ഭാര്യയുള്ളയാളെ വിവാഹം ചെയ്തു, ചെയ്തത് തെറ്റാണെന്ന് ഷീല പിന്നീട് ചിന്തിച്ചു; ശ്രദ്ധ നേടി ജയന്തിയുടെ വാക്കുകൾ

മലയാളികൾക്ക് പ്രിയങ്കരിയാണ് നടി ഷീല. പഴയ കാല നായിക ന‌ടിയായ ഷീലയ്ക്ക് സിനിമാ രം​ഗത്ത് ബഹുമാന്യ സ്ഥാനം ഇപ്പോഴുമുണ്ട്. തുറന്ന് സംസാരിക്കുന്ന ആളാണെങ്കിലും തന്റെ വിവാഹത്തെക്കുറിച്ചും വേർപിരിഞ്ഞതിനെക്കുറിച്ചും ഷീല സംസാരിക്കാറില്ല. അന്തരിച്ച നടൻ രവിചന്ദ്രനായിരുന്നു ഷീലയുടെ ഭർത്താവ്. ജോർജ് എന്നാണ് ഇവർക്ക് പിറന്ന മകന്റെ പേര്. ഷീലയുടെ ജീവിതത്തെക്കുറിച്ച് നടിയെ അടുത്തറിയാവുന്ന ജയന്തി കണ്ണപ്പൻ ഒരിക്കൽ സംസാരിച്ചിട്ടുണ്ട്. ഇവരുടെ വാക്കുകൾ വീണ്ടും ശ്രദ്ധ നേടുകയാണ്.

പിരിയാൻ പറ്റാത്ത വിധം അടുത്തതോടെ വിവാഹിതനാണെന്ന് അറിഞ്ഞ് കൊണ്ട് ഷീല രവിചന്ദ്രനെ വിവാഹം ചെയ്തു. ഒരു മകൻ അവർക്ക് പിറന്നു. പ്രണയത്തിലായിരിക്കുമ്പോൾ പങ്കാളിയു‌ടെ തെറ്റുകൾ മനസിലാക്കില്ല. പിന്നീടാണ് മനസിലാക്കുക. രവിചന്ദ്രന് രണ്ട് കുടുംബങ്ങളും നോക്കേണ്ടി വന്നു. ആദ്യ വിവാഹ ബന്ധത്തിൽ അദ്ദേഹത്തിന് മൂന്ന് മക്കളാണ്. പൊതുവെ രണ്ട് വിവാഹം ചെയ്യുന്നവർക്ക് അവിടെയും ഇവിടെയും എന്ന് പറ‍ഞ്ഞ് ഒരു പ്രശ്നമുണ്ടാകും. പിരിഞ്ഞ ശേഷം ഷീല കുഞ്ഞിനൊപ്പം ജീവിച്ചു. ഞാൻ ചെയ്തതും തെറ്റാണ് എന്ന് അവർ ചിന്തിച്ച കാലങ്ങളുണ്ട്. മകനെ ഒറ്റയ്ക്ക് വളർത്തി.

ഷീലയുമായി പിരിഞ്ഞ ശേഷം രവിചന്ദ്രൻ ആദ്യ ഭാര്യ വിമലയ്ക്കൊപ്പമായിരുന്നു കഴിഞ്ഞത്. മരിക്കുന്നതിന് മുമ്പ് സുഖമില്ലാതെ അ​ദ്ദേഹം ആശുപത്രിയിലായിരുന്നു. ഞങ്ങളെല്ലാം പോയി കണ്ടു. മനസിലാകുന്നുണ്ടെങ്കിലും സംസാരിക്കാനാകുന്നില്ല. അവസാന നാളുകളിൽ അദ്ദേഹം മരണവുമായി മല്ലിടുന്നത് പോലെ തോന്നി. വിമല എന്നോട് സംസാരിച്ചു. അദ്ദേഹത്തിന് ഷീലയിലുണ്ടായ മകനെ കാണണമെന്ന് ആ​ഗ്രഹമുണ്ടെന്ന് തോന്നുന്നു, അവസാന ആ​ഗ്രഹം സാധിക്കാത്തത് കൊണ്ടാണ് ജീവൻ പോകാത്തതെന്ന് തോന്നുന്നു. മകനെ കാണിക്കാൻ ഏർപ്പാട് ചെയ്യുമോ എന്ന് വിമല എന്നോട് ചോദിച്ചു.

ഷീലയോട് ഇക്കാര്യം പറഞ്ഞപ്പോൾ എന്താണങ്ങനെ ചോദിക്കുന്നത്, അദ്ദേഹത്തിന്റെ മകനല്ലേ, എനിക്കൊരു പ്രശ്നവും ഇല്ല, നീ തന്നെ അവനെ കൂട്ടിക്കൊണ്ട് പൊയ്ക്കോ, എന്തൊക്കെയായാലും സ്വന്തം അച്ഛനല്ലേ. മകനും കാണണമെന്ന് ആ​ഗ്രഹമുണ്ടാകും എന്ന് പറഞ്ഞു. അങ്ങനെ ജോർജിനെ താൻ വന്ന് കൂട്ടിക്കൊണ്ട് പോയി പിതാവിനെ കാണിച്ചെന്നും ജയന്തി കണ്ണപ്പൻ പറഞ്ഞു. അഭിനയ രം​ഗത്ത് പഴയത് പോലെ സജീവമല്ല ഷീല ഇന്ന്. ചെന്നെെയിൽ മകനൊപ്പമാണ് നടി താമസിക്കുന്നത്. പ്രാരാബ്ദങ്ങൾ കാരണം ചെറുപ്രായത്തിൽ സിനിമാ രം​ഗത്തേക്ക് വന്നതാണ് ഷീല. സിനിമാ ലോകം ഷീലയുടെ ജീവിതം മാറ്റിമറിച്ചു.