സന്തോഷ വാര്‍ത്ത പങ്കുവെച്ച് സ്‌നേഹയും പ്രസന്നയും! കുടുംബത്തിലേക്ക് പുതിയൊരാള്‍ കൂടി വരുന്നു

ആരാധകരുടെ സ്വന്തം താരങ്ങളാണ് സ്‌നേഹയും പ്രസന്നയും. സിനിമയിലെ റൊമാന്‍സ് ജീവിതത്തിലും നിലനിര്‍ത്തി മുന്നേറുകയാണ് ഇരുവരും. പൊതുപരിപാടികളിലും മറ്റും ഒരുമിച്ചെത്തുന്നത് ആവര്‍ത്തിച്ചതോടെയാണ് ഇരുവരും പ്രണയത്തിലാണെന്ന വാര്‍ത്തകള്‍ പുറത്തുവന്നത്. അധികം വൈകാതെ തന്നെ ആ ബന്ധം വിവാഹത്തിലേക്ക് എത്തുകയായിരുന്നു. രണ്ടാമത്തെ കുഞ്ഞിനായുള്ള കാത്തിരിപ്പിലാണ് താരദമ്പതികളെന്നുള്ള വിവരങ്ങളാണ് ഇപ്പോള്‍ പുറത്തുവന്നിട്ടുള്ളത്.

മലയാള സിനിമാ പ്രേക്ഷകര്‍ക്ക് ഏറെ പരിചിതമുള്ള മുഖമാണ് സ്‌നേഹയുടെത്. ഇങ്ങനെ ഒരു നിലാപക്ഷിയില്‍ കുഞ്ചാക്കോ ബോബനോടൊപ്പം അഭിനയിച്ചാണ് താരം സിനിമയിലേക്ക് കടന്നുവന്നത്. ബോക്‌സോഫീസില്‍ വന്‍പരാജയമായ ചിത്രം നായികയെ തുണച്ചില്ല. എന്നാല്‍ മലയാളത്തില്‍ തമിഴിലേക്ക് ചേക്കേറിയ താരം തമിഴകത്തെ ഒന്നാം നമ്പര്‍ നായികയായി മാറിയത് കുറഞ്ഞ കാലം കൊണ്ടാണ്.

മലയാളത്തില്‍ തിളങ്ങാന്‍ കഴിയാതെ വന്നതോടെ തമിഴകത്തേക്ക് പ്രവേശിക്കുകയായിരുന്നു സ്നേഹ. തമിഴിലെ മുന്‍നിര നായകരായ കമല്‍ഹസ്സന്‍, അജിത്ത്, വിക്രം, വിജയ്, സൂര്യ, ധനുഷ്, മാധവന്‍ എന്നിവര്‍ക്കൊപ്പമെല്ലാം അഭിനയിക്കാനുള്ള അവസരം താരത്തിന് ലഭിച്ചിരുന്നു.. ചിത്രങ്ങളെല്ലാം ബോക്‌സോഫീസില്‍ വന്‍വിജയമായിരുന്നു. മലയാളത്തില്‍ തിളങ്ങാതെ പോയ നായി തമിഴകത്തിന്‍റെ എല്ലാമെല്ലാമായി മാറുന്ന കാഴ്ചയായിരുന്നു പിന്നീട് കണ്ടത്.

വിവാഹ ശേഷവും സ്നേഹ സിനിമയില്‍ സജീവമായിരുന്നുവെങ്കിലും പ്രസവത്തിനായി അവധിയെടുത്തിരുന്നു. മോഹന്‍രാജ് സംവിധാനം ചെയ്ത വേലൈക്കാരനിലൂടെയായിരുന്നു താരം തിരിച്ചുവരവ് നടത്തിയത്. ഫഹദ് ഫാസിലിനോടൊപ്പം അഭിനയിക്കാന്‍ കഴിഞ്ഞതിന്‍രെ സന്തോഷം പങ്കുവെച്ച് താരം എത്തിയിരുന്നു. ഫഹദിന്റെ വലിയ ഫാനാണ് താനെന്നും പ്രമാണിയില്‍ ഒരുമിച്ച് അഭിനയിച്ചിരുന്നുവെന്നും താരം നേരത്തെ പറഞ്ഞിരുന്നു. ഈ ചിത്രത്തിലൂടെയാണ് ഫഹദ് തമിഴകത്ത് അരങ്ങേറിയത്.

വിവാഹത്തോടെ സിനിമ ഉപേക്ഷിക്കുന്ന നായികമാരുടെ ഇടയിലേക്കാണോ സ്നേഹയും ചേക്കേറുന്നതെന്നായിരുന്നു ആരാധകര്‍ സംശയിച്ചത്. വിവാഹത്തിന് ശേഷവും സിനിമയില്‍ തുടരുന്ന കാര്യത്തില്‍ ശക്തമായ പിന്തുണയായിരുന്നു സ്നേഹ നല്‍കിയത്. വൈവിധ്യമാര്‍ന്ന കഥാപാത്രങ്ങളുമായാണ് താരം എത്തിയത്. ശക്തമായ പിന്തുണയായിരുന്നു ആരാധകര്‍ നല്‍കിയത്. എല്ലാ തരത്തിലുമുള്ള കഥാപാത്രത്തേയും അവതരിപ്പിക്കാനായി തനിക്ക് കഴിയുമെന്നും താരം തെളിയിച്ചിരുന്നു. ധനുഷിനൊപ്പമുള്ള സിനിമയുമായി ബന്ധപ്പെട്ട തിരക്കിലാണ് സ്നേഹ ഇപ്പോള്‍. അതിനിടയിലാണ് സന്തോഷ വാര്‍ത്ത എത്തിയത്.

സിനിമയിലെത്തിയിട്ട് വര്‍ഷം കുറേയായെങ്കിലും ഇതാദ്യമായി പ്രസന്ന മലയാളത്തിലേക്ക് എത്തുകയാണ്. കലാഭവന്‍ ഷാജോണ്‍-പൃഥ്വിരാജ് കൂട്ടുകെട്ടില്‍ പുറത്തിറങ്ങുന്ന ബ്രദേഴ്സ് ഡേയിലൂടെയാണ് താരം മലയാളത്തില്‍ അരങ്ങേറുന്നത്. എല്ലാതരത്തിലുമുള്ള പ്രേക്ഷകര്‍ക്കും ആസ്വദിക്കാവുന്ന സിനിമയുമായാണ് തങ്ങളെത്തുന്നതെന്ന് ഇരുവരും വ്യക്തമാക്കിയിരുന്നു. ഇതുവരെ കാണാത്ത പൃഥ്വിരാജിനെയാണ് ബ്രദേഴ്സ് ഡേയില്‍ കാണാനാവുകയെന്നായിരുന്നു പ്രസന്ന പറഞ്ഞത്. നേരത്തെയും പൃഥ്വിക്കൊപ്പം പ്രവര്‍ത്തിക്കാനുള്ള അവസരം ലഭിച്ചിരുന്നുവെങ്കിലും അത് വിനിയോഗിക്കാന്‍ തനിക്ക് കഴിഞ്ഞിരുന്നില്ലെന്നും താരം പറഞ്ഞിരുന്നു.