പൃഥ്വിക്കും സുപ്രിയയ്ക്കുമൊപ്പം സെൽഫിയെടുത്ത് വൈറലായത് സോഷ്യൽമീഡിയ താരം ഡാൻസിങ് മുത്തശ്ശി, വിശേഷം ഇങ്ങനെ!

തിയേറ്ററിലെ വിജയത്തിന് ശേഷം ഒടിടിയിൽ എത്തിയപ്പോഴും സിനിമയ്ക്ക് മികച്ച പ്രതികരണമാണ് ലഭിച്ചത്. മലയാളത്തിനൊപ്പം തെലുങ്ക്, തമിഴ്, കന്നട ഭാഷകളിലും സിനിമ മൊഴിമാറ്റിയാണ് ഒടിടിയിൽ റിലീസ് ചെയ്തത്. ഏപ്രില്‍ 28ന് തിയറ്ററുകളിലെത്തിയ ചിത്രം 26 ദിവസങ്ങളില്‍ 50 കോടിയാണ് നേടിയത്.

ഷാരിസ് മുഹമ്മദാണ് സിനിമയ്ക്കായി രചന നിർവഹിച്ചത്. കാമ്പുള്ള സിനിമകൾ ചെയ്യുന്നതിനും അത് വിജയിപ്പിക്കുന്നതിനും പൃഥ്വിരാജ് എന്ന നടന് സാധിക്കാറുണ്ട്.

അതിന്റെ ഏറ്റവും പുതിയ ഉദാഹരണമാണ് ജന​ഗണമനയുടെ വിജയം. കഴിഞ്ഞ ദിവസം സിനിമയുടെ സക്സസ് സെലിബ്രേഷൻ ആഘോഷമായി നടത്തിയിരുന്നു.

സുരാജ് വെ‍ഞ്ഞാറമൂടും പൃഥ്വിരാജും അടക്കം ജന​ഗണമനയുടെ അണിയറയിൽ പ്രവർത്തിച്ചവരെല്ലാം സെലിബ്രേഷനിൽ പങ്കെടുക്കാനെത്തിയിരുന്നു. ചടങ്ങിന്റെ വീഡിയോകൾ സോഷ്യൽമീഡിയയിൽ വൈറലായിരുന്നു.

ആ വീഡിയോകളിൽ ഏറ്റവും കൂടുതൽ ശ്രദ്ധിക്കപ്പെട്ട ഒന്നായിരുന്നു സെലിബ്രേഷനിൽ പങ്കെടുക്കാനെത്തിയ ഒരു മുത്തശ്ശിക്കൊപ്പം സെൽഫി പകർത്തുന്ന സുപ്രിയയുടേയും പൃഥ്വിരാജിന്റേയും വീഡിയോ.

പൃഥ്വിക്കും ഭാര്യയ്ക്കുമൊപ്പം സെൽഫി പകർത്തിയ മുത്തശ്ശി പക്ഷെ നിസാരക്കാരിയല്ല. ഡാൻസറായ ബിജു ധ്വനിതരംഗിന്റെ അമ്മയായ ശ്യാമള സേവ്യറായിരുന്നു പൃഥിക്കും സുപ്രിയയ്ക്കുമൊപ്പം സെല്‍ഫി എടുത്തത്.

ആദ്യമായല്ല ശ്യാമള സേവ്യർ സോഷ്യൽമീഡിയയിൽ വൈറലാകുന്നത്. മകനൊപ്പം മനോഹരമായി ക്ലാസിക്ക് നൃത്തം അവതരിപ്പിക്കുന്ന ശ്യാമളയുടെ വീഡിയോ മുമ്പും വൈറലായിരുന്നു. അമ്മയും മകനും ഒന്നിച്ചുള്ളതുള്‍പ്പടെയുള്ള വീഡിയോകളെല്ലാം വൈറലായി മാറാറുണ്ട്.

ബിജു ധ്വനിതരംഗ് അമ്മയ്‌ക്കൊപ്പം ജനഗണമനയുടെ വിജയാഘോഷത്തില്‍ പങ്കെടുക്കാനെത്തിയപ്പോഴുള്ളതാണ് വൈറലായ വീഡിയോ. ജന​ഗണമനയിൽ ശ്യാമളയും ഭാ​ഗമായിരുന്നു.

സിനിമയുടെ സക്സസ് സെലിബ്രേഷൻ ദിവസം അമ്മയ്ക്കും മൊമന്റോ കിട്ടിയ സന്തോഷം ബിജുവും കുറിപ്പിലൂടെ പങ്കുവെച്ചിരുന്നു. 'ആന്വൽ ഡേയ്ക്ക് കുട്ടിയെ കൂട്ടി കൊണ്ടുപോയ ഒരു പാരന്റായിരുന്നു ഇന്നലെ ഞാൻ.'

'ആദ്യമായി കിട്ടിയ മൊമെന്റോ കയ്യിൽ മേടിച്ച് ഇറങ്ങിവന്നപ്പോ ഏതൊരു അച്ഛനും അമ്മക്കും ഉണ്ടാകുന്നതിനേക്കാൾ പറഞ്ഞറിയിക്കാൻ പറ്റാത്ത സന്തോഷമായിരുന്നു എനിക്ക്‌. ഈ ദിവസത്തിന് അമ്മയോടൊപ്പം നിന്ന എല്ലാവരോടും ഒരുപാട് നന്ദി'യെന്നായിരുന്നു ബിജു കുറിച്ചത്.

അമ്മയുടെ ഫോണിൽ കിട്ടിയ സെൽഫി പോസ്റ്റ് ചെയ്യാൻ പറ്റാത്ത പോലെയാണുള്ളതെന്നും എന്നാൽ അമ്മ ആഗ്രഹിച്ച ചിത്രം തന്നെ പിന്നീട് കിട്ടിയെന്നും പൃഥ്വിക്കും സുപ്രിയയ്ക്കുമൊപ്പമുള്ള ചിത്രത്തെ കുറിച്ച് പറഞ്ഞ് ബിജു കുറിച്ചു. 'രാജു മോനോടൊപ്പമുള്ള സെല്‍ഫി.... എന്റെ സെല്‍ഫി കിട്ടിയെന്ന് പറഞ്ഞ്' സന്തോഷം പങ്കുവെച്ച് ശ്യാമളയും എത്തിയിരുന്നു.