'ഒരുമിച്ച് പിറന്നാൾ‌ ആഘോഷിക്കാൻ തുടങ്ങിയിട്ട് 15 വർഷം, നിന്നോടൊപ്പം ആയിരിക്കുന്നത് അനു​ഗ്രഹമാണ്'; സുപ്രിയ!

വളരെ ചുരുങ്ങിയ കാലയളവിൽ തന്നെ തെന്നിന്ത്യയിൽ തൻ്റേതായ വ്യക്തിമുദ്ര പതിപ്പിച്ച താരം ഇന്ന് നാൽപതാം ജന്മദിനമാണ് ആഘോഷിക്കുന്നത്. നിരവധി ആരാധകരും പൃഥ്വിരാജിന് ആശംസകളുമായി രംഗത്തെത്തിയിട്ടുണ്ട്. അക്കൂട്ടത്തിൽ താരത്തിന്റെ ഭാര്യയും നിർമാതാവുമായ സുപ്രിയ മേനോൻ പങ്കുവെച്ച കുറിപ്പാണ് ശ്രദ്ധ നേടുന്നത്.

പതിനഞ്ച് വർഷമായി പൃഥ്വിക്കൊപ്പം സഞ്ചരിക്കുന്നതിന്റെ നല്ല ഓർമകളെ കുറിച്ചാണ് കുറിപ്പിൽ സുപ്രിയ എഴുതിയിരിക്കുന്നത്. ഒപ്പം നല്ല പാതിക്കൊപ്പമുള്ള ചിത്രങ്ങളും പൃഥ്വിരാജ് പങ്കുവെച്ചു.

'15 വർഷമായി നമ്മൾ ഒരുമിച്ച് പിറന്നാൾ ആഘോഷിക്കുവാൻ തുടങ്ങിയിട്ട്. 25-ാമത്തെ പിറന്നാൾ മുതൽ 40-ാമത്തെ പിറന്നാൾ വരെ. നമ്മൾ ഒരുമിച്ച് ചെയ്ത യാത്രകൾ വളരെ സ്പെഷ്യലും പേഴ്സണലും ആയിരുന്നു.'

'ജീവിതത്തിലും പ്രൊഫഷനിലും നിങ്ങൾ കൂടുതൽ കരുത്തൻ ആകുന്നത് സാക്ഷ്യം വഹിക്കുവാൻ സാധിച്ചത് ഒരു അനുഗ്രഹം തന്നെയായിരുന്നു. പിറന്നാൾ ആശംസകൾ പി.... അടുത്ത ദശാബ്ദം കൂടുതൽ സ്നേഹവും സന്തോഷവും ഫ്രണ്ട്ഷിപ്പും സിനിമയും ജീവിതവും നിറഞ്ഞത് ആവട്ടെ.'

'എപ്പോഴും ഒരുമിച്ച് കൈകോർത്ത് മുന്നോട്ട് പോകാം. ഐ ലവ് യു' എന്നാണ് സുപ്രിയ മേനോൻ ഇൻസ്റ്റാഗ്രാമിൽ കുറിച്ചത്. സുപ്രിയയുടെ ഹൃദയസ്പർശിയായ കുറിപ്പ് അതിവേ​ഗത്തിൽ വൈറലായി.

സിനിമയുമായി യാതൊരു ബന്ധവുമില്ലാതെ കഴിഞ്ഞിരുന്ന സുപ്രിയ പൃഥ്വിരാജിനെ വിവാഹം ചെയ്ത ശേഷമാണ് സിനിമ നിർമാണത്തിലേക്ക് കടന്നത്. പൃഥ്വിയുടെ ഉടമസ്ഥതയിലുള്ള പൃഥ്വിരാജ് പ്രൊഡക്ഷൻസ് നിയന്ത്രിക്കുന്നതും സുപ്രിയയാണ്.

ബിബിസിയിലെ മാധ്യമപ്രവർത്തകയായിരുന്ന സുപ്രിയയും പൃഥ്വിരാജും ഏറെ നാളത്തെ പ്രണയത്തിന് ശേഷമാണ് വിവാഹിതരായത്. ഇരുവർക്കും അലംകൃത എന്നൊരു മകൾ മാത്രമാണുള്ളത്.

അതേസമയം പൃഥ്വിക്ക് പിറന്നാൾ ആശംസകൾ നേർന്നുകൊണ്ട് താരത്തിന്റെ പുതിയ തെലുങ്ക് ചിത്രമായ സലാറിലെ കാരക്റ്റർ പോസ്റ്റർ പുറത്തിറങ്ങിയിട്ടുണ്ട്. കെജിഎഫ് സീരിസ് സംവിധായകനായ പ്രശാന്ത് നീൽ തിരക്കഥയെഴുതി സംവിധാനം ചെയ്യുന്ന ചിത്രമാണ് സലാർ. പ്രഭാസാണ് ചിത്രത്തിലെ നായകൻ.

വരദരാജ മന്നാർ എന്ന കഥാപാത്രമായാണ് പൃഥ്വി എത്തുന്നത്. മൂക്ക് കുത്തി, മുഖത്ത് മുറിപ്പാടുകളോടെയുള്ള പരുക്കൻ ലുക്കിലാണ് താരം പോസ്റ്ററിൽ പ്രത്യക്ഷപ്പെട്ടിരിക്കുന്നത്. കഴുത്തിൽ കട്ടിയുള്ള പ്രത്യേക ആഭരണവും ധരിച്ചിട്ടുണ്ട്.

വില്ലനായിട്ടാണോ പൃഥ്വി എത്തുന്നത് എന്നാണ് പോസ്റ്റർ പുറത്തുവന്നതിനുശേഷം സമൂഹ മാധ്യമങ്ങളിലെ പ്രധാന ചർച്ച. ഹോംബാലെ ഫിലിംസിന്റെ ബാനറിൽ വിജയ് കിര​ഗണ്ടൂരാണ് സലാറിന്റെ നിർമാണം. 2023 സെപ്റ്റംബർ 28ന് ചിത്രം തിയേറ്ററുകളിലെത്തും.