പൃഥ്വിയ്ക്ക് പകരമായിരുന്നു ദിലീപ് എത്തിയത്, ഒരുപാട് സഹായിച്ചു, തുറന്ന് പറഞ്ഞ് സംവിധായകൻ

ലോണെടുക്കാനുള്ള നൊട്ടോട്ടത്തിനിടെയായിരുന്നു ഒരു ദിവസം പ്രതീക്ഷിക്കാതെ ശ്രീനിയേട്ടന്റെ ഫോണ്‍ എത്തിയത്. മുഖവുരയില്ലാതെ തന്നെ ശ്രീനിയേട്ടന്‍ പറഞ്ഞു തുടങ്ങി: എഴുത്ത് തന്നെ പാട്. സംവിധാനം അതിലും പാട്. നിര്‍മാണമാണെങ്കിലോ വലിയ ബുദ്ധിമുട്ടാണ്. അസാധ്യമാണ് ഇതൊക്കെ. ഒരു നിര്‍മാതാവിനെ ഞാന്‍ ശരിയാക്കിത്തരട്ടെ. നീയാകുമ്പോള്‍ എനിക്ക് പൈസ വാങ്ങാനും പറ്റില്ല.തമാശ കലര്‍ത്തിയ ശ്രീനിയേട്ടന്റെ വാക്കുകള്‍ എനിക്ക് വിശ്വസിക്കാന്‍ കഴിഞ്ഞിരുന്നില്ല. സത്യത്തില്‍ അതാണ് ഇന്നുവരെയുളള എന്റെ ജീവിതത്തിലെ ഏറ്റവും വലിയ നിമിഷം. പിന്നെ ദിലീപിനോട് സംസാരിക്കുന്നതെല്ലാം ശ്രീനിയേട്ടനാണ്.

ആദ്യ ഷോട്ടിന് മുന്‍പ് തന്നെ ടെന്‍ഷനായിരുന്നു.ജഗതിച്ചേട്ടന്റെ ഒരു രംഗമായിരുന്നു ആദ്യ ഷോട്ട്. അദ്ദേഹം അവതരിപ്പിക്കുന്ന ആഭ്യന്തരമന്ത്രി തോമസ് ചാക്കോയെ മംമ്തയുടെ അനുരാധ നന്ദന്‍ അഭിമുഖം നടത്തുന്നതാണ് ആദ്യ രംഗം.സീൻ വിശദീകരിക്കാന്‍ ഞാന്‍ എത്തുമ്പോള്‍ അകത്ത് മേക്കപ്പിട്ടുകൊണ്ടിരിക്കുകയായിരുന്നു അദ്ദേഹം. ഞാന്‍ അടുത്ത് ചെന്നിരുന്നു. അഭിനയിക്കേണ്ട രംഗമല്ല അദ്ദേഹം അവതരിപ്പിക്കേണ്ട കഥാപാത്രത്തിന്റെ തുടക്കം മുതൽ പറഞ്ഞു കൊടുത്തു.അതാണ് ഇന്നും എന്റെ പതിവ്. ഒരു കഥാപാത്രത്തെ വിവരിക്കുമ്പോള്‍ അയാളുടെ വിത്തും വേരും വിശദമാക്കും. അത് അഭിനേതാക്കള്‍ക്ക് കാര്യങ്ങള്‍ എളുപ്പമാക്കുമെന്നാണ് ഞാൻ വിശ്വസിക്കുന്നത്- രഞ്ജിത് ശങ്കർ പറഞ്ഞു.

ചിത്രത്തിൽ ദിലീപായിരുന്നു അവസാന ഷോർട്ട്. പെരുമ്പാവൂരിലെ ഒരു ഓട്ടുകമ്പനിയിലായിരുന്നു ഷൂട്ട്.അവസാനരംഗത്ത് ദിലീപിന്റെ നന്ദന്‍ മേനോന്‍ മംമ്തയെ ഫോണില്‍ വിളിക്കുന്ന രംഗമായിരുന്നു.തലേദിവസത്തെ ഷൂട്ടിങ് നീണ്ട് പുലര്‍ച്ചെ നാലു മണിയായി. ഇനിയും ദിലീപിനെ പിടിച്ചു വയ്ക്കുന്നത് ശരിയല്ലെന്ന് തോന്നി. ദിലീപ് പോയ്‌ക്കോട്ടെ നമുക്ക് മറ്റാരുടെയെങ്കിലും കൈവച്ച് ക്ലോസപ്പ് ഷോട്ടെടുക്കാമെന്ന് ഞാന്‍ പറഞ്ഞു. എന്നാല്‍, ദിലീപ് കൂട്ടാക്കിയില്ല. ഇത്രയും ചെയ്യാവുന്ന എനിക്ക് ഇനി ഇത് കൂടി ചെയ്യാനാണോ പാട്. അങ്ങനെയാണ് ആ ചിത്രീകരണം പൂര്‍ത്തിയാക്കിയത്.

ദിലീപിന് പകരം പൃഥ്വിരാജിനെയായിരുന്നു ആദ്യം നിശ്ചയിച്ചത്. എന്നാൽ അപ്പൊഴേയ്ക്കും പൃഥ്വി തെലുങ്കിലും തമിഴിലുമായി തിരക്കിലായി. അങ്ങനെയാണ് ദിലീപിൽ എത്തിയത്.ചൊറിയുന്ന സ്വഭാവമുള്ള ടാക്‌സി ഡ്രൈവറായി ആദ്യം സുരാജിനെയായിരുന്നു കണ്ടുവച്ചിരുന്നത്. എന്നാൽ അപ്പോൾ ദിലീപായിരുന്നു പറഞ്ഞത് കുറച്ചുകൂടി പ്രായമുള്ള കഥാപാത്രമാവാമെന്ന്. അങ്ങനെ നെടുമുടി വേണുച്ചേട്ടനെ ദിലീപ് തന്നെയാണ് സജസ്റ്റ് ചെയ്യുന്നത് കൂടാതെ . സഹസംവിധായകന്റെ അനുഭവസമ്പത്തുളള ദിലീപും സംവിധാനത്തില്‍ ഒരുപാട് സഹായിച്ചിരുന്നു എന്നും രഞ്ജിത്ത് ശങ്കർ പറഞ്ഞു