'കല്യാണം കഴിക്കുന്നുണ്ടെങ്കിൽ അയാളെ മാത്രമെ കഴിക്കൂവെന്ന് വാശിയായിരുന്നു, അവസാനം പിരിഞ്ഞു'; ചിത്ര അയ്യർ

ഫ്ലവേഴ്സിലെ ഒരു കോടിയിൽ അതിഥിയായി വന്ന് ജീവിത വിശേഷങ്ങൾ പങ്കുവെക്കുന്ന സുചിത്രയുടെ വീഡിയോയാണ് ഇപ്പോൾ വൈറലാകുന്നത്.

കരിയർ, വിവാഹം, പ്രണയം, അഭിനയം തുടങ്ങി തന്റെ ഇതുവരെയുള്ള ജീവിതത്തെ കുറിച്ചെല്ലാം ചിത്ര അയ്യർ സംസാരിച്ചു. 'നൃത്തത്തിന് ഒപ്പം തന്നെയാണ് സംഗീതവും പഠിച്ചത്. സംഗീതത്തിൽ എന്തെങ്കിലുമൊക്കയാകണമെന്ന് ആഗ്രഹിച്ച് നിൽക്കുന്ന കാലത്ത് കല്യാണവും കഴിഞ്ഞു.'

'എന്നാൽ വിവാഹ ശേഷമാണ് സംഗീതം കുറേ കൂടെ സീരിയസായി എടുത്തത്. ബോംബെയിലേക്ക് താമസം മാറിയപ്പോൾ അവിടെ വെച്ച് ഹിന്ദുസ്ഥാനി സംഗീതം അഭ്യസിച്ചു. കൂടുതൽ ഷോകൾ ചെയ്യാൻ തുടങ്ങി.'

'വിവാഹത്തിന് മുമ്പ് ഒരു ബാന്റ് ഉണ്ടായിരുന്നെങ്കിലും അതൊക്കെ പിന്നീട് പോയി. വിവാഹ ശേഷം വേറെ ഒരു ബാന്റ് സ്ഥാപിച്ചു. അതിനൊപ്പം കുറേ ഏറെ സ്റ്റേജ് ഷോകളും ചെയ്തു.'

'അങ്ങനെ പോയ ഒരു വിദേശ ഷോയിൽ നിന്ന് സംഘാടകർ എന്നെ കാശ് തരാതെ പറ്റിച്ചു. അതോടെ എനിക്ക് ഭയങ്കര വിഷമം ആയി. കാശുമില്ല എനിക്കൊപ്പം വന്ന ആൾക്കാർക്ക് എല്ലാം പ്രതിഫലവും കൊടുക്കണം. എന്ത് ചെയ്യണമെന്ന് അറിയാതെ ഇനി സംഗീതവും വേണ്ട ഒന്നും വേണ്ട എന്ന തീരുമാനത്തിലെത്തിയിരുന്നു.'

'ആ സമയത്താണ് ഭർത്താവ് സിനിമയിലെ ചില സുഹൃത്തുക്കൾ വഴി എ.ആർ റഹ്‌മാന കാണാനുള്ള അവസരം ഉണ്ടാക്കി തന്നത്. വീട്ടിൽ വെച്ച് തന്നെ ഞങ്ങളുടെ ബാന്റിനെ വെച്ച് ചില പാട്ടുകൾ പാടി കാസറ്റിൽ റെക്കോഡ് ചെയ്ത് എ.ആർ റഹ്‌മാനെ കാണാൻ പോയി.'

'അന്ന് തന്നെ അദ്ദേഹത്തിന്റെ സംഗീത സംവിധാനത്തിൽ തെന്നാലി എന്ന ചിത്രത്തിൽ ഹരിഹരൻ സാറിനൊപ്പം പാടാൻ അവസരം ലഭിച്ചു.'

'അതാണ് കരിയറിലെ ഏറ്റവും വലിയ ഭാഗം. അതുവരെ ചില സിനിമകളിൽ പാടിയിട്ടുണ്ട് എങ്കിലും പിന്നണി ഗായിക എന്ന നിലയിൽ അറിയപ്പെട്ടത് അതിന് ശേഷമാണ്.'

'അതിന് ശേഷം മലയാളത്തിലും തമിഴിലുമായി ധാരാളം അവസരം കിട്ടി. എ.ആർ റഹ്‌മാന് ഒപ്പം തന്നെ അഞ്ച് പാട്ടുകൾ പാടാൻ സാധിച്ചു. ബോയ്‌സ് എന്ന ചിത്രത്തിലെ പാട്ടെല്ലാം ഹിറ്റായി. കല്യാണം കഴിഞ്ഞ് കുട്ടികൾ ഒക്കെയായി. മുപ്പത്തിനാലാം വയസിലാണ് ശരിക്കും കരിയർ ആരംഭിക്കുന്നത്.'

'മലയാളത്തിൽ കരിയർ ബ്രേക്കായത് ക്രോണിക് ബാച്ചിലറിലെ ചുണ്ടത്തെ ചെത്തിപ്പൂ എന്ന ​ഗാനമാണ്. കോളജ് കാലത്ത് ഒരു സീരിയസ് പ്രണയമുണ്ടായിരുന്നു. വളരെ സീരിയസായിരുന്നു ആ ബന്ധം.'

'പക്ഷെ വേറെ വേറെ മതം ആയിരുന്നു. കല്യാണം കഴിക്കുന്നുണ്ടെങ്കിൽ ഇയാളെ മാത്രമെ കഴിക്കൂ എന്നൊക്കെ പറഞ്ഞ് വീട്ടിൽ പ്രശ്‌നമുണ്ടാക്കി. പക്ഷെ നടന്നില്ല. നടക്കില്ലെന്ന് ഉറപ്പായപ്പോൾ രണ്ടുപേരും പരസ്പര സമ്മതത്തോടെ പിരിയുകയായിരുന്നു. അതുകൊണ്ട് അത്ര വലിയ ഹൃദയം തകരുന്ന വേദന ഒന്നും ഉണ്ടായിരുന്നില്ല' ചിത്ര അയ്യർ പറഞ്ഞു.