രതി ചേച്ചി സ്വർ​ഗത്തിലിരുന്ന് എന്ത് ചെയ്യുന്നു; ഇപ്പോഴും സിനിമ ആരും മറന്നില്ലെന്ന് ശ്വേത മേനോൻ

കാമസൂത്രയുടെ പരസ്യത്തിൽ അഭിനയിച്ചതായിരുന്നു വിവാദത്തിന് തിരികൊളുത്തിയത്. എന്നാൽ ഇതൊന്നും ശ്വേതയെ ബാധിച്ചില്ല. അനശ്വരത്തിന് ശേഷമുള്ള രണ്ടാം വരവിൽ കൈ നിറയെ സിനിമകൾ മലയാളത്തിൽ നിന്നും ശ്വേതയ്ക്ക് ലഭിച്ചു. സോൾട്ട് ആന്റ് പെപ്പർ, ഒഴിമുറി, കയം, പാലേരി മാണിക്യം, രതിനിർവേദം തുടങ്ങിയ സിനിമകളിൽ ശ്രദ്ധേയ വേഷം ശ്വേത മേനോൻ ചെയ്തു. 2009 ലും 2011 ലും മികച്ച നടിക്കുള്ള സംസ്ഥാന സർക്കാരിന്റെ പുരസ്കാരവും ശ്വേത മേനോന് ലഭിച്ചു.

മലയാളത്തിൽ ശ്വേത അഭിനയിച്ചതിൽ തരം​ഗമായ ഒരു സിനിമ ആയിരുന്നു രതി നിർവേദം. 2011 ലാണ് ഈ സിനിമ പുറത്തിറങ്ങിയത്. സിനിമയിൽ നടി രതി എന്ന കഥാപാത്രത്തെ ആയിരുന്നു അവതരിപ്പിച്ചത്. 1978 ൽ പുറത്തിറങ്ങിയ സിനിമയുടെ റീമേക്ക് ആയിരുന്നു ഇത്. ജയഭാരതി ആയിരുന്നു പഴയ രതിനിർവേദത്തിലെ നായിക. റീമേക്കിലെ ശ്വേതയുടെ ​ഗ്ലാമറസ് രം​ഗങ്ങളും ​ഗാനങ്ങളുമെല്ലാം ഏറെ ശ്രദ്ധ നേടിയിരുന്നു. ഇപ്പോഴിതാ സിനിമയെക്കുറിച്ച് സംസാരിച്ചിരിക്കുകയാണ് ശ്വേത മേനോൻ.

'രതിനിർവേദം രണ്ടാം ഭാ​ഗം എപ്പോഴാ വരിക എന്ന് എത്രയോ പേർ ചോദിക്കുന്നു. ഞാൻ പറയും രതി ചേച്ചി മരിച്ചു പോയി എന്ന്. അപ്പോൾ സ്വർ​ഗത്തിൽ പോയിട്ട് എന്താണ് നടക്കുക. ഒരുപാട് സ്റ്റോറി ലൈനുകൾ വന്നിട്ടുണ്ട്. പപ്പുവിനെ കാണുന്നതിന് മുമ്പുള്ള രതി ചേച്ചി, പ്രീക്വൽ സീക്വൽ കഥകളെല്ലാം വരാറുണ്ട്. ചില കഥകളെല്ലാം ടൈം പാസിന് സൂപ്പറാണ്,' ശ്വേത മോനോൻ പറഞ്ഞു.

പുതിയ സിനിമ പള്ളിമണിയുടെ പ്രൊമോഷൻ പരിപാടികളിൽ പങ്കെടുത്ത് സംസാരിക്കുകയായിരുന്നു ശ്വേത മേനോൻ. നിത്യ ദാസ്, കൈലാഷ് തുടങ്ങിയവരാണ് സിനിമയിലെ മറ്റ് താരങ്ങൾ. സിനിമയിൽ നെ​ഗറ്റീവ് ഷേഡുള്ള കഥാപാത്രത്തെ ആണ് ശ്വേത അവതരിപ്പിക്കുന്നത്.

സിനിമകളിൽ പഴയത് പോലെ സജീവമല്ലാത്തതിനക്കുറിച്ചും ശ്വേത മേനോൻ സംസാരിച്ചു. നല്ല സിനിമകൾ ലഭിക്കാത്തതാണ് ഇടവേളയ്ക്ക് കാരണം. പ്രത്യേകിച്ച് ഒരു ​ഗ്യാങ്ങിന്റെയും ഭാ​ഗമല്ല താനെന്നും ശ്വേത മേനോൻ പറഞ്ഞു. സിനിമകൾക്ക് പുറമെ നേരത്തെ ടെലിവിഷൻ ഷോകളിൽ അവതാരക ആയും ശ്വേത എത്തിയിരുന്നു. മഴവിൽ മനോരമയിലെ വെറുതെ അല്ല ഭാര്യ എന്ന ഷോയിലായിരുന്നു നടി അവതാരക ആയത്. പിന്നീട് ബി​ഗ് ​ബോസ് മലയാളം സീസൺ വണ്ണിൽ മത്സരാർത്ഥി ആയും ശ്വേത മേനോൻ എത്തിയിരുന്നു.