'ചിലരൊക്കെ പറ്റിച്ച് കൊണ്ടുപോയ കാശുകൂടി ഉൾപ്പെടുത്തിയാണ് മൂന്ന് കോടിയുടെ വീടെന്ന് പറഞ്ഞത്'; അനു ജോസഫ്

പുതിയ സ്ഥലം വാങ്ങിയാണ് താരം വീട് പണിയുന്നത്. പണി എല്ലാം തീർത്തിട്ട് പൂർണ്ണമായും കാണിക്കുമെന്നും രാവിലെ എണീക്കുമ്പോൾ തന്നെ വലിയ പോസിറ്റിവിറ്റി ലഭിക്കുന്ന രീതിയിലാണ് വീട് സെറ്റ് ചെയ്‍രിക്കുന്നതെന്നും നേരത്തെ പങ്കുവെച്ച വീഡിയോയിൽ അനു പറഞ്ഞിരുന്നു.

അതേസമയം മൂന്ന് കോടിയുടെ വീട് പണിയാൻ തുടങ്ങിയപ്പോൾ മുതൽ താൻ അനുഭവിക്കുന്ന ബുദ്ധിമുട്ടുകളെ കുറിച്ച് വെളിപ്പെടുത്തിയിരിക്കുകയാണ് ഇപ്പോൾ അനു ജോസഫ്.

ബി​ഗ് ബോസ് മലയാളത്തിലൂടെ പ്രശസ്തരായ കപ്പിളായ ഫിറോസിനേയും സജിനയേയും കാണാൻ പോയപ്പോഴാണ് വീട് പണി തുടങ്ങിയപ്പോൾ മുതൽ തനിക്ക് വന്നിട്ടുള്ള നഷ്ടങ്ങളെ കുറിച്ച് അനു ജോസഫ് മനസ് തുറന്നത്.

സ്ഥലം വാങ്ങിയതും പല പേരും പറഞ്ഞ് പണിക്കാരിൽ ചിലർ പറ്റിച്ചുകൊണ്ടുപോയ കാശടക്കം ഉൾപ്പെടുത്തിയാണ് മൂന്ന് കോടിയുടെ വീടെന്ന് പറഞ്ഞത് എന്നാണ് അനു ജോസഫ് ഫിറോസും സജ്നയുമായി സംസാരിക്കവെ പറഞ്ഞത്. 'ഞാൻ വീടുവെക്കുന്ന ഒരാളാണ്. അതുകൊണ്ട് ആ വിഷമം എനിക്ക് മനസിലാകും.'

'വീടിന്റെ ഔട്ടർ ചെയ്ത് കഴിഞ്ഞപ്പോൾ ഒരുമാതിരി പ്രശ്നമൊക്കെ തീർന്നുവെന്ന് ഞാൻ വിചാരിച്ചിരുന്നു. പക്ഷെ പിന്നീടങ്ങോട്ട് പ്ലബ്ലിങ്, വയറിങ് ചെയ്യുന്നവർ തമ്മിലുള്ള തർക്കമൊക്കെയാണ് നടന്നത്. അവർ തമ്മിൽ കുറ്റപ്പെടുത്തിയാണ് ഓരോ കാര്യങ്ങൾ ചെയ്യുന്നത്.'

'ചില പണികളൊന്നും അതുകൊണ്ട് പൂർത്തിയാകുന്നില്ല. നമ്മൾ വർഷാ വർഷം വീടുവെക്കുന്നവരല്ലല്ലോ. എന്റെ വീടിനും കോൺട്രാക്ടറല്ല ചെയ്തത്. എന്റെ വീടിന്റെ സ്ട്രക്ചർ സുനിൽ എന്നൊരാൾ ചെയ്ത് തന്നു. ഞാനും വീട് പണിത് പറ്റിക്കപ്പെടുന്നുണ്ട്. ഗ്ലാസാണ് എന്റെ വീട്ടിൽ ഏറെയും ചെയ്തിരിക്കുന്നത്.'

'ഞാൻ‌ നേരത്തെ അധികം ആരോടും ദേഷ്യപ്പെടാറുണ്ടായിരുന്നില്ല. എന്നാൽ വീട് പണി തുടങ്ങിയ ശേഷം എനിക്ക് പലരോടും ദേഷ്യപ്പെടേണ്ട അവസ്ഥയാണ്. ഇലക്ട്രിക്ക് വർക്ക് പകുതിയായപ്പോഴക്കും ഒരുപാട് പണം ചിലവായി. അതോടെ എനിക്ക് സംശയമായി എങ്ങ‌നെയാണ് ഇത്രയും പണം ചിലവാകുന്നതെന്ന്.'

'ഇലക്ട്രിക്ക് വർക്കുകൾ ചെയ്യുന്നയാൾ‌ എൺപതിനായിരം രൂപയ്ക്ക് സാധനങ്ങൾ വാങ്ങി. അതേ സാധനങ്ങൾ എനിക്ക് പരിചയമുള്ള ഒരു കടയിൽ ചോദിച്ചപ്പോൾ വില 250000രൂപ മാത്രമെ വരുന്നുള്ളു. അപ്പോൾ മുതൽ പറ്റിക്കപ്പെടുകയാണ് മനസിലായി.'

'മൂന്ന് കോടിയുടെ വീടാണെന്ന് ഞാൻ പറഞ്ഞത് ഇവരെല്ലാം പറ്റിച്ചെടുത്ത തുക കൂടി കൂട്ടിയാണ്. വീട് വെക്കാൻ ഭൂമി വാങ്ങിയപ്പോഴും നല്ല പണം ചിലവായിരുന്നു. പണിക്കാർ പറയുന്നത് നമ്മൾ അങ്ങ് വിശ്വസിക്കുകയാണ്. നമുക്ക് ഇത് ചെയ്ത് മുൻ പരിചയമില്ല.'

'ഒരു മനുഷ്യന്റെ സ്വപ്നവും പ്രതീക്ഷയുമാണ് ഒരു വീട്. അതുകൊണ്ട് ഉടമകളെ കോൺട്രാക്ടർമാർ പറ്റിക്കരുതെന്നാണ് എനിക്ക് അഭ്യർഥിക്കാനുള്ളത്' അനു ജോസഫ് വീ‍ഡിയോയിൽ സംസാരിച്ചുകൊണ്ട് പറഞ്ഞു.