'ഇന്ത്യന്‍ റുപ്പിയും ഡയമണ്ട് നെക്ലേസും ഞാന്‍ സംഗീതം ചെയ്തിരുന്നെങ്കില്‍ ഇതിലും നന്നായേനെ'; ഗോപി സുന്ദര്‍

മറ്റ് സംഗീതസംവിധായര്‍ക്കൊപ്പം ജോലി ചെയ്യാന്‍ തനിക്ക് വലിയ ഇഷ്ടമാണെന്ന് തുറന്നുപറയുകയാണ് ഇപ്പോള്‍ ഗോപിസുന്ദര്‍. അവര്‍ പാടാന്‍ വിളിച്ചാലും താന്‍ പോകും. കൈരളി ടിവിയ്ക്ക് മുന്‍പ് അനുവദിച്ച ഒരു അഭിമുഖത്തിലാണ് ഗോപിസുന്ദറിന്റെ തുറന്നുപറച്ചില്‍.

ഒരു ആരോഗ്യകരമായ മത്സരം എല്ലാ സംഗീതസംവിധായകരുമായും നിലനില്‍ക്കുന്നുണ്ട്. നല്ല അസൂയയുമുണ്ട്. അത് അവര്‍ക്കും അറിയാം. ചില സിനിമകള്‍ ഞാന്‍ ചെയ്തിരുന്നെങ്കില്‍, അല്ലെങ്കില്‍ എനിക്ക് കിട്ടിയില്ലല്ലോ എന്നോര്‍ത്ത് സങ്കടം തോന്നിയിട്ടുണ്ട്. അതിലൊന്നാണ് ലാല്‍ ജോസ് സംവിധാനം ചെയ്ത ഡയമണ്ട് നെക്ലേസ്. ഈ ചിത്രത്തിന്റെ പശ്ചാത്തല സംഗീതം ഞാന്‍ ചെയ്തിരുന്നെങ്കില്‍ കുറേക്കൂടി നന്നായേനെ എന്ന തോന്നല്‍ എനിക്കുണ്ട്.

പക്ഷെ, എന്നു വിചാരിച്ച് വിദ്യാസാഗര്‍ ചെയ്ത സംഗീതം മോശമാണെന്ന അര്‍ത്ഥമില്ല. അദ്ദേഹത്തിന്റെ ബെസ്റ്റ് അവിടെ ചെയ്തിട്ടുണ്ട്. പക്ഷെ, അതില്‍ കൂടുതല്‍ ചെയ്യാന്‍ എനിക്ക് സാധിക്കുമെന്ന ധൈര്യം എനിക്കുണ്ട്.

അതുപോലെ ബ്ലെസ്സി സാറിന്റെ ചില ചിത്രങ്ങള്‍ കാണുമ്പോള്‍ എനിക്ക് അങ്ങനെ തോന്നിയിട്ടുണ്ട്. ഇന്ത്യന്‍ റുപ്പിയുടെ സംഗീതം കേട്ടും എനിക്ക് അത് മികച്ച രീതിയില്‍ ചെയ്തു കൊടുക്കാന്‍ സാധിക്കുമെന്ന് തോന്നിയിട്ടുണ്ട്. ഞാന്‍ ചെയ്തിരുന്നെങ്കില്‍ അതിന്റെ 200 ശതമാനം മികച്ച രീതിയില്‍ ചെയ്യാന്‍ സാധിക്കുമായിരുന്നു.
അവരെക്കുറിച്ച് മോശമായി പറഞ്ഞതല്ല, വളരെ നല്ലതായിരുന്നു. പക്ഷെ അതെന്റെ കോണ്‍ഫിഡന്‍സാണ്. എനിക്ക് നന്നായി ചെയ്യാന്‍ സാധിക്കുമെന്ന ഉത്തമബോധ്യമുണ്ട്.

'പക്ഷെ, എനിക്ക് അതിലൊന്നും വിഷമമില്ല. എനിക്ക് കിട്ടാനുള്ള സിനിമകള്‍ എനിക്കു തന്നെ കിട്ടും. ഇതേക്കുറിച്ച് സംവിധായകരോട് ചോദിക്കാറില്ലെന്നും' ഗോപിസുന്ദര്‍ വ്യക്തമാക്കി.