അന്നത്തെ അഭിമുഖത്തില്‍ സംഭവിച്ചത് ഇതാണ്; വെളിപ്പെടുത്തി ഷൈന്‍ ടോം ചാക്കോ, വിഷമമില്ലെന്ന് നടന്‍

നടന്റെ വാക്കുകള്‍ ഇങ്ങനെ... ''തല്ലുമാലയുടെ ഷൂട്ടിനിടയിലാണ് കാലിന്റെ ലിഗമെന്റിന് പരിക്ക് പറ്റിയത്. അന്നത്തെ അഭിമുഖം ഷൂട്ട് ചെയ്തവര്‍ കണ്ടതാണ്, ഞാന്‍ ആശുപത്രിയില്‍ പോകുന്നതും അവിടേക്ക് വൈകി വന്നതും. എന്നെക്കുറിച്ചോ എന്റെ സ്വഭാവത്തെക്കുറിച്ചോ ആളുകള്‍ ചര്‍ച്ച ചെയ്യുന്നതില്‍ എനിക്ക് പ്രശ്‌നമൊന്നുമില്ല. ഫെബ്രുവരി 21ന് ഉച്ചയ്ക്കാണ് സംഭവം നടക്കുന്നത്. അന്ന് വെയില്‍ സിനിമയുടെ പ്രമോഷന്‍ പ്ലാന്‍ ചെയ്തിരുന്നു. അന്ന് ഉച്ചയ്ക്കാണ് എനിക്കിത് സംഭവിക്കുന്നത്. ഞാന്‍ ആശുപത്രിയില്‍ പോയി തിരിച്ചു വന്നപ്പോഴേക്കും വൈകുന്നേരമായി. പ്രമോഷന്‍ ഷൂട്ടിന് ക്ഷണിച്ചവരെല്ലാം അവിടെ കാത്തിരിക്കുന്നുണ്ടായിരുന്നു. അത്രയും ആളുകളെ കാത്തിരിപ്പിച്ചിട്ട് അഭിമുഖം കൊടുക്കാതിരിക്കുന്നത് മോശമല്ലേ എന്നു തോന്നി.

ഒരോ മണിക്കൂര്‍ കഴിയുമ്പോഴും കാലിലെ വേദന കൂടി വരുമെന്ന് ഡോക്ടര്‍ പറഞ്ഞിരുന്നു. പരുക്ക് സംഭവിച്ചതിനേക്കാള്‍ വേദനയാണ് പിന്നീട്. അതുകൊണ്ട് ഡോക്ടര്‍ പെയിന്‍ കില്ലര്‍ തന്നിരുന്നു. അതു കഴിച്ചിട്ട് ഉറക്കമൊക്കെ വരുന്നുണ്ടായിരുന്നു. സിനിമയുടെ പ്രമോഷനില്‍ പങ്കെടുക്കേണ്ടത് അഭിനേതാവ് എന്ന നിലയില്‍ എന്റെ കടമയല്ലേ എന്നോര്‍ത്തിട്ടാണ് അഭിമുഖത്തിന് ചെന്നിരുന്നത്. ഇനിയിപ്പോള്‍ ആളുകള്‍ എന്തെങ്കിലും കമന്റുകള്‍ പറഞ്ഞാലും കുഴപ്പമില്ല. ആളുകളെ എന്റര്‍ടെയ്ന്‍ ചെയ്യിപ്പിക്കാന്‍ വേണ്ടിയാണല്ലോ നമ്മളുള്ളത്... അ്ന്ന് നടന്ന സംബവത്തെ കുറിച്ച് നടന്‍ പറയുന്നു.

ഭീഷ്മ പര്‍വത്തിലെ ആ വൈറല്‍ സ്റ്റെപ്പിന് പിന്നിലെ കഥയും നടന്‍ പറഞ്ഞിരുന്നു.സൗബിനും താനുമൊക്കെ കൂടുന്ന സമയത്ത് തമാശയ്ക്ക് കാട്ടാറുള്ള ഒരു ആക്ഷന്‍ ആണ് അതെന്നാണ് ഷൈന്‍ പറയുന്നത്. ''അതിനെ സ്റ്റെപ്പ് എന്നൊന്നും പറയാന്‍ പറ്റില്ല. പോള്‍ ഡാന്‍സിലൊക്കെ കാണിക്കുന്ന ഒരു ആക്ഷന്‍ ആണ്. ഇതിനെപ്പറ്റി സൗബിന് അറിയാം. ഭീഷ്മ പര്‍വത്തിലെ ബോട്ടു ജെട്ടി സീന്‍ എടുക്കുന്ന സമയം. ആ സീനിന്റെ ഷൂട്ടിന് ഇടയില്‍ ഒരു ബ്രേക്ക് കിട്ടി. ഞാനും സൗബിനുമൊക്കെ ഉണ്ട്. അപ്പോള്‍ സൗബിന്‍ പറഞ്ഞു, നീ നമ്മുടെ ആ സ്റ്റെപ്പ് അമലേട്ടന് ഒന്നു കാണിച്ചു കൊടുത്തേ, എന്ന്. ഞാന്‍ അതു ചെയ്തു കാണിച്ചു.

Recommended Video

ഭീഷ്മപർവ്വത്തിൽ മമ്മൂക്കയെ വെല്ലുമോ? | Shine Tom Chacko Exclusive Interview | Filmibeat Malayalam

അതു കണ്ടതും അമലേട്ടന്‍ ചിരിയോടു ചിരി. 'ഇത് നമുക്ക് ആ സീനില്‍ കേറ്റാം' എന്നായി അദ്ദേഹം. അങ്ങനെയാണ് റംസാനെ ഞാന്‍ ചെന്ന് ഡാന്‍സ് പഠിപ്പിക്കുന്ന രീതിയിലേക്ക് ആ സീന്‍ വന്നത്. കൂടാതെ ആ പാട്ടും വളരെ നല്ലതായിരുന്നു. ഉണ്ണി മേനോന്റെ ശബ്ദം ആ കാലഘട്ടത്തിലേക്ക് നമ്മെ കൃത്യമായി കൊണ്ടുപോകുന്നതായി. ആ പാട്ട് നല്ല രീതിയില്‍ അവതരിപ്പിക്കപ്പെട്ടിട്ടുണ്ട്. സുമേഷും ജിഷ്ണുവുമാണ് കൊറിയോഗ്രഫി ചെയ്തത്. അവരുടെ ഒന്നു രണ്ടു വിഡിയോസ് കണ്ടിട്ടാണ് അമലേട്ടന്‍ അവരെ സിനിമയിലേക്ക് ക്ഷണിച്ചത്. അവര്‍ ചെയ്ത സ്റ്റെപ്പുകളൊക്കെ കിടിലാണെന്നും താരം അഭിമുഖത്തില്‍ പറയുന്നു.