'എല്ലാ സാഹചര്യങ്ങളിലും ചേര്‍ത്ത് നിര്‍ത്തുന്ന ലീലാമ്മയോടും ജിഞ്ചുവിനോടും എന്ത് പറയും?'; കാലടി ജയനെ കുറിച്ച് ഉമ

'പ്രണാമം അങ്കിൾ... എന്റെ അഭിനയ ജീവിതത്തിൽ മികച്ച നായിക കഥാപാത്രങ്ങൾ അതിനുപരി വ്യക്തിപരമായി എനിക്ക് എന്റെ കുടുംബം പോലെ മറ്റൊരു കുടുംബം... അമ്മ, അനുജത്തി, ഏട്ടൻ അങ്ങനെ എല്ലാം നൽകിയത് അങ്കിളാണ്. ഇന്നും എനിക്ക് എല്ലാ സാഹചര്യങ്ങളിലും ഓടി ചെന്നാൽ ചേർത്ത് നിർത്തുന്ന ലീലാമ്മയോടും ജിഞ്ചുവിനോടും എന്ത്‌ പറയണം എന്നറിയില്ല.'

'അങ്കിളിന് പെട്ടെന്ന് ദേഷ്യം വരും. അതുപോലെ സ്നേഹത്തോടെ പെരുമാറും. ഇനി ഇല്ല എന്നത് സത്യമാണ്. പ്രാർത്ഥനകൾ മാത്രമായി...' എന്നാണ് ഉമ നായർ കാലടി ജയനെ കുറിച്ച് എഴുതിയത്.

അർത്ഥം, മഴവിൽക്കാവടി, സിബിഐ ഡയറിക്കുറിപ്പ്, തലയണമന്ത്രം, ജാഗ്രത, കളിക്കളം, ചെറിയ ലോകവും വലിയ മനുഷ്യരും, വ്യൂഹം, ഏകലവ്യൻ, ജനം തുടങ്ങി നിരവധി സിനിമകളിൽ അഭിനയിച്ചിട്ടുണ്ട് കാലടി ജയൻ. സീരിയൽ നിർമാതാവായും പ്രവർത്തിച്ചിട്ടുണ്ട്.

വാനമ്പാടി, കളിവീട് തുടങ്ങി നിരവധി സീരിയലുകളിലൂടെ ശ്രദ്ധേയയായ നടിയാണ് ഉമ നായര്‍. മിനിസ്ക്രീൻ പ്രേക്ഷകർക്ക് ഏറെ സുപരിചിതമായ മുഖമാണ് ഉമയുടേത്. അന്തരിച്ച മുന്‍കാല നടന്‍ ജയന്‍ തന്റേയും വല്യച്ഛനാണെന്ന് ഉമ ഒരു അഭിമുഖത്തില്‍ പറഞ്ഞത് വലിയ വിവാദമായിരുന്നു.

കൃഷ്ണന്‍നായര്‍ എന്ന ജയന്റെ അനിയന്റെ മക്കള്‍ ഞങ്ങളാണെന്നും ഇങ്ങനൊരാള്‍ ഞങ്ങളുടെ കുടുംബത്തില്‍ ഇല്ലെന്നുമൊക്കെ വാദിച്ച് സീരിയല്‍ നടന്‍ ആദിത്യന്‍ ജയന്‍ അടക്കം അന്ന് ഉമയ്ക്കെതിരെ രംഗത്ത് വന്നിരുന്നു. ആദിത്യന്റെ സഹോദരിയും ഈ വിഷയത്തില്‍ ഇടപ്പെട്ടിരുന്നു.

'ജയന്റെ ബന്ധുവാണെന്ന് പറഞ്ഞതിന്റെ പേരില്‍ ഒരുപാട് പ്രശ്‌നങ്ങളുണ്ടായി. അന്ന് ഞാന്‍ വിഷമിക്കുകയും ചെയ്തിരുന്നു. പിന്നീട് ആദിത്യന്‍ ചേട്ടനുമായി സംസാരിക്കുകയൊക്കെ ചെയ്തു. അതങ്ങനെ കെട്ടടങ്ങി പോയി.'

'അതിലൊരു സന്തോഷമുള്ളത് ഉമ നായര്‍ എന്ന പേരടിക്കുമ്പോള്‍ ഏറ്റവും കൂടുതല്‍ കാണുന്നത് ഈ വാര്‍ത്തയാണ്. എന്റെ ഈ പ്രശ്‌നത്തെ വാര്‍ത്തകളാക്കി ചെയ്ത ഒരുപാട് പേരുണ്ട്.'

'അവരൊക്കെ രക്ഷപ്പെട്ടതില്‍ എനിക്ക് സന്തോഷമാണ് എന്നാണ് വിഷയത്തിൽ പ്രതികരിച്ച്' ഉമ നായർ പറഞ്ഞത്. തന്റെ വിവാഹ ജീവിതത്തിൽ ഉണ്ടായ പ്രശ്നങ്ങളെ കുറിച്ചും മുമ്പ് പലപ്പോഴും ഉമ നായർ സംസാരിച്ചിട്ടുണ്ട്. മക്കൾ മാത്രമാണ് ഇപ്പോൾ ഉമയ്ക്ക് താങ്ങായുള്ളത്.

താന്‍ പ്രണയിച്ച് വിവാഹം കഴിച്ചയാളാണ്. അതിന് ശേഷം നിരവധി സങ്കടങ്ങള്‍ നേരിടേണ്ടി വന്നു. തന്റെ പേഴ്‌സണല്‍ ലൈഫില്‍ വേദനിക്കേണ്ടി വന്നത് മുതലാണ് പലതും മനസിലായത്. തന്റെ മാത്രം തീരുമാനം കൊണ്ട് വിവാഹം കഴിഞ്ഞതാണല്ലോ.

അതുകൊണ്ട് അച്ഛനേയോ അമ്മയേയോ സഹോദരങ്ങളെയോ ഒന്നും കുറ്റപ്പെടുത്താനാവില്ല. അതിനാല്‍ കുടുംബ ജീവിതത്തില്‍ വേദന വരുമ്പോള്‍ അത് തന്റെ മാത്രം പ്രശ്‌നമാണ്. താന്‍ കാട്ടില്‍ അകപ്പെട്ട പോലെയായിരുന്നു എന്നാണ് ഉമ നായർ പറഞ്ഞത്.