മോഹന്‍ലാലും സുരേഷ് ഗോപിയും ഒന്നിച്ച സിനിമയിലെ വില്ലന്‍ വേഷം, മറക്കാനാവാത്ത അനുഭവം പറഞ്ഞ് ദിനേഷ് പണിക്കര്‍

'അന്ന് ഒരു ചെറിയ ആക്ടറാണ് ഞാന്‍. എന്നെ വിളിക്കുമ്പോള്‍ കഥയോ ശമ്പളമോ ഒന്നും ഞാന്‍ ചോദിച്ചില്ല. സജി പറവൂര്‍ എന്ന ഡയറക്ടറാണ് വിളിക്കുന്നത്. പടത്തില്‍ ഒരു വേഷമുണ്ട്. കൊളളാവുന്ന ഒരു ക്യാരക്ടറാണ് ചേട്ടാ എന്ന് സജി പറഞ്ഞു. രണ്ട് ദിവസം വേണം. മോഹന്‍ലാല്‍, സുരേഷ് ഗോപി, ബിജു മേനോന്‍ തുടങ്ങിയവരെല്ലം ഉണ്ട്. ആദ്യത്തെ ദിവസം ഒരു സീനാണ് ഉണ്ടായിരുന്നത്. ഞാന്‍ പുതിയൊരു ബിഎംഡബ്യൂ കാറില്‍ വന്ന് ഇറങ്ങുന്നതാണ്'.

'എനിക്ക് സ്ഥിരം കിട്ടാറുളളത് കോടിശ്വരന്‌റെ വേഷം അല്ലെങ്കില്‍ ദുബായില്‍ നിന്ന് വന്നിറങ്ങുന്ന അച്ഛനായിട്ടോ ഒകെയാണ്. അങ്ങനെ രണ്ടാമത്തെ ദിവസമായിട്ടും ജനകനിലെ കഥ എന്താണെന്നോ, വേഷം എന്താണെന്നോ ഞാന്‍ ചോദിച്ചില്ല. കുറെ ആര്‍ട്ടിസ്റ്റുകളുണ്ടായിരുന്നു. അവരൊക്കെ സീന്‍ വായിച്ചുകൊണ്ടിരിക്കുകയാണ്. സുരേഷ് ഗോപിയുമായിട്ട് ഞാന്‍ അടുപ്പമാണല്ലോ, എന്റെ സിനിമകളില്‍ അദ്ദേഹം അഭിനയിച്ചിട്ടുണ്ട്'.

'സുരേഷ് സീന്‍ വായിക്കുന്ന സമയം എന്നെ നോക്കി ചിരിക്കും. അവര് മൂന്ന് പേരും ഇരുന്ന് എന്നെ നോക്കി ചിരിക്കുകയാണ്. ഞാന്‍ വിചാരിച്ചു എന്നെ നോക്കിയിട്ട് എന്തിനാണ് ഇത്ര ചിരിക്കുന്നത്. പിന്നാലെ എന്താണ് സുരേഷേ എന്ന് ഞാന്‍ ചോദിച്ചപ്പോള്‍ സീന്‍ വായിച്ചില്ലെ എന്ന് സുരേഷ് ചോദിച്ചു. ഇല്ലെന്ന് പറഞ്ഞപ്പോള്‍ വായിക്കെന്ന് സുരേഷ് ഗോപി പറഞ്ഞു. അങ്ങനെ സീന്‍ വായിച്ചപ്പോ എന്റെ മുഖം മാറി', ദിനേഷ് പണിക്കര്‍ പറയുന്നു.

'ഞാന്‍ അതില്‍ എറ്റവും വൃത്തികെട്ട വില്ലനാണ്. കൊച്ചിനെ നശിപ്പിക്കുന്ന കഥാപാത്രമായിട്ട്. അങ്ങനെ വല്ലാത്തൊരു വില്ലന്‍ കഥാപാത്രം. ഇത് കണ്ട് പേടിച്ച് എന്നെ കൊണ്ട് ഇതൊക്കെ ചെയ്യാന്‍ പറ്റുമോ എന്ന് ഞാന്‍ ചോദിച്ചു. കാരണം അത്ര വൃത്തികെട്ടവനായിട്ട് അഭിനയിക്കേണ്ടെ. പിന്നെ ഞാന്‍ മനസില്‍ തീരുമാനിച്ചു. എന്തൊക്കെ വന്നാലും ഈ വേഷം ഞാന്‍ നന്നാക്കും. എസ് എന്‍ സ്വാമി സാറാണ് എന്നെ നിര്‍ദ്ദേശിച്ചത്'.

Recommended Video

List Of 10 Highest Paid South Indian Actors 2021 | FilmiBeat Malayalam

'അങ്ങനെ ഞാന്‍ ഈ കഥാപാത്രം എങ്ങനെ നന്നാക്കാമെന്ന് മനസില്‍ ആലോചിച്ച് അത് നല്ല പോലെ ചെയ്തു. ഇന്നും പലരും എന്നോട് പറയാറുണ്ട് ജനകനിലെ തന്റെ പ്രകടനം കണ്ടാല്‍ അടിക്കാനാണ് തോന്നുക എന്ന്. അപ്പോ അത് അത്ര ഭംഗിയാക്കി ചെയ്യാന്‍ പറ്റി എന്നത് ഒരു നടന്‌റെ വിജയമായിട്ടാണ് ഞാന്‍ കാണുന്നത്', അഭിമുഖത്തില്‍ ദിനേഷ് പണിക്കര്‍ പറഞ്ഞു.