'ഗോപിയുടെ അടുത്ത് പാടാൻ പോയി 12 വർഷം കളഞ്ഞില്ലേയെന്ന്?' അഭയയോട് ആരാധകൻ, താരത്തിന്റെ മറുപടി ഇങ്ങനെ!

​ഗോപി സുന്ദറുമായുള്ള പ്രണയം അഭയ അവസാനിപ്പിച്ചുവെന്ന് ആരാധകർ മനസിലാക്കിയത് അമൃതയുമായി പ്രണയത്തിലാണെന്ന് ​ഗോപി സുന്ദർ വെളിപ്പെടുത്തിയപ്പോഴാണ്. അമൃതയുമായുള്ള പ്രണയം ​ഗോപി വെളിപ്പെടുത്തിയപ്പോൾ സിനിമാ പ്രേമികൾ ഒന്നടങ്കം അത്ഭുതപ്പെട്ടിരുന്നു.

അമൃതയ്ക്കൊപ്പമുള്ള ചിത്രം പങ്കുവെച്ചുകൊണ്ടാണ് ​ഗോപി സുന്ദർ പ്രണയം പരസ്യപ്പെടുത്തിയത്. അതേസമയം കഴിഞ്ഞ ദിവസം അമൃതയും ​ഗോപി സുന്ദറും വിവാ​ഹിതരായി എന്ന തരത്തിൽ വാർത്തകൾ പ്രചരിച്ചിരുന്നു.

ഇരുവരും പഴനി മുരുകന്റെ ക്ഷേത്രം സന്ദർശിക്കാൻ പോയപ്പോൾ‌ പകർത്തിയ ചിത്രമാണ് ഇരുവരും വിവാ​ഹിതരായി എന്ന വാർത്തകൾ പ്രചരിക്കാൻ കാരണമായത്.

കഴുത്തിൽ പൂമാലകൾ ചാർത്തിയാണ് ഇരുവരും ഫോട്ടോയിൽ പ്രത്യക്ഷപ്പെട്ടിരിക്കുന്നത്. മാത്രമല്ല അമൃത സന്ദൂരം നെറ്റിയിൽ തൊട്ടിരിക്കുന്നതും കാണാം. അതേസമയം അഭയ ഹിരൺമയി ഇപ്പോൾ വീണ്ടും വാർത്തകളിൽ ഇടം നേടുകയാണ്.

ഒരു ആരാധകന്റെ കമന്റിന് നൽകിയ മറുപടിയിലൂടെയാണ് അഭയ ചർച്ചയാകുന്നത്. 'ഈ കുട്ടി ഗോപിയുടെ അടുത്ത് പാടാൻ പോയപ്പോൾ കൂടെ പോയി വെറുതെ 12 വർഷം കളഞ്ഞില്ലേ... ലൈഫ് മുഴുവൻ കൂടെ കാണും എന്ന് കരുതും.... ഒക്കെ വെറുതെ.... ആർക്കും ആരോടും ആത്മാർത്ഥത ഒന്നും ഇല്ലാ..' എന്നായിരുന്നു അഭയയുടെ ഒരു ഫോട്ടോയ്ക്ക് താഴെ വന്ന കമന്റ്.

അതിന് അഭയ കുറിക്കുകൊള്ളുന്ന മറുപടിയാണ് നൽകിയത്. 'അങ്ങനെയാണോ...? ഞാൻ എന്റെ ജീവിതത്തെക്കുറിച്ച് വിശദീകരിക്കണോ?' എന്നായിരുന്നു അഭയ ആരാധകനുള്ള മറുപടി കമന്റിലൂടെ ചോദിച്ചത്. അഭയ തന്റെ ഔദ്യോഗിക ജീവിതവുമായി മുന്നോട്ട് പോവുകയാണ്.

അടുത്തിടെ വസ്ത്രങ്ങളുടെ ഓൺലൈൻ വിൽപ്പന നടത്തുന്ന ഹിരണ്മയ എന്ന ബ്രാൻഡ് അഭയ ആരംഭിച്ചിരുന്നു. കൂടാതെ സ്റ്റേജ് ഷോകളുമായും അഭയ സജീവമാണ്. ഒമർ ലുലുവിന്റെ സിനിമയിലൂടെ വീണ്ടും പിന്നണി ഗായികയായി വരാനുള്ള തയ്യാറെടുപ്പിലാണ് അഭയ ഇപ്പോൾ.

കൂടാതെ മോ‍ഡലിങിലും അഭയ സജീവമാണ്. ജീവിതത്തിലെ പല പ്രതിസന്ധി ഘട്ടങ്ങളിലും വീറും വാശിയോടെയും പൊരുതി ജയിച്ച് മുന്നിലേക്ക് വന്ന കലാകാരി കൂടിയാണ് അഭയ.

​ഗോപി സുന്ദറുമായി പ്രണയം ആരംഭിച്ചതിന്റെ പേരിൽ അമ‍ൃതയും ഇപ്പോൾ വിമർശനം നേരിടുന്നുണ്ട്. ജീവിതത്തിലെ വിഷമഘട്ടങ്ങൾ പിന്നിട്ട് ഒരുമിച്ച് മനോഹര യാത്ര ആരംഭിക്കുകയാണെന്നും ആരാധകരുടെ സ്നേഹവും പ്രാർഥനയും എന്നും തങ്ങളുടെ കൂടെ ഉണ്ടാകുമെന്നു പ്രതീക്ഷിക്കുന്നതായും അമൃത ​ഗോപി സുന്ദറുമായുള്ള ജീവിതം ആരംഭിച്ചപ്പോൾ പറഞ്ഞിരുന്നു.

'സ്വന്തം ഭാര്യയേയും മക്കളേയും ഉപേക്ഷിച്ച് മറ്റൊരാളുടെ കൂടെ പോയ ആൾക്ക് നാളെ പെരുവഴി തന്നെയാണ് ശരണം' എന്നായിരുന്നു ​ഗോപി സുന്ദറിനെ പരിഹസിച്ച് ഒരാൾ കുറിച്ചത്. 'അപ്പോൾ ആ വഴിയിൽ കാണാം' എന്നാണ് മറുപടിയായി ഗോപി സുന്ദർ കുറിച്ചത്. പ്രതികരണം ശ്രദ്ധിക്കപ്പെട്ടതോടെ നിരവധി പേർ ഗോപി സുന്ദറിനെ പിന്തുണച്ച് രംഗത്തെത്തി.