'ചേട്ടനെ എന്റെ സിനിമയിൽ കാസ്റ്റ് ചെയ്യുന്നുണ്ടെങ്കിലത് സ്നേഹം കൊണ്ടല്ല, അതിനാൽ വേതനം കൊടുക്കണം'; പൃഥ്വിരാജ്

ഇന്ദ്രജിത്ത് സുകുമാരൻ നല്ല നടനായതുകൊണ്ട് മാത്രമാണ് താൻ അദ്ദേഹത്തെ കാസ്റ്റ് ചെയ്യുന്നതെന്നും എഡിറ്റോറിയലിന് നൽകിയ അഭിമുഖത്തിൽ പൃഥ്വിരാജ് സുകുമാരൻ പറഞ്ഞു. 'എന്റെ സിനിമയിൽ അമ്മയും ചേട്ടനും അഭിനയിക്കുമ്പോൾ അവർക്ക് തീർച്ചയായും ഞാൻ അവർ ചെയ്തതിനുള്ള തുക കൊടുക്കും.'

'എന്റെ സിനിമയിൽ വേതനം കൊടുക്കാതെ ഞാൻ ആരെയും അഭിനയിപ്പിക്കില്ല. എന്റെ ചേട്ടനെ ഞാൻ ഒരു സിനിമയിൽ കാസ്റ്റ് ചെയ്യുന്നുണ്ടെങ്കിൽ അത് അദ്ദേഹത്തിനോടുള്ള സ്നേഹം കൊണ്ടായിരിക്കില്ല.'

'ഇന്ദ്രജിത്ത് സുകുമാരൻ നല്ല നടനായത് കൊണ്ട് മാത്രമാണ് ഞാൻ കാസ്റ്റ് ചെയ്യുന്നത്. അപ്പോൾ ആ നടന് നമ്മൾ വേതനം കൊടുത്തെ പറ്റുകയുള്ളു. ഒരു നടനെന്ന നിലയിൽ അടുത്ത വർഷം എനിക്ക് കുറച്ച് അധികം തിരക്കുണ്ട്. ഒരു ഡയറക്ടർ എന്ന രീതിയിൽ കൂടി തിരക്കുള്ള വർഷമാണ്.'

'മലയാളത്തിൽ ഞാൻ നിർമിക്കാത്ത അഭിനയിക്കുകയും സംവിധാനം നിർവഹിക്കുകയും ചെയ്യുന്ന സിനിമകളിൽ എന്റെ കമ്പനിയുടെ പങ്കാളിത്തം ഉണ്ടാകും. തെരഞ്ഞെടുക്കാത്ത പ്രോജക്ടുകളിൽ അത്തരം കൺട്രോൾ വെക്കുന്നത് എനിക്ക് ഇഷ്ടമുള്ള കാര്യമാണ്.'

'അത് എന്റെ കൂടെ വർക്ക് ചെയ്യുന്ന എല്ലാവർക്കും അറിയുന്നതാണ്. തെരഞ്ഞെടുക്കുന്ന പ്രോജക്ടുകളെ അതിന്റെ മാക്സിമം പൊട്ടൻഷ്യലിൽ എത്തിക്കുക എന്നതാണ് അതുകൊണ്ട് ഞാൻ ഉദ്ദേശിക്കുന്നത്' പൃഥ്വിരാജ് പറഞ്ഞു. സിനിമയിൽ ശ്രദ്ധ കേന്ദ്രീകരിച്ച ശേഷം തന്റെ കുടുംബത്തിന് വേണ്ടി സമയം ചിലവഴിക്കാൻ സാധിക്കാറില്ലെന്ന് അടുത്തിടെ പൃഥ്വിരാജ് പറഞ്ഞിരുന്നു.

'ഷൂട്ടിങ്ങിന്റേയും പ്രൊമോഷന്റേയും ടൈം മാറി പോകുമ്പോള്‍ തെജിക്കപ്പെടുന്നത് നമ്മുടെ പേഴ്‌സണല്‍ ടൈമാണ്.'

'സിനിമ എത്ര ദിവസമാണെന്ന് ചോദിക്കുമ്പോള്‍ ഒരു 55 ദിവസമെന്ന് പറയും. ഒരു പത്ത് ദിവസം കൂടി ആ സിനിമക്ക് വേണ്ടി മാറ്റിവെക്കും. സിനിമ കഴിഞ്ഞാൽ ഫാമിലിയുടെ കൂടെ ട്രിപ്പ് പോവാമെന്ന് തീരുമാനിക്കും.'

'ഒരു പത്ത് ദിവസം ഫാമിലിയുമായിട്ട് ഒന്ന് എവിടെ എങ്കിലും പോകാമെന്ന് നമ്മൾ പ്ലാൻ ചെയ്യുകയും അത് അവരോട് പറയുകയും ചെയ്യും. ഫാമിലിയുമായിട്ടുള്ള ട്രിപ്പ് കഴിഞ്ഞിട്ട് മാത്രമെ അടുത്ത സിനിമക്ക് ജോയിൻ ചെയ്യുന്നുള്ളു എന്നൊക്കെയാണ് ഞാൻ തീരുമാനിക്കുക.'

'പക്ഷെ ചെയ്യുന്ന സിനിമ ചിലപ്പോൾ 20 ദിവസം നീണ്ടുപോകും. പിന്നെ അടുത്ത ചെയ്യാനുള്ള സിനിമയും തുടങ്ങാൻ താമസിക്കും.'

'അതുകൊണ്ട് ഫാമിലിയുമായിട്ടുള്ള ട്രിപ്പ് മാറ്റി വെക്കേണ്ടി വരും. എപ്പോഴും ഈ കാര്യത്തിൽ ബുദ്ധിമുട്ടുക ഫാമിലിയാണ്' എന്നാണ് പൃഥ്വിരാജ് കുറച്ച് ദിവസം മുമ്പ് ഒരു അഭിമുഖത്തിനിടെ പറഞ്ഞത്.