കണ്ണ് നിറച്ച് പൃഥ്വി! ചേര്‍ത്തുപിടിച്ച് മോഹന്‍ലാല്‍! ഫസ്റ്റ് ഷോ കണ്ട ആരാധകന്‍റെ കുറിപ്പ് വൈറലാവുന്നു

താരങ്ങള്‍ക്ക് തൊട്ടുപിന്നില്‍

മോഹന്‍ലാലിന്റെ പേഴ്‌സണല്‍ സ്റ്റാഫിനൊപ്പമാണ് താന്‍ തിയേറ്ററിലേക്ക് പോയതെന്നും താരങ്ങള്‍ക്ക് പിറകിലായുള്ള സീറ്റാണ് തങ്ങള്‍ക്ക് ലഭിച്ചതെന്നും ആരാധകന്‍ കുറിച്ചിട്ടുണ്ട്. മോഹന്‍ലാലും പൃഥ്വിരാജും ടൊവിനോയും ആന്റണി പെരുമ്പാവൂരും ഇരുന്നതിന് പിന്നിലായാണ് തങ്ങളും ഇരുന്നത്. സ്വപ്‌നമെന്ന് മാത്രമേ ഈ അവസരത്തെ വിശേഷിപ്പിക്കാനാവൂ. ലാലേട്ടന്റേയും പൃഥ്വിരാജിന്റേയും സിനിമകള്‍ ആദ്യദിനം കണ്ടിരുന്ന തന്നെ സംബന്ധിച്ച് അവര്‍ക്ക് പുറകിലിരുന്ന് സിനിമ കാണാനുള്ള അവസരം ലഭിച്ചാല്‍ സ്വപ്‌നമെന്നല്ലാതെ എന്ത് പറയും.

അവരുടെ മുഖത്ത് നോക്കിയിരുന്നു

രോമാഞ്ചിഫിക്കേഷന്‍ രംഗങ്ങള്‍ ഒന്നൊന്നായി വരുമ്പോഴും ഇടയ്ക്ക് തന്റെ കണ്ണ് അടുത്തിരിക്കുന്ന നായകനിലും സംവിധായകനിലും ഉടക്കിയിരുന്നു. പ്രേക്ഷകരുടെ ആവേശവും ആരവവുമൊക്കെ കാണുമ്പോള്‍ അവരുടെ മുഖഭാവം എങ്ങനെയാണെന്നറിയാനുള്ള ആകാംക്ഷയായിരുന്നു അതിന് പിന്നില്‍. വിന്റേജ് ലാലേട്ടനെ ഓര്‍മ്മപ്പെടുത്തുന്ന തരത്തിലുള്ള പല ഡയലോഗുകളും മാനറിസങ്ങളും ചിത്രത്തിലുണ്ട്. ലാലേട്ടന്റെ മുഖത്ത് സന്തോഷവും രാജുച്ചേട്ടന്റെ മുഖത്ത് അഭിമാനവുമായിരുന്നു അപ്പോളുണ്ടായിരുന്നത്.

കണ്ണുനിറഞ്ഞു

സംവിധാനം പൃഥ്വിരാജ് സുകുമാരന്‍ എന്നെഴുതി കാണിച്ചിരുന്ന സമയത്ത് പൃഥ്വിരാജിന്റെ കണ്ണ് നിറഞ്ഞിരുന്നു. തിയേറ്ററിലെ കൈയ്യടികള്‍ക്കിടയില്‍ ആ മുഖത്തുണ്ടായ വികാരം പറഞ്ഞറിയിക്കാനാവുന്നതല്ല. ഇടയ്ക്ക് ഫാന്‍ ബോയ് യെപ്പോലെ കൈയ്യടിയുമായി ആന്റണി ചേട്ടന്‍ എഴുന്നേറ്റ് നില്‍ക്കുന്നുണ്ടായിരുന്നു. തിയേറ്ററില്‍ നിന്നിറങ്ങിയതിന് ശേഷമുള്ള പൃഥ്വിരാജിന്റെ ചിത്രങ്ങളില്‍ കണ്ണിലെ നനവ് വ്യക്തമായിരുന്നതായി ആരാധകരും ചൂണ്ടിക്കാണിച്ചിരുന്നു. താന്‍ സംവിധാനം ചെയ്ത ആദ്യ സിനിമയ്ക്ക് ലഭിച്ച പ്രതികരണങ്ങളില്‍ അദ്ദേഹം സന്തോഷവാനാണെന്ന് മനസ്സിലാക്കാന്‍ മറ്റെന്തെങ്കിലും വേണോയെന്നാണ് ആരാധകര്‍ ചോദിച്ചത്.

മോഹന്‍ലാല്‍ ചേര്‍ത്തുപിടിച്ചു

ഇടയ്ക്ക് ചില രംഗങ്ങള്‍ വന്നപ്പോള്‍ ലാലേട്ടന്‍ പൃഥ്വിയുടെ കൈയ്യില്‍ പിടിച്ചിരുന്നു. ആ രംഗം താന്‍ എന്നും തന്റെ ഹൃദയത്തിലെ ക്യാമറയില്‍ ഇത് സൂക്ഷിക്കുമെന്നും ആരാധകന്‍ കുറിച്ചിട്ടുണ്ട്. അടുത്ത കാലത്ത് മോഹന്‍ലാലിനെ ഇത്രത്തോളം ഉപയോഗിച്ച് വിജയിച്ച മറ്റൊരു സംവിധായകനുണ്ടോ എന്ന കാര്യത്തില്‍ സംശയമുണ്ടെന്നും ആരാധകന്‍ കുറിച്ചിട്ടുണ്ട്.

പോസ്റ്റ് കാണൂ

ആരാധകന്റെ പോസ്റ്റ് കാണൂ.