നടി ജയഭാരതി ജയന്റെ മുറപ്പെണ്ണ് ആണ്; ആരോടും പറയാതിരുന്ന ആ രഹസ്യം ജയനാണ് തന്നോട് പറഞ്ഞതെന്ന് ശ്രീകുമാരന്‍ തമ്പി

'ജയഭാരതി മനസ് തുറന്ന് ആരോടും പറഞ്ഞിട്ടില്ലാത്ത ഒരു വലിയ ബന്ധത്തിന്റെ കഥ ഞാനും നടന്‍ ജയനും ആത്മാര്‍ഥ സുഹൃത്തുക്കളായി കഴിഞ്ഞ് ജയന്‍ പറഞ്ഞാണ് അറിഞ്ഞത്. ജയഭാരതിയുടെ അച്ഛന്‍ ശിവശങ്കരന്‍ നായര്‍ ജയന്‍ എന്ന കൃഷ്ണന്‍ നായരുടെ സ്വന്തം അമ്മാവനാണ്. അതായത് ജയഭാരതി ജയന്റെ സ്വന്തം അമ്മാവന്റെ മകളാണ്. പഴയ നായര്‍ സമുദായ രീതിയില്‍ പറഞ്ഞാല്‍ ജയന്റെ മുറപ്പെണ്ണാണ് ജയഭാരതി. ജയനുമായിട്ടുള്ള എന്റെ സൗഹൃദം കാരണമാണ് ഞാന്‍ എന്റെ ചിത്രങ്ങളില്‍ വീണ്ടും അഭിനയിപ്പിച്ചത്.

ജയന്‍ അവസാനമായി അഭിനയിച്ച ആക്രമണം എന്ന എന്റെ സിനിമയില്‍ തെറ്റായ ജീവിതത്തില്‍ നിന്നും ഒരു പെണ്ണിനെ നേര്‍വഴിയില്‍ കൊണ്ട് വരാനായി അവളെ വിവാഹം കഴിക്കുന്ന ഐപിഎസ് ഓഫീസര്‍ ആയി ജയനെ അഭിനയിപ്പിച്ചു. നര്‍ത്തകിയായ ആ പെണ്ണിന്റെ ഭാഗം അഭിനയിച്ചത് ജയഭാരതി ആയിരുന്നു. അവരുടെ ഒരു വെഡിങ്ങ് ഫോട്ടോ എടുത്ത് ഫ്രെയിം ചെയ്ത് ഇരുവരെയും കാണിച്ചു. എന്നാല്‍ ആ സിനിമയുടെ ഷൂട്ടിങ് പകുതിയാകും മുന്‍പ് ജയന്‍ അന്തരിച്ചു.

ജയനെ കൂടാതെ മധുവും ശ്രീവിദ്യ, പ്രമീള, ബാലന്‍ കെ നായര്‍, സത്താര്‍ എന്നിവരൊക്കെ ആ പടത്തില്‍ ഉണ്ടായിരുന്നു. അതുകൊണ്ട് കഥ ഞാന്‍ പുതിയ വഴികളിലൂടെ മുന്നോട്ട് കൊണ്ട് പോയി. ഒരു പൊളിറ്റിക്കല്‍ സിനിമ ആകേണ്ടിയിരുന്ന 'ആക്രമണം' മറ്റൊരു കഥയാക്കി റിലീസ് ചെയ്തു. എങ്കിലും അത് എവിടെയും എത്തിയില്ല. സിനിമയുടെ നിര്‍മാതാവ് താനയത് കൊണ്ട് ആ നഷ്ടം സഹിച്ചു. താന്‍ സംവിധാനം ചെയ്ത സിനിമകളില്‍ ഏറ്റവും മോശം 'ആക്രമണം'ആണെന്നാണ് ശ്രീകുമാരന്‍ തമ്പി പറയുന്നത്. അതിന് കാരണം ജയന്റെ അഭാവമാണ് എന്നും അദ്ദേഹം വ്യക്തമാക്കുന്നു'. '

Recommended Video

5 വർഷത്തിന് ശേഷം ഭാവന വരുന്നു, ഷറഫുദ്ദീനൊപ്പം | FilmiBeat Malayalam

ജയന്റെ മരണം ഉണ്ടായിട്ട് നാല്‍പത് വര്‍ഷത്തിന് മുകളിലായിരിക്കുകയാണ്. എങ്കിലും ഇന്നും അദ്ദേഹത്തിന്റെ സിനിമകള്‍ ആരാധകര്‍ വാഴ്ത്തി കൊണ്ടിരിക്കുകയാണ്. ജയഭാരതി കസിന്‍ ആണെന്നുള്ള വിവരം പുറത്ത് വന്നിട്ടുണ്ടെങ്കിലും ഇരുവരും തമ്മിലുള്ള അടുത്ത ബന്ധത്തെ കുറിച്ച് വ്യക്തമായിരുന്നില്ല.