ഞാൻ സീരിയസ് ആയപ്പോൾ മമ്മൂക്കയ്ക്ക് കുട്ടിക്കളി; പാലേരി മാണിക്യം സിനിമയെക്കുറിച്ച് ശ്വേത മേനോൻ

പാലേരി മാണിക്യം, ഒഴിമുറി, സോൾട്ട് ആന്റ് പെപ്പർ, രതിനിർവേദം, ഇത്രമാത്രം തുടങ്ങിയ സിനിമകളിലൂടെ ശ്വേത സിനിമാ ലോകത്ത് സജീവമായി. എന്നാൽ അടുത്ത കാലത്തായി ശ്വേതയെ സിനിമകളിൽ കാണാനേ ഇല്ല. മികച്ച നടിക്കുള്ള സംസ്ഥാന പുരസ്കാരം വരെ നേടിയ ശ്വേത എങ്ങോട്ട് പോയി എന്നായിരുന്നു ആരാധകർ ചോദിച്ചത്. ഇപ്പോഴിതാ പള്ളിമണി എന്ന സിനിമയിലൂടെ വീണ്ടും പ്രേക്ഷകർക്ക് മുന്നിലെത്താൻ പോവുകയാണ് ശ്വേത മേനോൻ. ഹൊറർ സിനിമയായ പള്ളിമണിയിൽ നിത്യ ദാസ്, കൈലാഷ് തുടങ്ങിയവരാണ് മറ്റ് താരങ്ങൾ.

ശ്വേത മേനോന്റെ കരിയറിലെ ഏറ്റവും മികച്ച പ്രകടനങ്ങളിൽ ഒന്നാണ് പാലേരി മാണിക്യം സിനിമയിൽ കണ്ടത്. ചീരു എന്ന കഥാപാത്രത്തെ മികച്ച രീതിയിൽ നടി അവതരിപ്പിച്ചു. മലബാർ ഭാ​ഗത്തെ നാട്ടിൻപുറത്തുകാരിയായ ചീരുവിന്റെ ശരീര ഭാഷ ശ്വേത സൂക്ഷ്മമമായി അഭിനയിച്ച് ഫലിപ്പിച്ചിരുന്നു. മമ്മൂട്ടി ആയിരുന്നു സിനിമയിലെ നായകൻ. അനശ്വരത്തിന് ശേഷം ഇരുവരും ഒരുമിച്ച് അഭിനയിച്ച സിനിമകളിലൊന്ന് കൂടിയായിരുന്നു ഇത്.

ഇപ്പോഴിതാ മമ്മൂട്ടിക്കൊപ്പം അഭിനയിച്ചതിനെക്കുറിച്ച് സംസാരിച്ചിരിക്കുകയാണ് ശ്വേത മേനോൻ. 'മമ്മൂക്കയുടെ കൂടെ ആദ്യ സിനിമ ചെയ്യുമ്പോൾ താൻ കുട്ടിയാണ്. ആ സമയത്ത് മമ്മൂക്ക വലിയ സ്റ്റാർ ആണെന്ന ചിന്ത ഇല്ലായിരുന്നു. ഓരോ ഷോട്ട് കഴിയുമ്പോളും അദ്ദേഹം ചോക്ലേറ്റ് തരാറുണ്ടായിരുന്നു. അതിന് വേണ്ടി ഞാൻ കാത്തിരിക്കും. ഭയങ്കര കുട്ടിക്കളി ആയിരുന്നു അന്ന് എനിക്ക്'

'എന്നാൽ പാലേരി മാണിക്യത്തിൽ എത്തിയപ്പോൾ ഞാൻ പ്രൊഫഷണൽ ആയിരുന്നു, ആ സമയത്ത് ഞാൻ സീരിയസ് ആയി നിൽക്കുമ്പോൾ മമ്മൂക്ക കുട്ടിക്കളി ആണ്. മമ്മൂക്ക സീരയസ് ആയപ്പോൾ ഞാനായിരുന്നു കുട്ടിക്കളിയെങ്കിൽ പിന്നീട് അദ്ദേഹമായിരുന്നു'

'പാലേരി മാണിക്യത്തിൽ അദ്ദേഹത്തിന് നേരെ എന്റെ കഥാപാത്രം തുപ്പുന്ന ഒരു സീൻ ഉണ്ട്. അത് എടുക്കുമ്പോൾ തുപ്പൽ ഒന്നും വന്നിട്ടില്ല. ആരെങ്കിലും മമ്മൂക്കയെ നോക്കി കാർക്കിച്ച് തുപ്പുമോ. ഞാൻ അത് പറഞ്ഞപ്പോൾ അതൊന്നും നോക്കാതെ എന്റെ കഥാപാത്രത്തിൽ നിന്ന് ചെയ്യാൻ പറഞ്ഞു, ചെയ്യാൻ നോക്കും, പക്ഷെ പറ്റില്ലായിരുന്നു,' ശ്വേത മേനോൻ പറഞ്ഞു. മമ്മൂട്ടി തമാശക്കാരനാണെന്നും ശ്വേത മേനോൻ പറഞ്ഞു.