'ഇവളെന്റെ പൂമ്പാറ്റ'; സൂര്യകാന്തി പൂക്കൾക്കിടയിൽ അമൃത, ​'പാറിപ്പോകാതെ നോക്കണേ'യെന്ന് ​ഗോപിയോട് വിമർശകർ!

അന്ന് പ്രായത്തിന്റെ പക്വതയില്ലായ്മയിൽ നടന്നതാണ് ആ വിവാഹമെന്നാണ് പിന്നീട് പലപ്പോഴും അമൃത പറഞ്ഞിട്ടുള്ളത്. ​ഗായിക അഭയ ഹിരൺമയിയുമായുള്ള ലിവിങ് റിലേഷൻഷിപ്പ് അവസാനിപ്പിച്ച ശേഷമാണ് ​ഗോപി സുന്ദർ അമൃതയെ പ്രണയിച്ച് തുടങ്ങിയത്.

കുറച്ച് മാസങ്ങൾക്ക് മുമ്പാണ് അഭയയും ​ഗോപി സുന്ദറും പിരിഞ്ഞത്. വിവാ​ഹിതനും രണ്ട് ആൺകുട്ടികളുടെ പിതാവുമാണ് ​​ഗോപി സുന്ദർ.

ആ ബന്ധം അവസാനിപ്പിക്കാതെ അഭയയുമായി റിലേഷൻഷിപ്പ് ആരംഭിച്ചതിന്റെ പേരിൽ‌ മുമ്പും നിരവധി തവണ ​ഗോപി സുന്ദറിന് വിമർശനം കേൾക്കേണ്ടി വന്നിട്ടുണ്ട്.

അടുത്തിടെ അമൃതയും ​ഗോ​പി സുന്ദറും പഴനി മുരുക ക്ഷേത്രം സന്ദർശിച്ച് പൂമാലകൾ അണിഞ്ഞ് നിൽക്കുന്ന ചിത്രങ്ങൾ പുറത്ത് വന്നിരുന്നു. ഇരുവരും വിവാഹിതരായി എന്ന തരത്തിലായിരുന്നു വാർത്തകൾ വന്നത്. അതിൽ ഇതുവരേയും സ്ഥിരീകരണം വന്നിട്ടില്ല.

'ആദ്യം ഒരു സത്രീയെ വിവാഹം ചെയ്യുകയും പിന്നീട് പത്ത് വർഷത്തോളം മറ്റൊരു സ്ത്രീക്കൊപ്പം ലിവിങ് റിലേഷൻ കഴിയുകയും ചെയ്ത വ്യക്തിയെ മാത്രമെ പ്രണയിക്കാൻ കിട്ടിയുള്ളോ' എന്നാണ് പലരും അമൃതയോട് ചോദിക്കുന്നത്.

തനിക്ക് നേരെ ഉയർന്ന വിമർശനങ്ങളിൽ പ്രതിഷേധിച്ച് അടുത്തിടെ അമൃത പറഞ്ഞത് ഇങ്ങനെയാണ്. 'എന്റെ ജീവിതത്തെ കുറിച്ച് വരുന്ന 99 ശതമാനം വാർത്തകളും തെറ്റാണ്.'

'പ്രണയം ഉണ്ടായപ്പോൾ മകൾ പാപ്പുവിനോടാണ് ആദ്യം ഞാൻ‌ പറഞ്ഞത്. അവൾക്ക് സമ്മതമാണ് അവൾ സന്തോഷവതിയാണ് എന്ന് കണ്ടതുകൊണ്ടാണ് ഞാൻ മുന്നോട്ട് പോയത്. അവളെ മാത്രമെ എനിക്കെല്ലാ കാര്യങ്ങളും ബോധിപ്പിക്കേണ്ടതുള്ളു. മറ്റാരേയും കുറിച്ച് ടെൻഷനടിക്കേണ്ട ആവശ്യമില്ല എനിക്ക്' എന്നാണ് അമൃത പറഞ്ഞത്.

ഇപ്പോൾ ​ഗോപി സുന്ദറിനൊപ്പമുള്ള അമൃതയുടെ പുതിയ വീഡിയോയാണ് വൈറലാകുന്നത്. 'സൂര്യകാന്തിപ്പൂക്കൾക്കിടയിൽ പാറി നടക്കുന്ന ചിത്രശലഭം... എന്റെ ബട്ടർഫ്‌ളൈ' എന്ന ക്യാപ്ഷനോടെയായാണ് ഗോപി സുന്ദർ അമൃത സൂര്യകാന്തി പൂക്കൾക്കിടയിൽ തുള്ളിച്ചാടി നടക്കുന്ന വീഡിയോ പങ്കുവെച്ചത്.

'എന്നെ പാറിപ്പറന്ന് നടക്കാൻ പ്രേരിപ്പിക്കുന്ന പ്രിയപ്പെട്ടവന്' നന്ദിയെന്നായിരുന്നു അമൃത കുറിച്ചത്. മഞ്ഞ നിറത്തിലുള്ള ഫ്രോക്കായിരുന്നു അമൃതയുടെ വേഷം. വീഡിയോയിൽ ഗോപി സുന്ദറിനേയും കാണുന്നുണ്ട്.

ഗോപി സുന്ദറും അമൃതയും പങ്കിട്ട വീഡിയോ നിമിഷനേരം കൊണ്ടാണ് വൈറലായി മാറിയിട്ടുള്ളത്. 'എപ്പോഴും ഇതേ സന്തോഷം നിലനിർത്തുക. ജീവിതമെന്നാൽ സന്തോഷമാണ്, ചിത്രശലഭത്തെപ്പോലെ പാറിപ്പറന്ന് നടക്കുക.'

'നിങ്ങളെ രണ്ടുപേരെയും സന്തോഷത്തോടെ കാണുമ്പോൾ എനിക്കും സന്തോഷമെന്നായിരുന്നു' ഒരാൾ കുറിച്ചത്. 'ആദ്യത്തെ കുറച്ച് ദിവസം ബട്ടർഫ്‌ളൈ ഒക്കെയാണ്. പിന്നെ ചെല്ലുന്തോറും കട്ടുറുമ്പും കടന്നലുമൊക്കെയാവും, ചിത്രശലഭം പാറിപ്പോകാതെ നോക്കിക്കോളൂവെന്നാണ്' മറ്റ് ചിലർ കമന്റ് ചെയ്തത്.