അവളുമായി സംസാരിച്ചതേയുള്ളൂ; ലഹരിക്കേസ് റിമാൻഡ് റിപ്പോർട്ടിന് പിന്നാലെ പ്രയാ​ഗയുടെ അമ്മ

ഗുണ്ടാ നേതാവ് ഓം പ്രകാശിനെതിരെയുള്ള ലഹരിക്കേസിലെ റിമാൻഡ് റിപ്പോർട്ടിൽ സിനിമാ താരങ്ങളുടെ പേരും. നടി പ്ര​യാ​ഗ മാർട്ടിൻ, നടൻ ശ്രീനാഥ് ഭാസി എന്നിവർ ഓം പ്രകാശിന്റെ മുറി സന്ദർശിച്ചു എന്നാണ് പൊലീസ് റിപ്പോർട്ടിൽ പറയുന്നത്. ഇവർക്ക് പുറമെ ഇരുപതോളം പേർ ഓം പ്രകാശിന്റെ മുറിയിൽ എത്തിയിട്ടുണ്ട്. ലഹരി വിൽപ്പന നടന്നുവെന്ന് സംശയമുള്ള ഓം പ്രകാശിന്റെ ഈ മുറിയിലെത്തിയവരെ ചോദ്യം ചെയ്യണമെന്നാണ് അന്വേഷണ സംഘം ആവശ്യപ്പെടുന്നത്.

അതേസമയം വാർത്ത പുറത്ത് വന്നതിന് പിന്നാലെ പ്രതികരണവുമായി പ്രയാ​ഗ മാർട്ടിന്റെ അമ്മ ജിജി മാർട്ടിൻ രം​ഗത്ത് വന്നു. ആരോപണം ജിജി മാർട്ടിൻ നിഷേധിക്കുന്നു. പ്ര​യാ​ഗയുമായി ഇപ്പോൾ സംസാരിച്ചതേയുള്ളൂ. അവൾക്ക് ഇതേക്കുറിച്ചൊന്നും അറിയില്ലെന്നാണ് മനോരമ ന്യൂസിനോട് അമ്മയുടെ പ്രതികരണം. വിഷയത്തിൽ ഇതുവരെയും പ്രയാ​ഗയോ ശ്രീനാഥ് ഭാസിയോ പ്രതികരിച്ചിട്ടില്ല.

ലഹരി വസ്തുക്കൾ കൈവശം വെച്ചതിന് കഴിഞ്ഞ ദിവസമാണ് ഓം പ്രകാശിനെയും സുഹൃത്തായ ഷിഹാസിനെയും പൊലീസ് പിടികൂടിയത്. കൊച്ചിയിലെ ഒരു പഞ്ചനക്ഷത്ര ഹോട്ടലിൽ വെച്ചാണ് ഇരുവരും പിടിയിലായത്. ഇവരുടെ ജാമ്യഹർജി പരി​ഗണിക്കവെ പൊലീസ് കോടതിയിൽ സമർപ്പിച്ച റിമാൻഡ് റിപ്പോർട്ടിലാണ് ഇപ്പോൾ പുറത്ത് വന്ന വിവരങ്ങളുള്ളത്. താരങ്ങൾ എത്തിയതെന്തിന് എന്നറിയാൻ ഓം പ്രകാശിനെയും ഷിഹാസിനെയും കസ്റ്റഡിയിൽ വേണമെന്ന പൊലീസിന്റെ ആവശ്യം കോടതി അം​ഗീകരിച്ചില്ല. ഇരുവർക്കും ജാമ്യം ലഭിച്ചു.

മൂന്ന് മുറികളിലാണ് ലഹരി ഇടപാടുകളുണ്ടായത്. ഇവർ ബുക്ക് ചെയ്ത മുറിയിലും അടുത്തുള്ള രണ്ട് മുറികളിലുമായാണ് അന്വേഷണം നടക്കുന്നത്. ഹേട്ടലിലെ രേഖകൾ പരിശോധിച്ചപ്പോഴാണ് താരങ്ങളുടെ വിവരം ലഭിച്ചത്. തിരുവനന്തപുരം കേന്ദ്രീകരിച്ച് വർഷങ്ങളായി ​ഗുണ്ടാ പ്രവർത്തനങ്ങൾക്ക് നേതൃത്വം നൽകുന്ന വ്യക്തിയാണ് ഓം പ്രകാശ്.

രണ്ട് ദിവസമായി ഇയാളെ കൊച്ചിയിൽ കണ്ടതോടെയാണ് പൊലീസ് പരിശോധന നടത്തുന്നത്.നടൻ ശ്രീനാഥ് ഭാസിക്കെതിരെ നേരത്തെയും ലഹരി ഉപയോ​ഗ ആരോപണം വന്നി‌ട്ടുണ്ട്. 2023 ൽ സെറ്റിൽ മോശമായി പെരുമാറി ആരോപണത്തിൽ ശ്രീനാഥ് ഭാസിയെ സിനിമാ സംഘടനകൾ വിലക്കിയിരുന്നു.

ഷെയിൻ നി​ഗത്തിനെതിരെ വലിയ ആരോപണങ്ങൾ അന്ന് ഫെഫ്ക സംഘടന ഉന്നയിച്ചു. ശ്രീനാഥ് ഭാസി ഏതൊക്കെ സിനിമകൾക്ക് ഒപ്പ് വെക്കുന്നു എന്ന് അദ്ദേഹത്തിന് തന്നെ അറിയില്ല. വിളിച്ചാൽ ഫോണെടുക്കില്ല. നടൻ ഒരു സെറ്റിലും കൃത്യ സമയത്ത് ഷൂട്ടിം​ഗിന് എത്തില്ലെന്നും ഫെഫ്ക അന്ന് വിമർശിച്ചു.