കോൾഡ് കേസിൽ ആദ്യം ആശങ്കയുണ്ടായിരുന്നു, ഭർത്താവിന്റെ ഇപ്പോഴത്തെ പേടിയെ കുറിച്ച് ആത്മീയ

കൊവിഡ് കാലത്താണ് സിനിമയിലേയ്ക്ക് ഓഫർ ലഭിക്കുന്നത്. പൃഥ്വിരാജ് ചിത്രം എന്ന് കേട്ടപ്പോൾ തന്നെ വളരെ സന്തോഷമായിരുന്നു. തിരക്കഥകൃത്ത് ശ്രീനാഥ് ചേട്ടനും സംവിധായകൻ തനു ചേട്ടനുമാണ് തന്നോട് കഥ പറയുന്നത്. ഒരു 6, 7 ദിവസം മാത്രമേ ഷൂട്ടിങ്ങ് ഉണ്ടാവുകയുള്ളൂവെന്ന് അവർ പറഞ്ഞിരുന്നു. അപ്പോൾ തനിക്ക് ഒരു ആശങ്ക തോന്നി. കാരണം ഒരു പൃഥ്വിരാജ് ചിത്രത്തിൽ ചെറിയ രംഗങ്ങളിൽ മാത്രം വന്നു പോയാൽ ആളുകൾ എന്നെ ശ്രദ്ധിക്കുമോ എന്നായിരുന്നു ഭയം. എന്നാൽ ആളുകൾ ഒരിക്കലും മറക്കില്ലെന്നുള്ള അവരുടെ ഉറപ്പിലാണ് താൻ സിനിമ ചെയ്യുന്നത്.

സിനിമയിൽ പ്രേതത്തിന്റെ കഥാപാത്രമായിരുന്നു ആത്മീയ ചെയ്തത്. എന്നാൽ ജീവിതത്തിൽ പ്രേതത്തിനെ പേടിയാണെന്നും നടി അഭിമുഖത്തിൽ പറയുന്നു. എന്നാൽ റിയൽ ലൈഫിൽ പ്രേതാനുഭവങ്ങളൊന്നും ഇല്ലെന്നും കൂട്ടിച്ചേർത്തു. ചെറുപ്പത്തിൽ ഓജോ ബോർഡ് ചെയ്തിട്ടുണ്ട്. എന്നാൽ അതിന്റെ ഓർമകളൊന്നും തനിക്ക് ഇല്ല. പ്രേതത്തിൽ വിശ്വാസമില്ലെങ്കിലും ഒരു മനസ്സിൽ ഒരു ഭയമുണ്ടെന്നും താരം പറയുന്നു.

സിനിമ കണ്ടതിന് ശേഷം ഭർത്താവിന് ഫ്രിഡ്ജ് തുറക്കാൻ ഭയമാണെന്നും ആത്മീയ പറയുന്നുണ്ട്. വിവാഹത്തിന് ശേഷം ആദ്യം റിലീസ് ചെയ്യുന്ന ചിത്രമാണ്. രാത്രി സിനിമ കാണാൻ അദ്ദേഹം സമ്മതിച്ചില്ല. പിന്നീട് സിനിമ കണ്ടതിന് ശേഷം രാത്രിയൊന്നും ഫ്രിഡ്ജ് തുറക്കില്ലെന്നും പേടിയാണെന്നും നടി പറയുന്നു. അതുപോലെ തന്നെ രാത്രിയിൽ മുടി അഴിച്ചിട്ട് നോക്കിയാലും അദ്ദേഹത്തിന് പേടിയാണെന്നും തമാശ രൂപേണ ആത്മീയ പറഞ്ഞു.

ജൂൺ 30 ന് ആമസോൺ പ്രൈമിലാണ് സിനിമ റിലീസ് ചെയ്യുന്നത്. പൃഥ്വിരാജിന്റെ ആദ്യത്തെ ഒടിടി റിലീസാണിത്. പോലീസ് ഗെറ്റപ്പിലാണ് നടൻ സിനിമയിൽ എത്തിയിരിക്കുന്നത്. അദിതി ബാലൻ, അനിൽ നെടുമങ്ങാട് , ലക്ഷ്മിപ്രിയ തുടങ്ങിയവരാണ് മറ്റ് താരങ്ങൾ. താനു ബാലക്കിന്റെ ആദ്യ ചിത്രമാണിത്. മികച്ച പ്രേക്ഷക സ്വീകാര്യതയാണ് സിനിമയ്ക്ക് ലഭിക്കുന്നത്.