മല്ലികയ്‌ക്കൊപ്പം ജഗതി എന്നെ കാണാന്‍ വന്നു; അഭിനയ മോഹവുമായി വന്നവരെ കുറിച്ച് പറഞ്ഞ് ശ്രീകുമാരന്‍ തമ്പി

സാമ്പത്തികമായി വലിയ ബുദ്ധിമുട്ടിലായിരിക്കുന്ന സമയത്താണ് ശ്രീകുമാറും മല്ലികയും അഭിനയ മോഹവുമായി എന്നെ കാണാന്‍ വന്നത്. മല്ലികയുടെ അമ്മയും എന്റെ അമ്മയും അടുത്ത ബന്ധുക്കളായിരുന്നു. കുട്ടിക്കാലത്ത് മല്ലികയുടെ അമ്മ എന്നെ എടുത്ത് നടന്നിട്ടുണ്ട്. എന്റെ ഭാര്യ പിതാവ് വൈക്കം എംപി മണി(കലാനിലയം നാടകങ്ങളിലെ നായകന്‍)യുമായി ശ്രീകുമാറിന്റെ അച്ഛന് അടുത്ത ബന്ധമുണ്ടായിരുന്നു.

കലാനിലയത്തിന്റെ എല്ലാ നാടകങ്ങളും എഴുതിയിരുന്നത് ജഗതി ശ്രീകുമാറിന്റെ അച്ഛനായിരുന്നു. ഈ പരിചയവും ബന്ധവും വച്ചാണ് ശ്രീകുമാറും മല്ലികയും എന്നെ കാണാന്‍ വന്നത്. നായകനാവാന്‍ എത്തിയ ജഗതിയ്ക്ക് സിനിമയില്‍ നല്ലൊരു വേഷം നല്‍കിയത് ഞാനാണ്. അതിന് മുന്‍പ് കന്യാകുമാരി എന്ന സിനിമയില്‍ ആള്‍ക്കൂട്ടത്തിലൂടെ നടന്ന് പോകുന്ന ഒരു ഷോട്ടിലുണ്ടായിരുന്നു.

ചട്ടമ്പിക്കല്യാണി സിനിമയുടെ ടൈറ്റില്‍ ഇടാന്‍ നേരത്ത് ഞാന്‍ ജഗതി ശ്രീകുമാര്‍ എന്ന പേരിട്ടപ്പോള്‍ അദ്ദേഹം എതിര്‍ത്തു. എനിക്ക് അച്ഛന്റെ പേരില്‍ ആളാകണ്ട. എന്നായിരുന്നു ശ്രീകുമാറിന്റെ വാദം. കേരളത്തിലെ അറിയപ്പെടുന്ന എഴുത്തുകാരനായ ജഗതി എന്‍ കെ ആചാരിയുടെ 'ജഗതി' ശ്രൂകുമാറിനൊപ്പം ഇരിക്കട്ടേ എന്ന് ഞാനും. അങ്ങനെ ഇഷ്ടമില്ലാതിരുന്നിട്ടും എന്റെ നിര്‍ബന്ധത്തിന് വഴങ്ങിയാണ് ആ പേര് ചേര്‍ത്തത്. ഞാന്‍ കൊണ്ട് വന്ന നടനെന്ന പേരില്‍ മറ്റ് പല നിര്‍മാതാക്കളും തുടക്കത്തില്‍ ജഗതിയെ അംഗീകരിച്ചില്ല. പിന്നീട് ഞാനെഴുതുന്ന തിരക്കഥകളില്‍ ജഗതിയെ മനസില്‍ കണ്ട് ഒരു കഥാപാത്രത്തെ ഉണ്ടാക്കും.

Recommended Video

Actor Jagathy Sreekumar Turns 70

അടൂര്‍ ഭാസിയ്‌ക്കൊപ്പം ചെറിയ വേഷങ്ങള്‍ ജഗതിയ്ക്ക് ലഭിച്ചു. അങ്ങനെ മൂന്ന് നാല് വര്‍ഷത്തോളം ജഗതിയെ നിലനിര്‍ത്തിയത് ഞാനായിരുന്നു. ഞാന്‍ മലയാള സിനിമയില്‍ നിക്ഷേപിച്ച ഫിക്‌സഡ് ഡിപ്പോസിറ്റാണ് ജഗതി ശ്രീകുമാര്‍. ആദ്യ സിനിമ തന്നെ റെക്കോര്‍ഡ് കളക്ഷന്‍ നേടി സൂപ്പര്‍ ഹിറ്റായത് ജഗതിയ്ക്ക് നേട്ടമായി. എന്റെ ആ കണ്ടുപിടുത്തം പിന്നീട് കോമേഡിയനില്‍ നിന്ന് വലിയൊരു നടനിലേക്ക് വളര്‍ന്നു.