്നും കാണാൻ പറ്റിയി‌ട്ടില്ല. കഥകൾ മുമ്പും വന്നിരുന്നു. പക്ഷെ ഒന്നും ഇഷ്ടപ്പെട്ടില്ല.'

'ഇങ്ങനൊരു കഥ എന്നിലേക്ക് വരുമെന്ന് ഞാൻ ഒരിക്കലും പ്രതീക്ഷിച്ചിരുന്നില്ല. സീരിയലിൽ എന്നും പോയാൽ ഒരേ കാര്യങ്ങളാണ് ചെയ്യാനുള്ളത്. എന്നും പോയി ഒരേ എക്സ്പ്രഷൻ ഇടണം. അതുമാത്രമല്ല ഡേറ്റും പ്രശ്നമായി. കുട്ടികളുടെ കാര്യങ്ങളും പ്രശ്നമായപ്പോഴാണ് സീരിയൽ അഭിനയം നിർത്തിയത്.'

'നല്ല കഥാപാത്രങ്ങൾ ഇനിയും ചെയ്യണം. ജനിച്ചതും വളർന്നതും ജീവിക്കുന്നതും കോഴിക്കോടാണ്. അതുകൊണ്ട് തന്നെ കോഴിക്കോട് വിട്ടൊരു കളിയില്ല. ഭർത്താവിനോട് വിവാഹത്തിന് മുമ്പ് പറഞ്ഞതും കോഴിക്കോട് വിട്ട് വരില്ലെന്നാണ്' നിത്യാ ദാസ് പറഞ്ഞു.