മമ്മൂട്ടി ഇന്നും സിനിമയില്‍ തുടരാന്‍ കാരണം അയാള്‍ തന്നെ, പല ശീലങ്ങളും അദ്ദേഹം മാറ്റിവെച്ചു

മമ്മൂട്ടിയും എസ് എന്‍ സ്വാമിയും

മമ്മൂട്ടിയും എസ് എന്‍ സ്വാമിയും ഒരുമിച്ചെത്തിയപ്പോഴെല്ലാം പ്രേക്ഷകര്‍ സ്വീകരിച്ചിട്ടുണ്ട്. കുറ്റാന്വേഷണ കഥകളുമായാണ് ഇവരെത്തിയത്. സേതുരാമയ്യരായുള്ള മമ്മൂട്ടിയുടെ അഞ്ചാം വരവിനായി കാത്തിരിക്കുകയാണ് ആരാധകര്‍. സിബി ഐ ഡയറിക്കുറിപ്പ്, ജാഗ്രത, സേതുരാമയ്യര്‍ സിബി ഐ, നേരറിയാന്‍ സിബി ഐ, തുടങ്ങി നാല് ഭാഗങ്ങളാണ് ഇതിനകമെത്തിയത്. ഈ സീരീസിലെ അഞ്ചാമത്തെ ചിത്രത്തിനായി കാത്തിരിക്കുകയാണ് ആരാധകര്‍. ഇതുവരെ കണ്ടിട്ടില്ലാത്ത അന്വേഷണ രീതികളുമായാണ് ഇത്തവണത്തെ വരവെന്ന് എസ് എന്‍ സ്വാമി പറഞ്ഞിരുന്നു.

മമ്മൂട്ടിയെക്കുറിച്ച്

അയാൾ അയാളുടെ പ്രൊഫഷനിൽ നിൽക്കാൻ വേണ്ടി ശാസ്ത്ര സാങ്കേതിക വിദ്യയിൽ എന്തെല്ലാം ലഭ്യമാണോ അതെല്ലാം അയാൾ ഉപയോഗിക്കും. എനിക്ക് മമ്മൂട്ടിയെ ഏകദേശം നാൽപ്പത് വർഷമായി അറിയാം. ഞങ്ങൾ കാണുന്ന കാലത്തു മമ്മൂട്ടി കഴിക്കുന്ന ഭക്ഷണം ഇന്ന് അദ്ദേഹം ഒന്ന് രുചിച്ചു പോലും നോക്കില്ല. അയാൾ ആസ്വദിച്ചു കഴിച്ചു കൊണ്ടിരുന്നതൊക്കെ ഉപേക്ഷിച്ചു.

ശീലങ്ങളും മാറ്റി

മമ്മൂട്ടി പണ്ട് പുകവലിക്കുമായിരുന്നു. ഇപ്പോൾ അദ്ദേഹം സിഗരറ്റ് തൊടാറില്ല. സിനിമയോടുള്ള പ്രേമത്തിന്റെ പേരിൽ അയാൾ അയാളുടെ ശീലങ്ങൾ മാറ്റിവച്ചു. മമ്മൂട്ടിയോടൊപ്പം വന്ന അന്നത്തെ ഹിന്ദിയിലെ സൂപ്പർ താരങ്ങളെ ഇന്ന് കണ്ടാൽ നമ്മൾ അത്ഭുതപ്പെട്ടു പോകും. രണ്ടു രണ്ടര ഇരട്ടി മമ്മൂട്ടിയാണ് എല്ലാവരും. ആകാരം കൊണ്ടും, പ്രകൃതം കൊണ്ടും അത്രത്തോളം വ്യത്യാസമുണ്ട്. അവരുടെ കാഴ്ചപാട് അല്ല മമ്മൂട്ടിയുടേത്.

കാരണം

മമ്മൂട്ടി ഇന്ന് സിനിമയിൽ നിലനിൽക്കുന്നതിനു കാരണക്കാരൻ അയാൾ മാത്രമാണെന്നുമായിരുന്നു എസ് എന്‍ സ്വാമി പറഞ്ഞത്. ഡെഡിക്കേഷന്‍റെ കാര്യത്തില്‍ വേറെ ലെവലാണ് മെഗാസ്റ്റാര്‍. ഡാന്‍സ് വഴങ്ങില്ലെങ്കിലും അതിനായും ശ്രമിക്കാറുണ്ട് അദ്ദേഹം. യുവതലമുറയ്ക്ക് പ്രചോദനമേകുന്നതിന് വേണ്ടിയാണ് അങ്ങനെ ചെയ്യുന്നതെന്നാണ് മമ്മൂട്ടി പറയാറുള്ളത്. ഫിറ്റ്‌നസിന്റെ കാര്യത്തില്‍ അങ്ങേയറ്റത്തെ ശ്രദ്ധയാണ് മമ്മൂട്ടി നല്‍കുന്നത്. ഇതേക്കുറിച്ച് പറഞ്ഞ് യുവതാരങ്ങളെല്ലാം എത്താറുമുണ്ട്.