ഗര്‍ഭകാലം അങ്ങനെയായിരുന്നെങ്കിലും ആ മാന്ത്രിക കൈകള്‍ സഹായിച്ചു; മകന്റെ ജനനത്തെ കുറിച്ച് ശ്രീലക്ഷ്മി ശ്രീകുമാർ

'മാതൃത്വത്തിലേക്കുള്ള വഴി വളരെ മനോഹരമാണ്, ഉത്കണ്ഠയും ആവേശവും, സന്തോഷവും തുടങ്ങി പല വികാരങ്ങള്‍ നിറഞ്ഞതാണ് അത്. എന്റെ ഗര്‍ഭകാലം ഒരു റോളര്‍ കോസ്റ്റര്‍ റൈഡ് പോലെ ആയിരുന്നു. പക്ഷേ എന്റെ അരികില്‍ നില്‍ക്കുന്ന മാന്ത്രിക കൈകളുള്ള ഈ സുന്ദരമായ ആത്മാവിന് വലിയ നന്ദി. ഡോക്ടര്‍ ഗൗരി ഒരു അത്ഭുത മനുഷ്യനും മികച്ച ഡോക്ടറുമാണെന്ന് പറഞ്ഞ് ശ്രീലക്ഷ്മി ഡോക്ടറെ പരിചയപ്പെടുത്തിയിരിക്കുകയാണ്.

അവര്‍ എനിക്ക് ആത്മവിശ്വാസവും സുരക്ഷിതത്വവും നല്‍കി. അര്‍ഹമിനെ സുരക്ഷിതമായി പ്രസവിക്കാന്‍ എന്നെ സഹായിച്ചു. ഡോക്ടര്‍ ഗൗരിയ്ക്കും എമ്മയ്ക്കും പരിയച സമ്പന്നമായ പ്രസവശുശ്രൂഷ നടത്തിയ കിംഗ്‌സ് ഹോസ്പിറ്റലിലെ എല്ലാ ചികിത്സയ്ക്കും പരിചരണത്തിനും വളരെ നന്ദി എന്നുമാണ'് ശ്രീലക്ഷ്മി പറയുന്നത്. ഭര്‍ത്താവിനും കുഞ്ഞിനുമൊപ്പം ഡോക്ടറുടെയും നേഴ്‌സിന്റെയും കൂടെ നില്‍ക്കുന്ന ചിത്രങ്ങളായിരുന്നു ശ്രീലക്ഷ്മി പങ്കുവെച്ചത്. ഡോ. ഗൗരി കുഞ്ഞിനെ എടുത്ത് പിടിച്ചിട്ടുണ്ടെങ്കിലും മകന്റെ മുഖം മറച്ച് പിടിച്ചാണ് ഫോട്ടോ പങ്കുവെച്ചിരിക്കുന്നത്.

രഞ്ജിനി ഹരിദാസ് അടക്കം സിനിമയിലും അല്ലാതെയുമായിട്ടുള്ള ശ്രീലക്ഷ്മിയുടെ സുഹൃത്തുക്കളെല്ലാം കമന്റുകളുമായി എത്തിയിരിക്കുകയാണ്. ബിഗ് ബോസില്‍ പങ്കെടുത്തപ്പോള്‍ മുതലാണ് രഞ്ജിനിയുമായി താരപുത്രി സൗഹൃദത്തിലാവുന്നത്. അന്ന് മുതലിങ്ങോട്ട് ശ്രീലക്ഷ്മി ശ്രീകുമാറിന്റെ ഓരോ വിശേഷങ്ങളും സോഷ്യല്‍ മീഡിയയിലൂടെ പുറത്ത് വരാറുണ്ട്. ജിജിന്‍ ജഹാംഗീറുമായിട്ടുള്ള വിവാഹം കേരളത്തില്‍ വെച്ച് വലിയ ആഘോഷമായി തന്നെ നടത്തിയിരുന്നു. വിവാഹവും ശേഷം നടത്തിയ വിരുന്ന് സത്കാരവുമൊക്കെ വാര്‍ത്തകളില്‍ നിറയുകയും ചെയ്തു.

വിവാഹത്തിന് ശേഷവും ദുബായിലേക്ക് പോയ ശ്രീലക്ഷ്മി ഭര്‍ത്താവിന്റെ കൂടെ തന്നെയായിരുന്നു താമസം. അവിടെ ജോലി ഉള്ളത് കൊണ്ട് നാട്ടിലേക്കുള്ള വരവും കുറഞ്ഞു. തങ്ങളുടെ വിശേഷങ്ങള്‍ സോഷ്യല്‍ മീഡിയ പേജിലൂടെ പങ്കുവെക്കാറുണ്ടായിരുന്നെങ്കിലും ഗര്‍ഭിണിയായ കാര്യം ശ്രീലക്ഷ്മി പുറത്ത് വിട്ടില്ല. മകന്‍ ജനിച്ച സന്തോഷം പുറംലോകത്തെ അറിയിച്ചെങ്കിലും മാധ്യമങ്ങള്‍ അതൊരു ആഘോഷമാക്കി മാറ്റുന്നതിനെയും താരപുത്രി ശക്തമായി എതിര്‍ത്തിരുന്നു. തങ്ങളുടെ സ്വാകാര്യതയെ മാനിക്കണമെന്നും ഈ നിമിഷങ്ങള്‍ ആസ്വദിക്കുയാണ് എന്നുമാണ് അന്ന് നടി പറഞ്ഞത്. ഇതിന് പിന്നാലെ ഗര്‍ഭകാലത്തുള്ള ചിത്രങ്ങളൊക്കെ പങ്കുവെക്കുകയും ചെയ്തു.