ഇവൻ കയറി വരുന്നു, ഇത് പ്രതീക്ഷിച്ചില്ല; ബി​ഗ് ബോസിലൂടെ പലരും ശ്രമിച്ചു, പക്ഷെ...; സാ​ഗർ സൂര്യയുടെ വിജയം ചർച്ച

കരിയറിൽ മികച്ച റോളുകളുമായി മുന്നേറി നടൻ സാ​ഗർ സൂര്യ. നടന്റെ പുതിയ ചിത്രം പ്രകമ്പനം തിയറ്ററിൽ പ്രദർശനം തുടരുകയാണ്. ​ഗണപതി, സാ​ഗർ സൂര്യ, അമീൻ എന്നിവരാണ് ചിത്രത്തിൽ പ്രധാന വേഷങ്ങൾ ചെയ്തത്. സാ​ഗർ സൂര്യയുടെ തകർപ്പൻ പ്രകടനമാണ് പ്രകമ്പനത്തിലെന്ന് സോഷ്യൽ മീഡിയയിൽ അഭിപ്രായങ്ങൾ വരുന്നുണ്ട്. സാ​ഗർ സൂര്യയുടെ കരിയറിലെ വളർച്ച പലരും അത്ഭുതത്തോടെയാണ് നോക്കുന്നത്. ടെലിവിഷൻ രം​ഗത്ത് നിന്നും വരുന്ന സാ​ഗർ സൂര്യക്ക് ഇത്ര പെട്ടെന്ന് സിനിമാ രം​ഗത്ത് സ്ഥാനം ലഭിക്കുമെന്ന് പലരും കരുതിയില്ല.

പണി എന്ന സിനിമയിലെ വില്ലൻ വേഷത്തിന് ശേഷമാണ് പ്രകമ്പനവുമായി സാ​ഗർ സൂര്യ പ്രേക്ഷകർക്ക് മുമ്പിലെത്തിയത്. തട്ടീം മുട്ടീം എന്ന സിറ്റ്കോമിലൂടെയാണ് സാ​ഗർ സൂര്യ ടെലിവിഷൻ രം​ഗത്ത് ജനശ്രദ്ധ നേടിയത്. പിന്നീട് കുരുതി എന്ന സിനിമ ചെയ്തു. ബി​ഗ് ബോസ് മലയാളത്തിൽ മത്സരാർത്ഥിയായെത്തി. പിന്നീട് പണിയിൽ വില്ലൻ വേഷം. കമൽ ഹാസന്റെയുൾപ്പെടെ പ്രശംസ നേടിയ പെർഫോമൻസാണ് പണിയിൽ സാ​ഗർ സൂര്യ കാഴ്ച വെച്ചത്. ടെലിവിഷൻ രം​ഗത്ത് സിനിമ സ്വപ്നം കാണുന്ന നിരവധി പേരുണ്ട്. പലരും ബി​ഗ് ബോസിൽ മത്സരാർത്ഥിയായെത്തുന്നതും സിനിമ സ്വപ്നവുമായാണ്.

ഇൻഫ്ലുവൻസർമാരിൽ നിരവധി പേർ കഴിഞ്ഞ രണ്ട് മൂന്ന് വർഷത്തിനുള്ളിൽ സിനിമകളിൽ അഭിനയിച്ചു. എന്നാൽ ഇവർക്കാർക്കും തന്നെ എടുത്ത് പറയത്തക്ക റോളുകൾ ലഭിച്ചിട്ടില്ല. ഇതിനിടെയാണ് സാ​ഗർ സൂര്യ ​ഹിറ്റുകളുമായി മുന്നേറുന്നത്. സന്ദീപ് പ്രദീപിനെ പോലെ മുൻനിര നായക നടനായി മാറാൻ സാ​ഗർ സൂര്യക്ക് സാധിക്കുമോ എന്ന ചോദ്യം വരുന്നുണ്ട്. മലയാളത്തിലെ നിലവിലെ യുവതാരങ്ങളുമായി സാ​ഗറിനെ താരതമ്യം ചെയ്ത് കൊണ്ടുള്ള ചർച്ചകൾ റെഡിറ്റിൽ നടക്കുന്നുണ്ട്.