പേര്‍ളിയുടെയും ശ്രീനിഷിന്റെയും കൊറോണ കാലം! വീടിനുള്ളിലെ രസകരമായ വീഡിയോ പങ്കുവെച്ച് നടി

കൊറോണ വൈറസ് വ്യാപകമായതിന്റെ പശ്ചാതലത്തില്‍ രാജ്യം ഒട്ടാകെ ലോക്ക് ഡൗണ്‍ പ്രഖ്യാപിച്ചിരിക്കുകയാണ്. ഇതോടെ താരങ്ങളെല്ലാം വീടുകളില്‍ തന്നെയാണ്. അതുപോലെ പേര്‍ളിയും ഭര്‍ത്താവ് ശ്രീനിഷും വീടിനുള്ളില്‍ തന്നെയാണ്. തിരക്കുകളില്‍ നിന്നും മാറി കുടുംബത്തിനൊപ്പം ആഘോഷിക്കുകയാണെന്നും പേര്‍ളി സൂചിപ്പിച്ചു. ഒപ്പം ക്വാറന്റൈന്‍ ദിനത്തില്‍ ബോറടി മാറ്റുന്നതിന് വേണ്ടി താരദമ്പതികള്‍ എന്തൊക്കെയാണ് ചെയ്യുന്നതെന്ന് സൂചിപ്പിച്ച് കൊണ്ടുള്ള വീഡിയോ ആണ് ഇന്‍സ്റ്റാഗ്രാം പേജിലൂടെ പങ്കുവെച്ചിരിക്കുന്നത്.

പേര്‍ളിയുടെ ആലുവയിലെ വീട്ടിലാണ് ഇരുവരും ഇപ്പോള്‍ ഉള്ളത്. വീടിന്റെ മുറ്റത്ത് ടെന്നിസ് കളിക്കുന്ന ശ്രീനിഷിന്റെ വീഡിയോ പുറത്ത് വിട്ടിരുന്നു. ഒപ്പം പേര്‍ളിയുടെ മാസ്റ്റര്‍പീസ് ഡാന്‍സ് ആണ് മറ്റൊരു ഹൈലൈറ്റ്. ഒരു റേഡിയോ വെച്ചിട്ടുള്ള മോഡേണ്‍ ഡാന്‍സ് കിടുവാണ്. വീട്ടില്‍ ബോറടിച്ചിരിക്കുമ്പോള്‍ ഇങ്ങനെയൊക്കെ ഐഡിയ വരുമോ എന്ന് ആരാധകര്‍ ചോദിക്കുന്നുണ്ട്. നിങ്ങളുടെ എന്റര്‍ടെയിന്‍മെന്റ് നിങ്ങള്‍ തന്നെയാണെന്ന് സൂചിപ്പിച്ച് കൊണ്ടായിരുന്നു ഡാന്‍സ് വീഡിയോ പേര്‍ളി പങ്കുവെച്ചത്.

എന്നാല്‍ അതിലും വെറൈറ്റി ആയി ഒരു കാര്‍ട്ടൂണ്‍ ഗെറ്റപ്പിലെത്തിയ വീഡിയോയും പേര്‍ളി പോസ്റ്റ് ചെയ്തിരിക്കുകയാണ്. ഒരു അമ്മയും മകളും തമ്മിലുള്ള സംഭാഷണമായിരുന്നു പേര്‍ളി ഒരുക്കിയത്. വീട്ടില്‍ ഇരുന്ന് ബോറടിച്ച് കരയുന്ന കൊച്ച് ലുലു മാളില്‍ പോവണമെന്നും അവിടെ ഗെയിം കളിക്കണമെന്നുമൊക്കെ പറയുന്നു. ഇത്രയും സീരിയസ് പ്രശ്‌നം നടക്കുമ്പോഴാണോ ലുലു മാളില്‍ പോകുന്നതെന്ന് ചോദിച്ച് ദേഷ്യപ്പെടുന്ന അമ്മയുമാണ് വീഡിയോയിലുള്ളത്. കുട്ടികള്‍ എപ്പോഴും ക്യൂട്ടാണ്. ഇത് എല്ലാ അമ്മമാര്‍ക്കും കുട്ടികള്‍ക്കും സമര്‍പ്പിക്കുകയാണെന്നും പേര്‍ളി പറയുന്നു.

ബിഗ് ബോസിലെത്തിയതിന് ശേഷമായിരുന്നു പേര്‍ളിയും ശ്രീനിഷും പരിചയപ്പെടുന്നത്. അടുപ്പം പെട്ടെന്ന് ഇഷ്ടമായി മാറി. നൂറ് ദിവസങ്ങള്‍ കൊണ്ട് വിവാഹം കഴിക്കാനുള്ള തീരുമാനം ഇരുവരും തമ്മിലെടുത്തു. ഗെയിമിന്റെ ഭാഗമായിട്ടുള്ള പ്രണയമാണെന്ന് ഇതെന്നും ബിഗ് ബോസില്‍ നിന്നും പുറത്തിറങ്ങിയ ഉടനെ ഇരുവരും പിരിയുമെന്നുമെല്ലാം ചിലര്‍ പറഞ്ഞിരുന്നു. എന്നാല്‍ കഴിഞ്ഞ മേയ് മാസം ഇരുവരും ക്രിസ്ത്യന്‍, ഹിന്ദു ആചാര പ്രകാരം വിവാഹിതരായി.