വിജയുടെ മടക്കത്തിന്റെ തിളക്കമില്ലാതാക്കാൻ ശിവകാർത്തികേയൻ; ഇത് തീക്കളി, തോറ്റ് പോയാൽ കാത്തിരിക്കുന്നത്

താരരാജാവില്ലാത്ത സിനിമാ ലോകം തമിഴകത്തിന് ചിന്തിക്കാൻ പറ്റില്ല. വാഴ്ത്താനും ആഘോഷിക്കാനും തമിഴ് പ്രേക്ഷകർക്ക് ഒരു ബിംബം വേണം. രജിനികാന്ത്, വിജയ്, അജിത്ത് എന്നിവരെല്ലാ സൂപ്പർതാരങ്ങളായി ആഘോഷിക്കപ്പെട്ടവരാണ്. ഇനിയാര് ഈ സ്ഥാനത്തേക്ക് വരുമെന്ന ചോദ്യമിപ്പോൾ സജീവ ചർച്ചയാണ്. വിജയ് സിനിമാ രം​ഗം വിട്ട് രാഷ്ട്രീയത്തിലേക്ക് കടക്കുന്നു. അജിത്തിനും ഏറെക്കുറെ സിനിമയോടുള്ള ഭ്രമം ഇല്ലാതായി. രജിനികാന്തിനാണെങ്കിൽ പ്രായാധിക്യവും. ഇവരുടെ സ്ഥാനത്തേക്ക് ഇനിയാര് എന്ന ചോദ്യം ഉയരുന്നുണ്ട്. ‌

ശിവകാർത്തികേയനാണ് ഈ സാധ്യത തമിഴകത്ത് കൂടുതൽ. സിമ്പു, ധനുഷ് എന്നിവർക്കും വലിയ താരമൂല്യം ഉണ്ടെങ്കിലും ഇവർ സൂപ്പർതാരമായി വളരേണ്ട സമയം ഏറെക്കുറെ കഴിഞ്ഞെന്നാണ് വിലയിരുത്തൽ. ധനുഷ് തുടരെ സിനിമകൾ ചെയ്യുന്നുണ്ട്. പക്ഷെ വിജയ പരാജയങ്ങൾ ഒരുപോലെയുണ്ട്. സിമ്പുവിന് കരിയറിൽ വലിയ ​ഗ്യാപ്പ് വരുന്നുണ്ട്. പല പ്രൊജക്ടുകളും പ്രഖ്യാപിച്ചതല്ലാതെ മുന്നോട്ട് നീങ്ങുന്നില്ല.

ഇവിടെയാണ് ശിവകാർത്തികേയന്റെ പ്രസക്തി. വലിയ ഹിറ്റുകൾ ശിവകാർത്തികേയനുണ്ട്. 2024 ലാണ് ശിവകാർത്തികന്റെ കരിയറിലെ വൻ ഹിറ്റുകളിലൊന്നായ അമരൻ റിലീസ് ചെയ്തത്. ഈ ജയം നടന് കരിയറിൽ ഏറെ ​ഗുണം ചെയ്തു. ആക്ഷൻ, മാസ് രം​ഗങ്ങളിലുള്ള മികവ് ശിവകാർത്തികേയൻ തെളിയിച്ചു. നിർമാതാക്കൾ കോടികൾ അഡ്വാൻസ് നൽകി ശിവകാർത്തികേയന്റെ ഡേറ്റ് വാങ്ങി.

ഈ വരുന്ന പൊങ്കൽ ദിനത്തിൽ ശിവകാർത്തികേയന്റെ പരാശക്തി എന്ന സിനിമയും വിജയുടെ ജനനായകനും തമ്മിലാണ് ബോക്സ് ഓഫീസിൽ ഏറ്റുമുട്ടൽ. തമിഴകത്തെ കിരീടം വെക്കാത്ത രാജാവാണ് വിജയ്. സിനിമ വിടാൻ പോകുകയാണെങ്കിലും ഈ താരപ്രഭയ്ക്ക് കുറവില്ല. വിജയോട് ബോക്സ് ഓഫീസിൽ ശിവകാർത്തികേയൻ ഏറ്റുമുട്ടുമ്പോൾ ചർച്ചകൾ പലതാണ്.

ജനനായകനേക്കാളും വലിയ ഹിറ്റാകാൻ പരാശക്തിക്ക് സാധിച്ചാൽ വിജയുടെ പകരക്കാരനായി ശിവകാർത്തികേയൻ ആ സ്ഥാനത്തെത്തും. വിജയ് ആണെങ്കിൽ സിനിമാ രം​ഗം വിടുകയും ചെയ്യുന്നു. സ്ഥാനമുറപ്പിക്കാൻ ഇതിലും മികച്ചൊരു സമയമില്ല. ഇനി അഥവാ പരാശക്തി പരാജയപ്പെട്ടാൽ ശിവകാർത്തികേയന് ഇത് വലിയ അപകടമാണ്. കാരണം 2015 ൽ മദിരാസി, അയലാൻ എന്നീ രണ്ട് സിനിമകളാണ് ശിവകാർത്തികേയന്റേതായി റിലീസ് ചെയ്തത്.

ഇവ രണ്ടും ഹിറ്റായില്ല. പരാശക്തി കൂടി പരാജയപ്പെട്ടാൽ ശിവകാർത്തികേയന്റെ കുതിച്ചുയർന്ന താരമൂല്യം കുത്തനെ ഇടിയും. മാത്രവുമല്ല അമരന്റെ വിജയം ശിവകാർത്തികേയന് മാത്രം നൽകാൻ ഒരു വിഭാ​ഗം പ്രേക്ഷകർ തയ്യാറല്ല. നായിക സായ് പല്ലവിക്ക് ഈ വിജയത്തിൽ വലിയ പങ്കുണ്ട്. സായ് പല്ലവിയാണ് ചിത്രം മുന്നോട്ട് കൊണ്ട് പോയത്.